2 estudyante arestado sa P1.12 M ilegal na droga

ni Lolet Abania | September 24, 2021

Inaresto ang dalawang college student matapos na makuhanan ng hinihinalang shabu at marijuana na mahigit sa P1 milyon ang halaga sa isang buy-bust operation ng pulisya sa Barangay Damayan, Quezon City.

Umabot sa 150 gramo ng umano’y shabu na nagkakahalaga ng mahigit sa P1 milyon ang nakumpiska ng mga awtoridad mula sa mga suspek.

Paliwanag ng 19-anyos na suspek, sumusunod lamang umano siya sa iniuutos sa kanya na i-deliver ang mga hinihinalang shabu kapalit ng cash na P300 hanggang P500.

Subalit inamin nitong nagawa na niya ito noon ng limang beses.

Isa pang college student ang dinakip matapos na makuhanan naman ng 1 kilo ng marijuana na may street value na P120,000.

Inamin din ng suspek na sumusunod lamang umano siya sa instructions na i-deliver ang naturang ilegal na droga.

Ayon sa isang opisyal ng barangay ang mga suspek ay hindi residente sa lugar at maaaring doon lamang sila sinabihang magkikita.

Nahaharap ang mga suspek sa reklamo na may kaugnayan sa paglabag sa provisions ng Comprehensive Dangerous Drugs Act of 2002.

P20-M shabu, nasabat sa big-time drug operator ng Sulu

ni Mary Gutierrez Almirañez | March 15, 2021

Nasabat ang mahigit P20 milyong halaga ng shabu na nakasilid sa 3 kilong Chinese tea bags mula sa kinilalang big-time drug operator na si Ejek Abduhalim sa isinagawang operasyon ng Philippine Drug Enforcement Agency Bangsamoro Region (PDEA-BARMM) sa Port Area Extension, Barangay Waled Jolo, Sulu kahapon, Marso 14.

Ayon kay PDEA-BARMM Regional Director Juvenal Azurin, “Kung makikita ang packaging ng illegal drugs, from outside sources, ibig sabihin imported. We already identified where is the source of the said confiscated illegal drugs and hopefully we can conduct follow-up operations.”

Iginiit niya na ang Golden Triangle Cartel ang nag-o-operate at nagpo-produce ng mga kontrabando sa border ng Myanmar, Thailand at Cambodia.

Aniya, mula sa Malaysia ay ibinibiyahe ng mga ito ang droga papunta sa Basilan, Tawi-Tawi at Sulu upang i-distribute sa bansa. Dagdag pa niya,

“We have just started. There is good transfer of intelligence, we have a good relationship with other government security forces in collaboration and coordination. Hopefully, we can get a better and bigger picture of how illegal drugs trade thriving in Sulu.”

Sa ngayon ay kasong paglabag sa Comprehensive Dangerous Drugs Act of 2002 ang haharapin ng suspek na si Abduhalim.

2 dating tulak, balik kulungan sa nasabat na P1.3-M shabu

ni Mary Gutierrez Almirañez | March 12, 2021

Balik sa kulungan ang dalawang tulak matapos muling mahuli ng mga awtoridad sa isinagawang buy-bust operation sa Barangay Gulod, Novaliches, Quezon City nitong Huwebes nang gabi, Marso 11.

Batay sa Quezon City Police District Station 4, tinatayang 200 gramo na nagkakahalagang P1,360,000 ng shabu ang nasabat sa mga suspek na sina alyas "Bunso", 31-anyos, at alyas “Waldo”, 57-anyos, na unang nakulong noong 2019 at kasalukuyang nasa watch list ng barangay.

Ayon pa sa ulat, nakipagtransaksiyon ang mga awtoridad sa dalawa gamit ang P50,000 boodle money at nang magpositibo ay kaagad nilang inaresto ang mga ito.

Sa ngayon ay muling nahaharap sa kasong paglabag sa Republic Act 9165 o Comprehensive Dangerous Drugs Act of 2002 ang mga suspek.