Dating PAL president Bautista, napiling DOTr chief ni P-BBM

ni Lolet Abania | June 23, 2022

Napili ni President-elect Ferdinand “Bongbong” Marcos Jr. si dating Philippine Airlines (PAL) president at chief operating officer Jaime Bautista bilang susunod na Department of Transportation (DOTr) chief sa kanyang administrasyon.

Ito ang kinumpirma ni incoming Executive Secretary Attorney Vic Rodriguez sa mga reporters ngayong Huwebes. Papalitan ni Bautista si Arthur Tugade na kalihim ng DOTr sa Hunyo 30.

Si Bautista na isang certified public accountant ay nagtrabaho sa PAL ng 25 taon at nagsilbi bilang kanilang presidente ng 13 taon bago ang kanyang retirement noong 2019.

Gayundin, in-appoint ni P-BBM si dating Light Rail Transit Authority (LRTA) deputy administrator Cesar Chavez bilang Undersecretary-designate for Rails ng DOTr.

Ayon sa kampo ni Marcos, si Chavez ang naging instrumento sa pagse-secure ng approval ng National Economic and Development Authority (NEDA) para sa Metro

Manila Subway, PNR Manila to Calamba, PNR Manila to Bicol, at ang Tagum-Davao-Digos Mindanao rail projects.

Bago pa magsilbi sa transport sector, si Chavez ay assistant general manager for planning ng Metropolitan Manila Development Authority (MMDA) at chairman ng National Youth Commission (NYC).

“I will not preempt the transport policy initiatives of the incoming president and incoming transport secretary, but my immediate concerns will be how to simplify decision-making processes and hasten the project completion of railway projects, and prioritize Visayas and Mindanao in the planning of future rail projects,” pahayag ni Chavez.

Napili rin ni Marcos ang abogadong si Cheloy Garafil, MNSA, na maging chairperson ng Land Transportation Franchising and Regulatory Board (LTFRB).

Sa kasalukuyan, si Garafil ay service director sa Committee on Rules ng House of Representatives. Nagsilbi rin siya bilang prosecutor ng Department of Justice (DOJ) at State Solicitor sa Office of the Solicitor General (OSG).

Gayundin, si Christopher “Chet” Pastrana ay napili ni Marcos na maging general manager ng Philippine Ports Authority (PPA).

Ayon sa kampo ni P-BBM, si Pastrana ay marami nang karanasan sa iba’t ibang aspeto ng aviation, logistics, at public maritime transport.

Free rides mula NAIA T2, T3, saanman sa Metro Mla. simula Hunyo 15-30 — DOTr

ni Lolet Abania | June 4, 2022

May libreng airport shuttle rides para sa mga pasahero ang Grab Philippines na magsisimula sa Hunyo 15 hanggang 30, ito ay bilang suporta ng kumpanya sa free ridership program ng pamahalaan.

Sa isang statement, masayang tinanggap ng Department of Transportation (DOTr) ang inisyatibong ito ng Grab na nag-aalok ng free airport shuttle rides para sa mga pasahero mula Ninoy Aquino International Airport (NAIA) Terminals 2 at 3 hanggang sa saanmang lugar sa National Capital Region (NCR).

Ang free airport shuttle ay sisimulan sa Hunyo 15 hanggang 30, 2022, mula alas-8:00 ng gabi hanggang alas-11 ng gabi. Ayon sa DOTr, magde-deploy ang Grab ng 100 units para sa naturang free airport shuttle program.

Para ma-avail ang libreng shuttle service, kailangan ang mga pasahero na mag-book sa Grab booths na matatagpuan sa arrival areas ng NAIA Terminals 2 at 3. Pinasalamatan naman ni DOTr Secretary Art Tugade ang Grab para sa naturang free shuttle services dahil napadagdag ito sa kasalukuyang Libreng Sakay Program ng DOTr at ng Land Transportation Franchising and Regulatory Board (LTFRB).

Gayundin, pinasalamatan ng Grab Philippines sina Pangulong Rodrigo Duterte at Tugade sa paglulunsad nito ng Libreng Sakay Program.

“We thank President Rodrigo Roa Duterte and the DOTr under the leadership of Secretary Art Tugade for launching the Libreng Sakay program, as well as other valuable projects that continue to benefit the Filipino commuters,” pahayag ng Grab.

Libreng sakay sa MRT3, extended hanggang Hunyo 30 — DOTr

ni Lolet Abania | May 25, 2022

Inanunsiyo ng Department of Transportation (DOTr) ang pagpapalawig ng isa pang buwan ng libreng sakay sa Metro Rail Transit Line 3 (MRT3) ngayong Miyerkules.

Sa isang virtual press briefing, sinabi ni MRT3 general manager Mike Capati na ang mga pasahero ng railway line ay patuloy na masisiyahan dahil sa serbisyong free rides na hanggang Hunyo 30, anumang oras ng kanilang operating hours mula alas-4:40 ng umaga hanggang alas-10:10 ng gabi.

Matatandaang unang ipinatupad ang libreng sakay noong Marso 28 hanggang Abril 30 kasabay ng selebrasyon ng pagkumpleto ng rehabilitasyon ng MRT3. Na-extend pa ito hanggang katapusan naman ng Mayo upang makatulong na mabawasan ang financial burden ng mga commuters sa gitna ng pagtaas ng presyo ng petrolyo.

Ang pagpapalawig ng free rides ng MRT3 ayon kay Capati, “aims to continue helping commuters ease their financial burden amid inflation and rising fuel prices.” “This will allow the MRT3 to further test its capacity and performance in accommodating up to or more than 350,000 passengers,” saad pa niya.

Binanggit naman ni Capati na nakapag-record ang railway line ng 15,730,872 total ridership mula Marso 28 hanggang Mayo 24, na may average weekly ridership na 315,334. Nai-record din ng MRT3, ang kanilang pinakamataas na ridership na umabot sa 351,592 noong Mayo 20.

Ayon pa kay Capati, naka-set na ang four-car CKD trains na kayang mag-accommodate ng hanggang 1,576 pasahero na kanilang ide-deploy para madagdagan ang kapasidad nito, kumpara sa karaniwang three-car train sets lamang.