Travel ban sa UK dahil sa bagong Coronavirus, 'di pa final answer - Duque

ni Lolet Abania | December 29, 2020

Nilinaw ni Department of Health (DOH) Sec. Francisco Duque III na ang naunang inanunsiyo tungkol sa travel ban sa 20 bansa na may mga naitalang kaso ng bagong Coronavirus variant ay isa lamang rekomendasyon at wala pang pinal na desisyon.

"It's a recommendation... Hintayin na lang natin 'yung sa OP (Office of the President) issuance today," sabi ni Duque sa isang phone interview.

Unang inanunsiyo ngayong Martes ng umaga nina Duque, Department of Labor (DOLE) Sec. Silvestre Bello III at ng Department of Transportation (DOTr) na palalawakin ang travel ban sa 20 bansa mula December 30, 2020 hanggang January 15, 2021 dahil sa posibleng pagkalat ng bagong Coronavirus variant sa bansa.

Samantala, sa isang news briefing, pinayuhan ni Presidential Spokesperson Harry Roque ang publiko na maghintay sa ilalabas na mga guidelines mula sa Office of the President ngayong araw.

"What I understand now is the Office of the Executive Secretary is drafting guidelines that would conform to what the President said na walang Pilipino na nais umuwi na puwedeng pigilan," ani Roque.

"My office is the only one authorized to issue any information relating to COVID so, antayin n'yo pong mag-issue tayo ng anunsiyo kung epektibo na ang travel ban sa iba pang mga bansa sa may new variants... May dahilan po kung bakit nais ni Presidente na sentral po sa opisina natin ang pag-release ng impormasyon para maiwasan ang kalituhan," dagdag ng kalihim.

Matatandaang inaprubahan ni Pangulong Rodrigo Duterte ang extension ng travel ban sa United Kingdom, kabilang ang mga transited mula sa naturang bansa ng dagdag na dalawang linggo matapos ang December 31, 2020.

MRT-3 pumalya ulit, biyahe ng tren limitado

ni Lolet Abania | December 13, 2020

Limitado ang naging biyahe ng MRT-3 ngayong Linggo nang hapon dahil sa isang “power technical issue”, ayon sa Department of Transportation-MRT.

Sa Facebook post ng DOTr-MRT, alas-2:35 ng hapon ngayong Linggo, nagpatupad ng provisional service mula North Avenue station sa Quezon City hanggang Shaw Boulevard Station sa Mandaluyong City (parehong bounds) lamang at mayroong 11 trains ang bibiyahe.

Ito ay dahil nagkaroon ng power failure ang overhead catenary system (OCS) ng Guadalupe Station hanggang sa Ayala Station (southbound) sa Makati City, ayon sa DOTr-MRT.

Patuloy naman ang isinasagawang troubleshooting at pagsasaayos sa nasabing istasyon. Agad ding magpapalabas ng advisory ang ahensiya kapag naibalik na ang buong operasyon ng train stations.

Pila para sa 24/7 RFID sticker, usad-pagong

ni Lolet Abania | November 27, 2020

Umabot ang bumper-to-bumper na mga sasakyan magmula sa itaas sa tollgate ng NAIAX hanggang sa gasolinahan bago makaakyat ng Skyway. Ilang gabi na itong nararanasan ng mga motorista dahil kakaunti ang mga tollgate na maaaring magkabit ng RFID sticker.

Usad-pagong din ang mga sasakyan dahil sa 10-20 kada minuto matapos ang susunod na andar nito bago makarating sa tollgate. Gayunman, nabawasan na ang pila ng mga sasakyan ngayong araw para sa pagkuha ng RFID sticker, hindi tulad kahapon na umabot ito sa Magallanes nang halos alas-3 ng madaling-araw.

Matatandaang sinabi ng (DOTr) na hanggang January 11 na lang ang huling pagpapakabit ng mga motorista ng RFID sticker. Subali’t kahit matapos ang deadline ng paglalagay nito, walang huhulihing motorista sakaling walang RFID sticker dahil hindi lahat ng lanes sa tollgate ay iko-convert bilang stickering lane, ayon sa DOTr.

Sa December 1 o susunod na linggo, uumpisahan nang maging cashless ang pagbabayad sa lahat ng tollgate sa Metro Manila kaya inaasahan na ang mahahaba pang pila ng sasakyan sa mga 24/7 installation sites ng RFID. Ayon naman sa mga concessionaire ng expressways, maaari pa ring magpakabit ng RFID sticker ngayong December.