Manila Dolomite beach, bukas na muli sa publiko ngayong Dis. 28-29

ni Jasmin Joy Evangelista | December 28, 2021

Bukas na muli sa publiko ang Manila Baywalk Dolomite Beach ngayong araw, Disyembre 28, hanggang bukas, Disyembre 29.

Muli itong bubuksan sa January 4, 2022.

May bagong ipinatutupad na sistema kung saan dapat mag-register ng mga bisita sa http://denrncrsys.online para makapasok.

Kailangan magparehistro muna isang araw bago bumisita. Puwede rin ang mga walk-in, pero kailangan nilang sumagot sa mga walk-in forms sa entrance.

Ang mga successful registrants ay makatatanggap ng confirmation email mula sa DENR.

Layon ng online appointment system na ito na maiwasan ang overcrowding sa lugar.

Ipinagbabawal ang pagpasok ng mga batang edad 11 pababa sa dolomite beach.

Ang mga available slot ay ang mga sumusunod:

* 6:30-7:30 a.m.

* 8:00-9:00 a.m.

* 9:30-10:30 a.m.

* 11:00 a.m.-12:00 nn

* 1:30-2:30 p.m.

* 3:00-4:00 p.m.

* 4:30-5:30 p.m.

Para sa mga bibisita, magdala ng vaccination card, magsuot ng face mask, at panatilihin ang social distancing. Bawal magdala ng mga alagang hayop, bawal ang swimming, paninigarilyo, at pagkakalat.

Dahil hindi nakontrol ang dagsa ng tao… Ground commander ng dolomite beach, sinibak

ni Jasmin Joy Evangelista | October 28, 2021

Sinibak sa puwesto ang ground commander ng dolomite beach sa Manila Bay kasunod ng pagdagsa ng mga tao sa lugar, ayon sa Department of Environment and Natural Resources (DENR).

Ayon kay Environment Secretary Roy Cimatu, papalitan ni Reuel Sorilla si Director Jacob Meimban Jr. bilang ground commander ng dolomite beach.

Si Sorilla ay kasalukuyang Director for the Environmental Law Enforcement and Protection Service ng kagawaran.

Giit ni Cimatu, bilang commander ay responsibilidad ni Meimban na bantayan at siguruhing nasusunod ang minimum health protocols sa lugar ngunit bigo ito matapos dumugin ng mga bumibisita rito.

Matatandaang simula nang buksan sa publiko ang dolomite beach ay hindi napigilan ang pagdagsa ng mga tao dahilan upang hindi na masunod ang safety protocols.

Mula Okt. 29-Nob. 3... Manila Bay dolomite beach, isasara – DENR

ni Lolet Abania | October 26, 2021

Isasara ng Department of Environment and Natural Resources (DENR) ang Manila Bay dolomite beach simula Oktubre 29 hanggang Nobyembre 3 bilang pagsunod alinsunod sa Inter-Agency Task Force on COVID-19 advisory upang maiwasan ang hawahan ng COVID-19.

Bukod sa naunang pahayag ng DENR na tuwing Biyernes ay isasara ang Manila Bay dolomite beach para sa patuloy na maintenance nito, ayon kay DENR Undersecretary Jonas Leones, magpapatupad sila ng crowd control measures sa naturang beach para mapigilan ang posibleng pagkalat ng COVID-19 infection.

Aniya, kabilang dito ang tinatawag na “rotational and cinema approach” kung saan ang mga bibisita sa lugar ay bibigyan lamang ng kaukulang oras para manatili sa nasabing beach.

“Gagawin natin for our purposes we will just be limiting the number of people to 4,000 to 5,000 in the dolomite area at a given time,” sabi ni Leones sa isang interview ng mga reporter.

Ayon pa kay Leones, ang mga bata na below 12-year-old o edad 11 pababa ay ipinagbabawal na pumasok sa dolomite beach.

Binanggit naman ni Leones na habang ang mga awtoridad ay walang problema sa paglimita ng mga tao tuwing weekdays, mayroon namang pagdagsa ng mga bumibisita tuwing weekends.

“Hindi na bumababa sa 18,000 and above,” wika ni Leones.

Sa taya naman ng Manila Police District nasa 65,000 visitors sa kabuuan ang nagtungo sa Manila Bay dolomite beach nitong Linggo.