PWDs, may libreng sakay sa LRT-2 sa May 9 elections

ni Lolet Abania | May 7, 2022

Magbibigay ng libreng sakay ang Light Rail Transit Line 2 (LRT-2) para sa mga persons with disabilities (PWDs) sa Mayo 9 elections, batay sa anunsiyo ng Light Rail Transit Authority (LRTA) ngayong Sabado.

Maaaring maka-avail ang lahat ng PWDs ng free LRT-2 rides anumang oras sa pagitan ng unang commercial trip nang alas-5:00 ng umaga hanggang huling commercial trip nang alas-8:30 ng gabi sa Antipolo station at alas-9:00 ng gabi sa Recto station.

Kailangan lamang magprisinta ng PWD passenger ng kanyang valid PWD ID sa security/station personnel sa pagpasok sa automatic fare collection system gates para maka-avail ng libreng sakay.

Ang free ride ay isa sa mga proposed measures ng Department of Transportation (DOTr), sa pamamagitan ng kanilang Task Force on Disability Affairs, na layong makapagbigay ng access sa mga PWDs sa panahon ng eleksyon.

“The provision of accessible transportation is one of the main requirements for PWDs to be able to participate in the national elections. LRT-2 is ready and available to accommodate them,” pahayag ni LRTA Administrator Jeremy Regino.

Hinimok din ni Regino ang lahat ng PWDs na sasakay ng tren patungo sa kanilang voting precinct na manatili at maghintay sa Special Boarding Area (SBA), ang nakatalagang lugar para sa mga senior citizens, PWDs, at mga buntis.

Mayroon ding nakalaang lugar para sa mga naka-wheelchair sa loob ng mga tren.

Paalala naman ng LRTA sa lahat PWD passengers na patuloy na sumunod sa mga safety at security protocols gayundin, ang mga minimum health protocols, gaya ng mandatong pagsusuot ng face masks at bawal mag-usap at phone calls, kung saan nananatiling ipinatutupad sa loob ng mga tren at mga istasyon.

Libreng sakay sa MRT3, extended hanggang Mayo 30 – DOTr

ni Lolet Abania | April 27, 2022

Inianunsiyo ng Department of Transportation (DOTr) ngayong Miyerkules ang pagpapalawig pa nang isa buwan para sa libreng sakay ng Metro Rail Transit Line 3 (MRT3).

Sa isang advisory, ayon sa DOTr, ang mga pasahero ay patuloy na maseserbisyuhan ng free rides ng MRT3 line hanggang Mayo 30, 2022, kung saan ang operating hours ay mula alas-4:40 ng madaling-araw hanggang alas-10:00 ng gabi.

Inisyal na ipinatupad ang libreng sakay noong Marso 28 hanggang Abril 30, bilang selebrasyon ng pagkumpleto ng rehabilitasyon ng MRT3 at para mapagaan ang nararanasang hirap ng mga commuters sa gitna ng pagtaas ng presyo ng langis, at lalo na sa maraming empleyado na nagbalik sa kanilang opisina at pinagtatrabahuhan.

“To continue providing assistance to the riding public in their commuting needs, the MRT3 Management and the DOTr have decided to extend for another month the implementation of the FREE RIDE or ‘LIBRENG SAKAY’ program in MRT3,” pahayag ng DOTr.

Batay sa ahensiya, hanggang nitong Abril 26, may kabuuang 7,227,434 pasahero na ang nakinabang mula sa MRT3 free ride program.

Ayon kay DOTr Secretary Arthur Tugade, umaasa sila na ang pag-extend ng free ride program ay patuloy na magpapagaan sa pinansiyal na pasanin ng mga commuters sa gitna ng isyu sa inflation at pagtaas ng langis dahil mas maraming manggagawa na rin ang nagbalik sa kanilang on-site work.

“Gumanda at nagbago ang ridership ng MRT3. Bago magpandemya, 260,000. At bagama’t may pandemya, ‘yung ridership ay umaabot sa 280,000. At ngayon, nasa 300,000 na ang naisasakay ng MRT3 at naihahatid nang ligtas, kumportable, at walang aberya. Napapanahon na i-extend pa natin ang LIBRENG SAKAY sa MRT3 upang mas maraming Pilipino ang makinabang,” sabi ni Tugade.

Waiver ng seaport terminal fees dapat palawigin — DOTr

ni Lolet Abania | March 29, 2022

Ipinag-utos ni Department of Transportation (DOTr) Secretary Arthur Tugade sa Philippine Ports Authority (PPA) na palawigin nito ang waiver kaugnay ng koleksyon ng mga terminal fees sa mga seaports na pinatatakbo ng gobyerno upang mabawasan ang gastos sa operasyon ng mga shipping companies sa gitna ng pagtaas sa presyo ng langis.

“Meron akong in-issue na instruction kahapon na tapusin sa lalong madaling panahon ‘yung waiver ng P500 terminal fee,” pahayag ni Tugade sa mga reporters sa isang press conference ngayong Martes.

Ayon kay Tugade, sinabi sa kanya ni PPA general manager Jay Santiago na ang waiver ng P500 terminal fee sa mga seaports ay nag-expired na.

“Sabi ko makiusap sa board mo na i-extend mo ng dalawa o tatlong buwan pa para nang sa ganu’n ay makatulong tayo sa shipowners,” saad ni Tugade.

“I hope maaksyunan na by this time,” dagdag ng opisyal.

Paliwanag ni Tugade na ang pagwi-waive ng koleksyon ng P500 terminal fee ay maaaring makabawas ng gastos sa operasyon ng mga shipping firms ng 20%.

Bukod sa tinatawag na waiving ng mga terminal fees, binanggit din ng opisyal ang posibilidad ng pagbibigay ng fuel subsidies para naman sa maritime sector.

“Kung merong subsidiya sa road, tingnan kung mayroon tayong maibibigay na subsidiya sa maritime,” sabi pa ni Tugade.