Edad 17 pababa, bawal sa Manila Bay dolomite beach — Malacañang

ni Lolet Abania | October 25, 2021

Naglabas ng pahayag ang Malacañang ngayong Lunes na ang mga menor-de-edad o mga 17-anyos at pababa ay hindi papayagang bumisita sa Manila Bay dolomite beach sa gitna ng COVID-19 pandemic.

Nag-isyu si Presidential Spokesperson Harry Roque ng paalaala sa publiko matapos na dumagsa ang napakaraming tao sa artificial white sand area sa bahagi ng Manila Bay ngayong weekend, kabilang na rito ang maliliit na mga bata.

Aniya, ang nangyaring ito ay nagdulot ng alalahanin na maaaring mauwi sa superspreader event sa gitna ng pandemya.

“Ang mga bata, talagang for essentials lang po na dapat lumalabas ng kanilang tahanan. Hindi pa po puwede magpasyal-pasyal ang mga bata,” ani Roque.

Nanawagan din si Roque sa Manila police na tiyakin na ipinatutupad ang health protocols gaya ng social distancing at tamang pagsusuot face mask.

Ang Manila Bay dolomite beach ay nabuong proyekto sa ilalim ng Department of Environment and Natural Resources (DENR).

Una nang sinabi ni DENR Undersecretary Benny Antiporda na ang artificial sand area ay hindi nila isasara sa mga tao.

Gayunman, ayon kay Antiporda, magpapatupad sila ng crowd control, kung saan magde-deploy ng mga karagdagan pang marshalls upang maiwasan ang pagdagsa ng mga tao.

Paliligo o pagtatampisaw sa dolomite beach, delikado — Dermatologist

ni Jasmin Joy Evangelista | October 24, 2021

Nagbabala ang isang doktor laban sa mga sakit na maaaring makuha sa exposure o paliligo sa Manila Bay Dolomite Beach matapos itong buksan sa publiko.

Nitong mga nagdaang araw ay dagsa ang mga bumibisita sa dolomite beach na puno ng crushed dolomite na nagsisilbing parang white sand.

Ayon sa dermatologist na si Dr. Grace Beltran, mapanganib sa kalusugan ang dolomite sand dahil puwede itong magdulot ng sakit sa balat, allergy, at maaari ring sanhi ng sakit sa baga.

Ang Dolomite sand ay gawa sa crystalline silica na maaaring magdulot ng iritasyon sa baga at mauwi sa lung cancer.

''The dolomite sand is crystalline silica kaya puwede kang magkaroon ng irritation doon sa lungs... then eventually can also lead to lung cancer," ani Beltran.

"Aside pa dito kapag ikaw ay naka-ingest accidentally kasi syempre kapag nagsu-swimming ka o naglalangoy-langoy ka na doon, pwede mong ma-ingest yung water doon sa lugar na yun," dagdag niya.

Sa ngayon ay mahigpit na ipinagbabawal ang pagligo sa dolomite beach bagama't marami ang nasita dahil sa pagtampisaw sa tubig.

Samantala, sinabi ng Manila Bay management na isasara ang dolomite beach tuwing Biyernes para sa maintenance nito. Lilimatahan na rin ang pagpapapasok dito upang maiwasan ang paglaganap ng COVID-19.

Ayon kay Jacob Meimban Jr., deputy executive director ng Manila Bay Coordinating Office, nagsasagawa sila ng adjustments tulad nga ng pagpapatupad ng isang araw na maintenance work.

"In the coming days, we will be putting the additional adjustments. Una diyan gusto namin ipaalam sa publiko na magsasarado po kami tuwing Biyernes ng buong araw. Bigyan niyo kami ng isang araw yung dolomite beach dahil sa libo-libong tao pumapasok," aniya.

Manila Dolomite Beach patuloy na dinadagsa

ni Jasmin Joy Evangelista | October 22, 2021

Parami pa nang parami ang pumapasyal sa Manila Baywalk Dolomite Beach kumpara sa mga naunang araw na binuksan ito lalo pa’t marami ang sabik makalabas ng bahay mula nang ilagay ang Metro Manila sa Alert Level 3.

5:30 am pa lang ay binubuksan na ito sa publiko at puwedeng pasyalan hanggang alas sais ng gabi.

Walang entrance fee at pinapayagan maging ang mga bata kaya dinadagsa ito ng mga gustong mamasyal.

Kapansin-pansin lang na kahit may mga nagbabantay na taga-DENR at mga pulis ay hirap nang ipatupad ang physical distancing.

Nagbabala naman si MMDA Chairman Benhur Abalos na maaaring maging super spreader event ito lalo’t may banta pa rin ng COVID-19.

Nakabantay rin ang Philippine Coast Guard lalo’t bawal pa rin ang maligo sa Manila Bay hangga’t hindi pa natatapos ang rehabilitasyon nito.