Walang huli sa walang RFID – DOTr

ni Lolet Abania | November 24, 2020

Walang dapat na ikabahala ang publiko sa kanilang mga sasakyan na wala pang radio frequency identification (RFID) tags kahit pa umabot nang hanggang January 11, 2021, ayon sa Department of Transportation (DOTr).

Sa inilabas na advisory ngayong Martes, ayon sa DOTr, hindi dapat mangamba ang mga motorista dahil ang RFID installation sa mga toll lanes at booths ay mananatiling bukas 24/7 hanggang January 11, at kahit pa magpalit ng tollway system at maging isang fully-digital cashless system ito sa December.

"Wala pong mangyayaring hulihan mula December 1 hanggang January 11, 2021 para sa mga sasakyang walang RFID," ayon sa DOTr.

"Matapos ang January 11, hindi lahat ng lanes sa toll gate ay iko-convert bilang stickering lane. Magtatalaga na lamang ng isa o dalawang stickering lane, o kaya naman isang installation tent bago pumasok sa toll gate kung saan maaaring kabitan ng RFID ang mga sasakyan," paliwanag ng ahensiya.

Parehong ang Autosweep at Easytrip systems na gagamitin sa mga expressways na kumokonekta sa Metro Manila ay nakatakdang maging fully contactless sa December.

"Kung wala kang RFID by December 1, DOON KA MISMO SA TOLL GATE KAKABITAN. May nakaabang na RFID installation lanes ang mga toll gates, at may mga tauhan po ang toll operators na mag-a-assist sa pagkabit ng RFID stickers," dagdag pa ng DOTr.

Ang Autosweep tags ay inisyu ng San Miguel Group para sa Skyway, South Luzon Expressway (SLEx), STAR Tollway, Tarlac-Pangasinan-La Union Expressway (TPLEx), NAIA Expressway (NAIAx), at Muntinlupa-Cavite Expressway (MCX).

Ang Easytrip System naman ay para sa North Luzon Expressway (NLEx), Subic-Clark-Tarlac Expressway (SCTEx), Manila-Cavite Expressway (CAVITEx), C5 Southlink, at Cavite-Laguna Expressway (CALAX).

Traze app sa mga airports, start na sa Nov. 28

ni Lolet Abania | October 30, 2020

Naglunsad ang Department of Transportation (DOTr) ng isang application kung saan makukuha ng awtoridad ang mga impormasyon ng mga pasahero na hindi magsasagawa ng direct contact dito upang maiwasan ang pagkalat ng COVID-19.

Maaaring magamit ang Traze app ng mga Android at iOS users para ma-scan ang QR code na nakapaskil sa mga airports at makapag-register sa tracing server. Para sa mga walang mobile devices, maaari silang humingi ng tulong sa Malasakit Help Desk na nasa mga airports.

Sa pamamagitan ng nasabing app, madaling maipapaalam sa mga users kung ang isang pasahero na kasama nilang bumiyahe mula sa terminals at airplanes ay nagpositibo sa COVID-19. Gayunman, ang pagkakaroon ng Traze app ay hindi mandatory.

Magagamit lamang ito sa Ninoy Aquino International Airport, Davao International Airport, Clark Airport at Mactan-Cebu International Airport.

Samantala, sa November 28, ipapagamit na ang Traze app sa lahat ng airports sa bansa. “We will make sure that all CAAP-operated airports will strictly implement the use of Traze,” sabi ni CAAP Director General Jim Sydiongco.

Pinag-aaralan na rin ng awtoridad ang paggamit ng nasabing application sa iba pang uri ng transportasyon gaya ng railway.

“By making certain tweaks in the application and improving the application further, we can actually make the application applicable and usable in other modes of transportation,” sabi ni Philippine Ports Authority (PPA) General Manager Jay Daniel Santiago.

Cashless payment ng toll fee, start sa December 1

ni Thea Janica Teh | October 28, 2020

In-extend na ng Department of Transportation (DOTr) ang pagpapatupad ng cashless payment system sa lahat ng expressway sa Disyembre 1, 2020.

Sa inilabas na pahayag ng DOTr ngayong Miyerkules, ito umano ang kanilang sagot sa mga motoristang hindi pa nakakapagpakabit ng Radio Frequency Identification (RFID) sticker sa kanilang mga sasakyan.

Ayon kay Toll Regulatory Board Executive Director Abraham Sales, pumayag umano si Secretary Arthur Tugade sa pagpapalawig nito upang mabigyan pa ng oras ang mga motorista na magpakabit ng RFID sticker.

Dagdag pa ni Sales, ito na ang pinakahuling pagpapalawig nito at siguradong ipatutupad na ang cashless payment system sa Disyembre 1.

Kaya naman pinaalalahanan ni DOTr Assistant Secretary for Road Transport and Infrastructure Mark Steven Pastor ang lahat ng motorista na magpakabit na ng RFID sticker at huwag nang hintayin ang deadline.

Sa ilalim ng Department Order 2020-012, iniutos ng DOTr ang cashless transaction sa lahat ng toll road operator na magsisimula sana sa Nobyembre 2 upang maiwasan ang pagkalat ng COVID-19.