Natural at alternatibong paraan laban sa high blood

ni Dr. / Atty. Erwin P. Erfe, M.D. @Sabi ni Doc | January 24, 2023

Sa nakaraang artikulo ng Sabi ni Doc ay tinalakay natin ang Naturopathic Medicine at ang iba’t ibang uri ng pamamaraan na ginagamit ng mga Naturopathic doctors sa paggamot ng hypertension o high blood pressure. Sa ating pangkaraniwang lenggwahe ang sakit ay tinatawag na “altapresyon”.

Dahil sa paniniwala ng Naturopathy na may kakayahan ang ating katawan na pagalingin ang sarili, gumagamit ang mga naturopathic doctors ng mga bagaybna galing sa kalikasan, tulad ng mga halaman upang pagalingin ang mga sakit.

Sa nakaraang artikulo ay tinalakay natin ang paggamit ng mga halamang gamot (herbal medicine) sa pagpapagaling ng altapresyon, tulad ng Hawthorn, Serpentina at bawang. Base sa maraming pag-aaral, epektibo ang mga ito upang mapababa ang systolic at diastolic blood pressure.

Bukod sa mga halamang gamot, gumagamit din ng mga nutrients, tulad ng amino acids, vitamins at minerals galing sa iba’t ibang uri ng pagkain ang mga naturopathic practitioners upang pababain ang blood pressure.

Isang halimbawa ay ang L-Arginine, isang uri ng amino acid na pinanggagalingan ng Nitric Oxide na nagpapa-relax ng ating mga ugat upang maluwag na dumaloy ang ating dugo. Ayon sa scientific article mula sa American Journal of Hypertension na inilathala noong May 2000, ang L-Arginine ay epektibong magpababa ng blood pressure sa may altapresyon at epektibo rin na mapanatiling mababa ang blood pressure sa indibidwal na normal ang blood pressure. Sa nabanggit na pag-aaral ang dose na 10 grams ng Arginine araw-araw ay nakitang epektibo, galing man ang Arginine sa pagkain o kaya ay bilang supplement.

Ang isa pang amino acid na epektibo na magpababa ng blood pressure ay ang Taurine. Sa randomized double-blind at placebo-controlled study na inilathala noong January 2016 sa scientific journal na Hypertension, ang pag-inom ng Taurine supplement sa dose na 1,600 milligrams araw-araw ay epektibo na magpababa ng blood pressure sa mga prehypertensive. Ayon sa scientific article sa World Journal of Cardiology inilathala noong February 2014, ang Taurine ay nagpapababa ng blood pressure, nagpapabagal ng bilis ng tibok ng puso at nakatutulong maging normal ang tibok ng puso. Ito ay isa ring diuretic (nagpapaihi) na makatutulong sa mga pasyenteng may congestive heart failure at nagpapaganda ng function ng blood vessels. Tumutulong din ang Taurine na mabawasan ang insulin resistance sa mga indibidwal na mataas ang blood sugar.

Ang isa pang nutrient na makatutulong magpababa ng mataas na blood pressure ay ang omega-3 fatty acids. Sa dose na 2 grams araw araw ay napatunayan ng nagpapababa ng blood pressure sa loob lamang ng anim na linggo.

Ang coenzyme Q10 (CoQ10) deficiency ay dahilan din ng pagtaas ng blood pressure kaya’t ang supplementation ng CoQ10 ay isang paraan ng mga Naturopathic practitioners upang gamutin ang altapresyon. Gayundin ang soluble fiber na makikita sa black beans, lima beans, broccoli, avocado at camote.

Dahil ang soluble fiber ay nagpapataas ng insulin sensitivity, lumalaban upang pababain ang sympathetic stimulation at nagsisilbing diuretic, nakatutulong ito na mapanatiling mababa ang blood pressure.

