Pinagtatawanan na sa buong mundo.. "Love the Phls." slogan, tuloy — DOT

ni Mylene Alfonso | July 6, 2023

Sa kabila nang naging kontrobersiya, nanindigan ang Department of Tourism (DOT) na panatilihin ang kanilang bagong tourism slogan na "Love the Philippines".

Ginawa ni Tourism Secretary Christina Frasco ang kumpirmasyon sa isang panayam sa 2022 Philippine Tourism Satellite Accounts and Tourism Statistics Dissemination Forum.

"I think that is evident," maikling tugon ni Frasco nang tanungin kung patuloy na gagamitin ng DOT ang tourism slogan na inilunsad lamang noong Hunyo 27.

Paulit-ulit kasi na binanggit ni Frasco ang ''Love the Philippines'' sa kanyang talumpati, at ipinakita rin ang slogan logo sa stage.

Gayunman, naniniwala si Senador Nancy Binay, chairman ng Senate Committee on Tourism na dapat tanggapin na ng ahensya na hindi na maisasalba ang "Love" slogan lalo't nabalita na sa buong mundo ang nangyari at napagtawanan na ang nabanggit na slogan.

Sa halip, mag-move on na aniya at ibalik na lamang ang slogan noon na "It's more fun in the Philippines".

"Dahil nga sa nangyari, headline na tayo sa buong mundo. Naging laughing stock na ang slogan, at masyado nang tinamaan ang campaign. Nakakalungkot dahil sa unang tapak pa lamang, imbes na umarangkada ay umatras tayo," punto ng Senadora.

"We don't want the slogan to become a national embarrassment and look like losers. Again, huwag nang ipilit. Hindi masama ang magkamali. LOVE was not meant to be. Let us all move on and just bring back the FUN to the Philippines," dagdag pa ni Binay.

Matatandaang inulan ng batikos ang promotional video na "Love the Philippines" dahil sa paggamit ng sinasabing stock footages na kinunan sa ibang bansa.

Kontrata, binawi na.. AD agency na gumawa ng sablay na tourism video, 'di pa bayad — DOT

ni Madel Moratillo | July 4, 2023

Binawi na ng Department of Tourism ang kontrata nito sa DDB Philippines bilang kontraktor para sa kanilang bagong tourism campaign na "Love the Philippines".

Kasunod ito ng kontrobersiya sa nabuking na mga video clips sa audio visual presentation na hindi naman kinunan sa Pilipinas.

Sa isang pahayag, sinabi ng DOT na may karapatan silang baguhin, suspendihin o itigil pansamantala o permanente ang kontrata kung makitang hindi “capable” ang agency sa proyekto.

Nakikiusap umano ang DOT sa mga Pinoy sa labis na pagkadismaya sa paggamit ng non-original/stock footage na hindi pa galing sa Pilipinas at ginamit sa AVP para sa "Love the Philippines" campaign.

“As DDB Philippines has publicly apologized, taken full responsibility, and admitted in no uncertain terms, that non-original materials were used in their AVP, reflecting an abject failure to comply with their obligation/s under the contract and a direct contravention with the DOT’s objectives for the enhanced tourism branding, the DOT hereby exercises its right to proceed with termination proceedings against its contract with DDB.” bahagi pa ng pahayag ng DOT.

Tiniyak ng DOT na wala pang naibabayad sa DDB kaugnay ng tourism branding campaign contract.

Trabahong tamad, budol — Kongreso.. Slogan ng Love the Phils. campaign, kopya lang din

ni Mylene Alfonso | July 4, 2023

Pinuna ni ACT Teachers Partylist Rep. France Castro ang kampanya ng Department of Tourism (DOT) na "Love the Philippines" dahil sa pangongopya mula sa ginagamit na tourism slogan ng bansang Cyprus.

Tinawag din ni Castro na budol ang tourism campaign ng DOT na mababang uri na trabaho na nagpapababa sa kredibilidad at integridad sa industriya ng turismo.

"This type of shoddy work undermines the credibility and integrity of our tourism industry," ani Castro sa isang pahayag.

"It is unacceptable for the Marcos government to resort to plagiarizing campaign slogans from other countries. We should be showcasing the unique culture, heritage, and natural wonders that make the Philippines truly remarkable," ani Castro.

Tinukoy ng House deputy minority leader ang kampanyang "Love Cyprus" na inilunsad ng Cyprus Deputy Ministry of Tourism noong 2021.

Sinabi rin ni Castro na ang usapin ay nagdulot ng malaking kahihiyan para sa Pilipinas sa international community dahil sa paggamit ng mga stock footages.

Samantala, inihayag naman ni Albay 2nd District Rep. Joey Salceda na una nang nanita dahil sa hindi pagkakasama ng Bulkang Mayon sa bagong video na sintomas talaga ang una niyang puna na “trabahong tamad”.

"Clearly, the exclusion of Mayon and other tourist attractions intrinsic to the Philippine brand was just a symptom of "trabahong tamad' that is now evident to everyone," banggit ni Salceda.