DOH, nanawagan para sa donasyon ng dugo

ni Lolet Abania | January 28, 2022

Nananawagan ang Department of Health (DOH) sa mga eligible na indibidwal na mag-donate ng kanilang dugo sa gitna ng kakulangan sa suplay nito sa mga blood centers.

Ayon kay DOH Undersecretary Maria Rosario Vergeire, maaaring ma-access ng mga indibidwal ang listahan ng mga blood donation centers sa pamamagitan ng website: https://tinyurl.com/DONATEBLOODPH.

“Bukod sa makakatulong ang inyong dugo sa pagligtas ng buhay, marami din po benepisyo para sa inyo ang pagdo-donate ng dugo,” sabi ni Vergeire sa isang Palace briefing ngayong Biyernes.

“Kabilang na diyan po ang pagbaba ng risk of heart attack, pagtulong sa pagpapanatiling malusog ang inyong atay, at nakakatulong din po ma-improve ang inyong cardiovascular health,” paliwanag ng kalihim.

Ayon sa DOH, ang mga indibidwal na nasa pagitan ng edad 16 at 65-anyos, na tumitimbang ng hindi bababa sa 50 kilograms ay eligible na mabigay ng kanilang dugo.

Gayundin, hindi dapat sila sumailalim sa minor o major surgeries, bagong tattoos, body piercings, o tumanggap ng anti-rabies/anti-tetanus vaccine nitong nakalipas na taon.

Binanggit rin ng DOH na hindi dapat sila nasangkot sa tinatawag na “high-risk behaviors” gaya ng casual sex o mayroong multiple sexual partners, bukod sa iba pang kadahilanan.

“Sa ngayon po mayroon tayong kakulangan sa supply ng dugo sa atin pong mga blood centers. Nananawagan po kami sa ating publiko na kung kayo po ay eligible, kayo po ay maaaring mag-donate ng dugo para po sa mga nangangailangan nating kababayan,” giit pa ni Vergeire.

P57M halaga ng medical equipment, donasyon ng Australia sa ‘Pinas

ni Lolet Abania | September 29, 2021

Nasa P57 milyon halaga ng mga medical equipment, suplay at personal protective equipment (PPE) ang ibinigay ng Australian government kahapon sa Armed Forces of the Philippines (AFP).

Sa isang statement ng AFP ngayong Miyerkules, sina Department of National Defense Secretary Delfin Lorenzana at AFP chief Lieutenant General Jose Faustino Jr., ang opisyal na tumanggap ng donasyon ng Australia sa isang ceremony sa Pier 15, South Harbor sa Manila.

Ilan sa mga items na donasyon ng Australia ay high flow oxygen machines, stretchers, defibrillators, disinfection kits, Automated RNA Extraction kit, Viral RNA Extraction kit, RT-PCR Reagents at Detection kit, face masks, face shields, PPE level 3 at level 4 sets, eye protectors at KN95 masks.

Ayon sa AFP, ang mga medical equipment ay ide-deliver sa Victoriano Luna Medical Center (VLMC) bilang suporta sa kanilang COVID-19 response, mga testing efforts at kapasidad para sa hospitalization ng mga minor hanggang sa mga critical patients ng pagamutan.

Sinabi ni Lorenzana na pinalawak ng Defense Cooperation Program ng Australia ang pagtulong sa mga pangangailangan sa COVID-19 pandemic ng mga sundalong Pilipino. “Certainly, these donations will ramp up the day-to-day clinical management and quality of care and service which AFP’s medical arm is expected to provide,” ani Lorenzana.

Labis naman ang kasiyahan ni Australian Ambassador to the Philippines Steven Robinson na nakatulong ang kanyang bansa sa pamamagitan ng pagbibigay ng mabilis at agarang suporta sa pangangailangan ng Pilipinas.

“These additional medical and personal protective equipment will be critical in VLMC’s COVID-19 testing efforts, and treatment of COVID patients,” sabi ni Robinson.

Pinasalamatan din ni Faustino ang Australian government at nangakong ang kanilang mga donasyon ay gagamitin sa nararapat at tamang paraan.

Donasyong 3M doses ng Moderna, dumating na… 'Pinas at USA, may matinding friendship — P-Du30

ni Lolet Abania | August 3, 2021

Tinanggap ni Pangulong Rodrigo Duterte ngayong Martes ang dumating na 3,000,060 milyon doses ng Moderna COVID-19 vaccines sa Villamor Air Base sa Pasay City na donasyon ng United States.

“It is with joy and high hopes that we welcome the vaccines given to us by the United States. This highlights the strong and deep friendship between our two countries,” ani Pangulong Duterte.

“I know the sentiment of America that these vaccines should be given to those who have less in life,” dagdag ng Pangulo. Dumalo rin sa event si US Embassy in Manila Charge de Affaires John Law, na nagbitaw naman ng wikang Filipino para ipahayag ang sinseridad ng pagtulong ng kanilang gobyerno. “Nandito kami para sa inyo,” sabi ni Law.

Ang United States ay nakapag-donate na ng tinatayang 13 milyon doses ng COVID-19 vaccines sa Pilipinas.