Sa pag-aaral ni Dr. Mark Houston ng Hypertension Institute sa Nashville, Tennessee, sa bansang Amerika na inilathala sa World Journal of Cardiology, ang pag-inom ng Vitamin C, 250 milligrams, dalawang beses sa isang araw at ang pagkain ng mayaman sa Magnesium o pag-inom ng Magnesium supplement sa dose na 500 hanggang 1,200 milligrams araw-araw ay epektibo na magpababa ng blood pressure. Maaari ring epektibo ang Vitamin B6 (Pyridoxine) dahil ayon sa pag-aaral nina Dr. Richard Keniston at Dr. John Enriquez, Sr. ng William Beaumont Army Medical Center sa El Paso, Texas, USA ay marami sa may high blood pressure ang may kakulangan sa Vitamin B6.

Tandaan lamang na maaaring magsama ang epekto ng mga nabanggit na natural supplements sa pagbaba ng blood pressure kaya’t makabubuti na ma-monitor ang iyong blood pressure habang umiinom ng isa o ilan man sa mga nabanggit ng nga natural supplements. Makatutulong din ang pagsangguni sa mga Naturopathic practitioners o doktor na may kaalaman sa naturopathic medicine.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Kaalaman tungkol sa naturopathic medicine para iwas sa sakit

ni Dr. / Atty. Erwin P. Erfe, M.D. @Sabi ni Doc | January 18, 2023

Dear Doc Erwin,

Narinig ko sa talakayan sa radio na may mga alternatibong pamamaraan upang mapababa ang altapresyon o high blood pressure bukod sa pag-inom ng mga prescription medicine, na nabibili sa botika. Halimbawa, ayon sa talakayang ito ay ang mga pamamaraan ng Naturopathic Medicine. Ano ba ang Naturopathic Medicine? Anu-anong pamamaraan ang ginagamit nito upang bumaba ang blood pressure at epektibo ba ang mga pamamaraang ito? Sana ay matugunan ang aking mga katanungan. - Maria Leilani

Sagot

Maraming salamat Maria Leilani sa inyong pagliham sa Sabi ni Doc.

Ayon sa aklat ng Consumer Health and Integrative Medicine, Second Edition, na inilathala noong 2020, ang Naturopathic Medicine ay sistema ng pangangalaga ng kalusugan ng katawan, base sa paniniwala sa kakayahan ng katawan na pagalingin ang sarili.

Ayon sa founder ng Naturopathy sa Amerika na si Dr. Benedict Lust, ang sistema ng Naturopathy ay ang paggamit ng kalikasan (nature), tulad ng pag-inom ng malinis na tubig, paghinga ng sariwang hangin at pagbibilad ng sarili sa sikat ng araw upang gumaling sa sakit. Naniniwala rin ang mga naturopathic doctors na kailangan ang exercise, sapat na pahinga at tamang pagkain upang makaiwas at gumaling sa sakit.

Ayon sa naturopathy, ang sakit ay parte ng kalikasan, tulad ng sakit ng hayop at halaman. Ang paglabag sa batas ng kalikasan, tulad ng pag-abuso sa kalusugan ay nauuwi sa sakit.

Sa iyong katanungan, kung ano’ng pamamaran ang ginagamit ng mga naturopathic practitioners upang gamutin ang high blood pressure, ayon sa Association of Accredited Naturopathic Medical Colleges matapos malaman ang dahilan ng mataas na blood pressure ay maaaring gamutin sa pamamagitan ng diet, lifestyle modification, stress management at herbal supplements. Maaari ring gumamit ng antihypertensive medications.

Ang stress ay dahilan ng pagtaas ng blood pressure. Ang mga epektibong non-pharmacological intervention na ginagamit sa Naturopathy ay ang acupuncture, meditation at biofeedback. Ayon sa mga pag-aaral, epektibo rin ang exercise laban sa high blood pressure at ang epekto na pagbaba ng blood pressure matapos ang exercise session ay makikita hanggang 24-oras matapos ang exercise. Ang palaging pagkilos at pagiging aktibo natin ay pamamaraan upang mapababa ang blood pressure reading mula 4 hanggang 9 puntos.

