Dahil sa sunud-sunod na kapalpakan.. LTO at DOTr, kinasuhan ng transport groups

ni Jeff Tumbado | May 3, 2023

Sinampahan ng transport groups ng kasong sibil ang ilang matataas na opisyal ng Land Transportation Office (LTO) at Department of Transportation (DOTr) kasunod ng umano'y ilegal na pagpapalabas ng mga polisiya kaugnay ng pagpapatupad ng Public

Motor Vehicle Inspection Center (PMVIC).

Batay sa inihaing reklamo ni Atty. Israelito Torreon, legal counsel ng transport groups, sinampahan ng kaso sina DOTr Secretary Jaime Bautista, Usec. Reinier Paul Yebra, LTO Asec. Jose Arturo Tugade at iba pa.

Inihain ni Atty. Torreon ang Petition for Certiorari Prohibition sa Regional Trial Court ng Lupon, Davao Oriental upang ideklara ng korte na walang bisa ang mga naunang ipinalabas na Department Order/memorandum circular kaugnay ng umano'y ilegal na implementasyon ng PMVIC.

Ipinababasura rin ng iba't ibang transport group at road safety advocates ang pagpapairal ng PMVICs system na ginawa lamang sa bisa ng Department Order.

Sa isinampang reklamo ng lead counsel ng grupo laban sa LTO at DOTr sa Regional Trial Court (RTC) sa Lupon ng Davao Oriental, sinabi nito na layon lamang na gipitin hanggang sa nawala ang Private Emission Testing Center (PETC) gayong ito ay alinsunod umano sa mga umiiral na batas.

Bukod pa rito, ipinarerebisa rin ng grupo ang implementasyon ng Land Transportation Management System (LTMS) bunsod ng sunud-sunod na kapalpakan na naranasan ng kanilang hanay.

Magkasanib pwersang nagsampa ng kaso ang mga grupong Ang Kaligtasan sa Kalsada; National Confederation of Tricycle Operators and Drivers Association of the Philippines (NACTODAP); National Public Transport Coalition (NPTC); Association of Committed Transport Organizations Nationwide Corporation (ACTONA); Arangkada Riders Alliance Inc. (Motorcycle Riders) at Lupon Pedicab Operators Drivers Association at iba pang transport group sa Davao Region.

Dagdag na bus routes para sa Libreng Sakay, pinag-aaralan ng DOTr

ni Lolet Abania | July 4, 2022

Nire-review ngayon ng Department of Transportation (DOTr) ang posibilidad ng pagkakaroon ng free bus rides sa mas maraming ruta sa ilalim ng kanilang Libreng Sakay program.

Sa isang interview kay DOTr Undersecretary Cesar Chavez ngayong Lunes, ipinunto nito na ang budget ng DOTr ay magiging sapat lang para sa umiiral nang mga ruta ng libreng sakay.

“Nire-review ‘yan ngayon sapagkat ‘yung budget na nakalaan, of course through congressional approval at nu’ng nakaraang administrasyon, ay sasapat lang at hindi kasama ‘yung ibang ruta na hinihiling nila ngayon,” paliwanag ni Chavez.

Ayon kay Chavez, makikipagpulong na si DOTr Secretary Jaime Bautista sa mga head ng mga kaugnay na ahensiya upang talakayin ang naturang usapin.

Noong Biyernes, inaprubahan ni Pangulong Ferdinand “Bongbong” Marcos Jr. ang extension ng free EDSA Carousel bus rides hanggang Disyembre 2022, kung saan magtatapos sana sa Hulyo 30, 2022.

Aprubado rin kay Pangulong Marcos, ang libre sakay para sa mga estudyante na gagamit naman ng MRT3, LRT2, at Philippine National Railways (PNR) kapag nag-resume na ang in-person classes sa Agosto.

Binanggit din ni Chavez sa interview na hindi naman kakayanin ang free rides para sa lahat sa mga tren dahil aniya, ang MRT3 ay nagkaroon lamang ng P82 million revenue collection nitong Enero subalit umabot ang kanilang gastos sa P722 milyon para sa libreng sakay.

Gayundin, ayon kay Chavez, hindi rin sila makapagbigay ng free rides sa LRT1 sa dahilang ito ay nasa ilalim ng isang concession agreement sa Light Rail Manila Corporation at ang gobyerno ay walang control sa kanilang operation at revenue.

Libreng sakay sa EDSA Carousel, extended; free train ride sa estudyante, aprub — P-BBM

ni Lolet Abania | July 1, 2022

Inaprubahan ni Pangulong Ferdinand “Bongbong” Marcos, Jr. ngayong Biyernes, ang extension ng libreng sakay sa EDSA Bus Carousel at libreng sakay naman para sa mga estudyante sa mga train sa Metro Manila at ang Philippine National Railways (PNR), batay sa anunsiyo ng Department of Transportation.

Ayon sa DOTr, ang free rides sa EDSA Bus Carousel ay pinalawig ng hanggang Disyembre 2022, habang free train rides para sa mga estudyanteng sasakay sa Metro Rail Transit Line 3 (MRT3), Light Rail Transit Line 2 (LRT2), at PNR na mula Agosto 22 hanggang Nobyembre 4, 2022.

Base sa isang bahagi ng DOTr memorandum na inaprubahan ni Pangulong Marcos, sinabi ng ahensiya na kinonsidera rito ang availability ng budget para sa Service Contracting sa ilalim ng 2022 General Appropriations Act sa pagpapalawig ng free bus rides.

Ginawa ito, ayon sa DOTr, “[to] ease the burden of rising living expenses on Filipino families and help them save money, especially with the return of face-to-face classes after more than two years.”

Habang tinapos na ng gobyerno nitong Hunyo 30, ang libreng sakay sa mga pasahero maliban sa mga estudyante sa MRT3, sinabi ng DOTr na inirekomenda nila ang free rides para sa mge estudyante sa MRT3, LRT2, at PNR bilang konsiderasyon na rin sa kapakanan ng mga ito na ani ahensiya, “whose learning outcomes have been disproportionately affected by the pandemic.”

Kaugnay nito, ayon sa Department of Education, tinatayang nasa mahigit sa 38,000 paaralan sa bansa ang nakatakda nang mag-resume para sa face-to-face classes sa School Year 2022-2023.