Buntis na edad 10-14, mas dumami

ni Ronalyn Seminiano Reonico | February 8, 2021

Nababahala ang Commission on Population and Development (POPCOM) sa pagtaas ng bilang ng mga nanganganak na edad-15 pababa sa 7% noong 2019 kumpara sa mga nakalipas na taon.

Pahayag ng POPCOM, "In 2019, 2,411 girls considered as very young adolescents aged 10 to 14 gave birth, or almost seven every day. This was a three-fold increase from 2000, when only 755 from the said age group gave birth.”

Ayon sa tala ng POPCOM, ang Calabarzon ang may pinakamataas na bilang ng mga nanganak na menor de edad na pumalo sa 8,008. Sinundan ito ng National Capital Region na may bilang na 7,546, at ang Central Luzon ay nakapagtala naman ng 7,523.

Mataas din ang kaso ng teenage pregnancies sa Northern Mindanao na nakapagtala ng 4,747. Sinundan ito ng Davao na may 4,551 at ang Central Visayas na may 4,541.

Sa pangkalahatan, pumalo sa 62,510 ang bilang ng mga menor de edad na nanganak noong 2019 kumpara sa 62,341 na naitala noong 2018.

Nanawagan naman si PopCom Executive Director Juan Antonio Perez III sa pamahalaan na unahing isulong ang teenage pregnancy reduction program at nakikipag-ugnayan na rin umano ang ahensiya sa Department of Social Welfare and Development (DSWD) upang maprotektahan ang mga batang ina.

Saad pa ni Perez, “Adolescent mothers, as well as their children, can be provided with social protection, similar to the ones offered to older persons and victims of disasters.”

Vlogger na bugaw ng menor-de-edad, kulong

ni Lolet Abania | December 14, 2020

Isang vlogger mula sa Cebu ang inaresto matapos ang ginawang pambubugaw umano sa isang menor-de-edad.

Ayon sa pulisya, ni-recruit umano ng vlogger ang 17-anyos na lalaki upang gumawa ng malalaswang video at mahahalay na larawan. Hindi naman binanggit ng awtoridad ang pagkakakilanlan ng vlogger na suspek at ng menor-de-edad na biktima.

Naaresto ang vlogger sa isang entrapment operation, kung saan isang operatiba ng pulisya ang nagpanggap na bibili ng mga nasabing video at nagpapa-book ng "extra service" sa binatilyo.

Nasa pangangalaga na ngayon ng Department of Social Welfare and Development (DSWD) ang binatilyong biktima.

Nakumpiska mula sa suspek ang marked money, ID, passport at cellphone. Tumanggi namang magbigay ng pahayag ang vlogger.

Nahaharap ang suspek sa reklamong paglabag sa Expanded Trafficking in Person Act.

Dobleng pensiyon sa Senior Citizens, inihirit ni Sen. Pacquiao

ni Ronalyn Seminiano Reonico | November 17, 2020

Isinusulong ni Senator Manny Pacquiao na doblehin ng Department of Social Welfare and Development (DSWD) ang monthly pension ng mga senior citizens.

Aniya, "Paano naman makaka-support ang P500 na pension nila sa mga needs nila? Ang gusto ko nga sana, minimum, at least P1,000 para sa senior citizen dahil kawawa sila, eh."

Sang-ayon naman si Senator Imee Marcos sa nais ni Sen. Pacquiao.

Aniya, "Totoo, sobrang baba kasi. Ano naman ang magagawa mo sa P500 a month? Tapos ibibigay kada tatlong buwan, P1,500 din lang. Napakakaunti po.”

Sa ilalim ng Republic Act (RA) 9994 o ang Expanded Senior Citizens Act of 2010, ang mga may sakit at disability na walang pension mula sa ibang ahensiya ng gobyerno at wala ring permanenteng pagkakakitaan o souce ng financial assistance ay kuwalipikado upang makatanggap ng social pension mula sa DSWD sa pamamgitan ng Social Pension for Indigent Senior Citizens Program.