Fully vaxxed travelers, ‘di na kailangan ng negative COVID-19 test — DOT

ni Lolet Abania | May 27, 2022

Hindi na kailangan na magprisinta ng pre-departure COVID-19 negative test ang lahat ng mga fully vaccinated na mga biyahero na papasok sa bansa, ayon sa Department of Tourism (DOT).

Sinabi ng DOT, una nang inaprubahan ng Inter-Agency Task Force for COVID-19 response (IATF) ang pagbasura sa naturang travel requirement.

Sa ilalim ng Inter-Agency Task Force for the Management of Emerging Infectious Diseases (IATF-EID) Resolution 168, lahat ng travelers – edad 18 at pataas, at iyong fully vaccinated na o nakatanggap ng booster shot – ay exempted mula sa kinakailangang negative test proof.

Sakop din ng exemptions ang mga travelers na edad 12 hanggang 17 na nakatanggap ng kanilang primary COVID-19 vaccines, at iyong below 12-anyos na bumiyahe kasama ang kanilang mga fully vaccinated parents o guardians.

“We are glad that the propositions we have worked on have been approved by the IATF-EID and are now up for implementation. As we make it more convenient for tourists to visit the country, the public’s health and safety will remain the DOT’s priority,” ani Tourism Secretary Berna-Romulo Puyat.

“The DOT sees this development as a win for the local tourism industry as welcoming more tourists in the country will yield more revenues for our MSMEs and restore more jobs and livelihoods in the sector,” dagdag ng opisyal.

Kaugnay nito, ang travel insurance ay hindi na rin required subalit higit itong hinihikayat. Sa latest data mula sa DOT, nabatid na may kabuuang 517,516 dayuhang turista ang dumating sa Pilipinas na nai-record mula Pebrero 10 hanggang Mayo 25, 2022.

Sa naturang bilang, 104,589 ay mula sa United States; 28,474 sa South Korea; 24,337 sa Canada; 23,286 sa Australia; 20,846 sa Britain at 13,373 mula sa Japan. Kabilang sa iba pang dayuhang turista na bumisita sa Pilipinas nitong mga unang buwan ng taon ay Vietnamese, Singaporeans, Malaysians, Italians, Irish at French.

Lagpas sa limit — DOT... 20K turista, dumagsa sa Boracay noong Huwebes at Biyernes Santo

ni Lolet Abania | April 18, 2022

Ipinahayag ng Department of Tourism (DOT) ngayong Lunes na umaasa sila sa mga awtoridad na mareresolbahan ang umano’y paglabag sa Boracay Island kung saan lumagpas ito sa nararapat na kapasidad matapos na mahigit sa 20,000 turista ang bumisita sa naturang tourist destination noong Huwebes Santo at Biyernes Santo.

Ayon sa DOT, inabisuhan na nila ang Department of the Interior and Local Government (DILG) at Department of Environment and Natural Resources (DENR) kaugnay sa isyu at hinimok na magsagawa ng nararapat na aksiyon ang mga ahensiya upang maiwasan ang katulad na insidente na muling mangyari.

“We continue our coordination with them, especially the DILG, which has jurisdiction over the LGU (local government unit), to address this concern and prevent similar incidents from happening in the future,” saad ng DOT.

Nang matapos ang rehabilitasyon ng Boracay, inirekomenda lamang sa 19,215 ang daily limit ng mga turista para maiwasan ang over-tourism at maprotektahan pa ang isla.

Subalit, ayon sa report ng Malay Tourism Office sa DOT, ang bilang ng mga turista sa isla ay umabot sa 21, 252 noong Abril 14 habang 22,519 noong Abril 15, na mas mataas sa daily limit nito.

“Gusto natin malaman sa ating mayor at sa ating governor, bakit nila pinayagan ito. Hindi ito by air dahil ang by air, talagang limited number of [travelers] dumating by air. This is all by land. We are waiting now for the mayor because he is answerable to this,” sabi ni DOT Secretary Bernadette Romulo-Puyat.

“Maling-mali kasi may pandemic pa,” dagdag ng opisyal.

Sinabi pa ng DOT na kahit unti-unti nang nakababawi ang industriya mula sa pandemya dapat pa ring tandaan na kailangang ipatupad ang mga health at safety protocols.

“Kailangan natin, maintindihan nating lahat na we are in the midst of a pandemic. Gusto natin magkatrabaho lahat pero hindi i-compromise ang health and safety,” giit pa ni Puyat.

Sa ngayon, wala pang pahayag si DILG Secretary Eduardo Año hinggil sa nasabing isyu.

Libreng booster shots para sa mga Japanese tourists — DOT

ni Lolet Abania | March 17, 2022

Magbibigay ang gobyerno ng libreng COVID-19 booster shots sa mga Japanese tourists na nagnanais at nasa Pilipinas sa ngayon, ayon sa Department of Tourism (DOT).

Sa isang radio interview ngayong Huwebes, sinabi ni DOT Secretary Bernadette Romulo-Puyat na nabuo ang naturang inisyatibo katuwang sina National Task Force (NTF) Against COVID-19 chief implementer at vaccine czar Secretary Carlito G. Galvez Jr. at NTF deputy chief implementer Vince Dizon.

“We also opened pala to our Japanese tourists. Kasi ngayon pa lang sila nagbo-booster program here in Japan. Together with Sec. Galvez and Sec. Vince Dizon, ang ating mga Japanese tourists, they can come [to the Philippines] and get their booster shots for free,” pahayag ni Puyat.

“They’re very happy about that because zero lang ang quarantine nila if they get their booster shots. So they’re quite happy with our announcement,” dagdag niya.

Ayon kay Puyat, kasalukuyan siyang nasa Japan, ang bansa na isa sa mga top source markets ng Pilipinas bago pa ang pandemya, upang himukin ang mga ito at ipaalam sa kanila na ligtas nang pumunta at mag-travel sa bansa.

Aniya, nakikipagpulong siya sa mga katulad din niyang opisyal doon at sa iba’t ibang tourism organizations sa Japan.

“Talagang importante sa kanila na vaccinated tayo, ‘yung ating mga tourism stakeholders. Nakuwento ko nga na 97% vaccinated na ang ating mga tourism stakeholders and 25% na booster,” sabi ni Puyat.

“Very important sa kanila ‘yung they found out the vaccination rate in the country at continuously bumababa ‘yung ating mga kaso. So they know and important din sa kanila na nu’ng September 2020 pa lamang, we received the World Travel and Tourism Council Safe Travels stamp,” saad ng kalihim.

Ang naturang stamp ay ipinagkakaloob sa mga gobyerno at kumpanya sa buong mundo na in-adopt ang health at hygiene global standardized protocols, at kung saan sinusunod ang mga guidelines na itinakda ng World Health Organization (WHO) at Centers for Disease Control and Prevention (CDC).

Gayundin, layon nitong maibalik ang kumpiyansa ng mga travelers at makatulong sa nalugmok na travel sector na makarekober.

Sa kasalukuyan, ang Pilipinas ay tumatanggap ng business at leisure travelers mula sa 157 visa-free countries simula pa noong Pebrero 10, 2022.

Ang mga fully vaccinated lamang na dayuhang turista mula sa visa-free countries ang pinapayagang makapasok sa bansa. Kailangan din nilang magprisinta ng negative COVID-19 RT-PCR test result na kinuha ng 48-oras bago pa ang kanilang biyahe.

Gayunman, ayon kay Puyat, simula sa Abril 1, muling bubuksan ng Pilipinas ang mga borders sa lahat ng foreign tourists, kabilang na ang galing sa mga visa countries.