28k buntis, makikinabang sa mas pinalawak na 4Ps — DSWD

ni Eli San Miguel @Overseas News | June 13, 2024

Inihayag ng DSWD nitong Huwebes na nasa 28,000 na buntis ang maaaring makinabang sa cash transfer program ng pamahalaan dahil sa mas pinalawak at pinatibay na tulong-pinansyal nito.

“Sa kasalukuyan po, batay sa datos ng Pantawid Pamilyang Pilipino Program National Program Management Office, as of May 31, nasa mahigit 28,000 yung mga buntis na ina… But of course, we expect this data to still change,” pahayag ni DSWD spokesperson Irene Dumlao sa isang public briefing.

Inaprubahan ni Pangulong Ferdinand Marcos Jr. noong Martes ang panukala na magbigay ng cash grants sa mga buntis at nagpapasuso na mga ina sa ilalim ng Pantawid Pamilyang Pilipino Program (4Ps) upang tiyakin na matutugunan ang pangangailangan sa kalusugan ng kanilang mga anak sa unang 1,000 araw.

Gayunpaman, sinabi ng DSWD na maaaring hindi agad maipatupad ang pinalawak na cash grant dahil patuloy pang inaayos ang mga guidelines nito.

P64.8M ayuda para sa mga naapektuhan ng El Niño sa Western Visayas — DSWD

ni Eli San Miguel @News | May 14, 2024

Naglaan ang Department of Social Welfare and Development (DSWD) ng higit sa P64.8 milyong halaga ng ayuda sa mga pamilyang naapektuhan ng El Niño sa Western Visayas.

Sa isang pahayag nitong Martes, sinabi ng ahensya na kanilang ibinigay ang 37,367 kahon ng family food packs (FFPs) sa Negros Occidental, 33,054 kahon sa Antique, 18,880 kahon sa Iloilo, 10,707 kahon sa Aklan, 1,809 kahon sa Capiz, at 1,000 kahon sa Guimaras.

Sinabi ng DSWD na mayroong 367,809 pamilya, o 1,360,623 indibidwal, ang naapektuhan ng tagtuyot na dulot ng El Niño sa Rehiyon 6.

Sa kasalukuyan, mayroon ang DSWD Western Visayas ng higit sa P96.7 milyong halaga ng mga relief supplies at standby funds.

Pensiyon para sa mga mahihirap na senior, itataas sa 100% — DSWD

ni Eli San Miguel - Trainee @News | January 22, 2024

Tatanggap ng monthly P1,000 stipend simula sa susunod na buwan ang mga mahihirap na senior citizen na benepisyaryo ng programang Social Pension ng Department of Social Welfare and Development (DSWD), ayon kay DSWD Assistant Secretary Romel Lopez na inihayag ngayong Lunes.

Doble ang taas ng halagang ito kaysa sa P500 na matagal nang tinatanggap ng mga mahihirap na senior citizen bago ang nasabing pagtaas.

“We expect that the distribution of the social pension for the first semester with its increased amount will commence this February 2024,” pahayag ni Lopez.

“The social pension is provided to eligible and qualified indigent senior citizens to augment their daily subsistence and address their medical needs,” paliwanag pa niya.

Idinagdag pa niya na itinuturing na ‘eligible’ para sa programa ang mga senior citizen kung hindi sila kabilang sa mga tumatanggap na ng pensyon mula sa Social Security System, Government Service Insurance System, Philippine Veterans Affairs Office, Armed Forces and Police Mutual Benefit Association, Inc., o alinmang private insurance company.