May mga ginagamit din na herbal medicines ang mga Naturopathic doctors upang mapanatiling mababa ang blood pressure katulad ng herb na Hawthorn. Isang mekanismo ng antihypertensive effect ng Hawthorn ay ang vasodilation o ang pag-relax at pagbuka ng ating mga ugat upang malayang dumaloy ang dugo at bumababa ang presyon. Ang garlic o bawang, ayon sa mga pananaliksik ng mga scientists ay nagpapababa ng systolic at diastolic blood pressure dahil nireregulate nito ang nitric oxide, binabawasan ang inflammation at umaaktong ACE inhibitor sa ating katawan.

Sa susunod na bahagi ng ating talakayan ay pag-uusapan natin ang iba pang supplements na ginagamit sa larangan ng Naturopathy na nagpapanatili ng mababang blood pressure.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com

Boron, sagot sa osteoarthritis at paghina ng memorya

ni Dr. / Atty. Erwin P. Erfe, M.D. @Sabi ni Doc | January 17, 2023

Dear Doc Erwin,

Ako ay biyudo at senior citizen na rin. Maliban sa aking osteoarthritis at paghina ng memorya ay malusog ang aking pangangatawan. Napag-alaman ko mula sa health store na makabubuti ang health supplement na Boron upang mas lumakas ang aking pangangatawan. Ano ba ito, at ano ang epekto nito sa kalusugan? – Dexter

Sagot

Ang Boron ay trace mineral na mahalaga sa kalusugan. Ito ay nakukuha sa pagkain at sa mga commercial health supplement. Kung regular na kumakain ng prutas, madahong gulay, mani at umiinom ng mga fermented na inumin galing sa gulay, tulad ng wine, cider at beer ay maaaring sapat na ang Boron sa katawan.

Sa 2015 review article sa Integrative Medicine: A Clinician’s Journal, napag-alamang maraming scientific research na ang Boron ay kinakailangan ng katawan sa kalusugan ng mga buto, pagpapagaling ng sugat, sa regulasyon ng estrogen, testosterone at Vitamin D at pag-absorb ng magnesium. Nakatutulong din ito upang mabawasan ang inflammation sa katawan at itaas ang level ng iba’t ibang antioxidant enzymes, tulad ng glutathione.

Nakitaan din ng epekto ang Boron sa pag-iwas at paggamot ng iba’t ibang uri ng kanser, tulad ng prostate, cervical at lung cancer, gayundin laban sa lymphoma. Ang Boron ay ginagamit upang mabawasan ang mga hindi kanais-nais na epekto ng mga cancer chemotherapeutic drugs.

Tungkol sa inyong kalagayan, makatulong ito sa osteoarthritis at sa inyong paghina ng memorya.

May maitutulong ba ang Boron sa paghina ng memorya ng mga senior citizens?

Ayon sa 2013 study, na inilathala sa journal na Biological Trace Element Research ay nagkakaroon ng paghina ng brain electrical activity, attention at short-term memory ang indibidwal, na kulang sa trace mineral na Boron. Kaya’t makatutulong ito upang mapanatili ang brain electrical activity, cognitive performance at short-term memory ng matatanda.

Hanggang sa ngayon ay wala pang naitala na daily minimum requirement ng Boron, ngunit kung babalikan ang mga pananaliksik na binanggit ay makikita na ang mga health benefits ng Boron ay makikita lamang sa minimum daily dose na 3 milligrams. Maaaring gamitin ang dose na 6 o 9 milligrams per day sa osteoarthritis. Nagkakasundo naman ang mga siyentipiko na 20 milligrams per day ay ang maximum na safe upper limit ng daily intake ng Boron.

Sana ay nasagot ng artikulong ito ang inyong mga katanungan.

---

Maraming Salamat sa inyong pagliham sa Sabi ni Doc at nawa’y magpatuloy sa pagbuti ang inyong kalusugan. Kung may mga katanungan pa, mag-email lamang sa Sabi ni Doc sa e-mail address na erwin.erfe@gmail.com o sa doc.bulgar@gmail.com