DENR: Muling pagbubukas ng Manila Dolomite Beach sa Hunyo 3 na

ni Lolet Abania | May 17, 2022

Iniurong ng Department of Environment and Natural Resources (DENR) ang muling pagbubukas ng Manila Baywalk Dolomite Beach mula sa dating Mayo 20 ay ginawang Hunyo 3, 2022.

Batay sa ulat, ipinagpaliban ng DENR ang reopening nito ng dalawang linggo dahil sa ilang imprastruktura ang hindi pa natatapos sa lugar.

Gayundin ayon sa report, kailangan pa ring linisin ang lugar na malapit sa US Embassy sa Manila. Bukod dito, sinabi ng DENR na nais tiyakin ng ahensiya ang kalinisan at kaligtasan ng tubig sa Manila Bay bago ang muling pagbubukas nito.

Matatandaang unang binuksan ang dolomite beach sa publiko noong Setyembre 2022. Maraming mga environmental groups ang bumatikos sa naturang proyekto dahil anila, sa epektong idudulot sa kalusugan ng crushed dolomite na ginamit bilang “white sands.”

Subalit, dinepensahan ng DENR ang kanilang Manila Baywalk Dolomite Beach, paliwanag ng ahensiya kinonsulta nila ang mga concerned agencies at mga eksperto kaugnay sa naturang proyekto.

Dolomite beach reopening, mahigpit na health protocols, ipatutupad — DENR

ni Lolet Abania | March 18, 2022

Mahigpit na ipapatupad ang minimum public health standards kapag muling binuksan ang Manila Dolomite Beach sa publiko, ayon sa Department of Environment and Natural Resources (DENR).

Sa Laging Handa press briefing ngayong Biyernes, sinabi ni DENR officer-in-charge Jim Sampulna na susunod ang ahensiya sa mga guidelines na inisyu ng pandemic task force ng bansa para tiyakin na ipinatutupad ang public health safety sa man-made beach.

Kabilang dito ang pagsusuot ng face masks, social distancing, at paglimita sa mga papayagang bumisita sa partikular na oras.

“We refer to the IATF guidelines. Social distancing, maglalagay ng (wearing of) face mask,” sabi ni Sampulna.

“’Wag natin masyadong punuin ‘yun. Kasi minsan na-compromise ang social distancing ‘pag hindi natin na-control ang mga pumapasok. Tingnan natin ang capacity ng area na hindi naman nagkukumpulan ang mga tao,” saad ng opisyal.

Una nang iniutos ng DENR na isara ang Dolomite beach para magbigay-daan sa rehabilitasyon nito. Nakatakda namang muli itong buksan matapos ang Holy Week.

Personal na ring binisita ni Sampulna ngayong umaga ang lugar para i-check ang ginagawang rehabilitasyon nito.

Nais naman ng DENR na gawin ang white sand beach na “swimmable” bago magtapos ang Duterte administration, kung saan isang scenario na posible lamang kung ang kanilang water quality standard ay umabot sa 100 most probable number (mpn) kada 100 milliliters (mL).

Sa latest data mula sa Manila Bay Coordinating Office (MBCO) na ipinakita, ang coliform level sa Baywalk area ay kapansin-pansing nabawasan mula sa average ng 21,100 mpn kada 100 ml sa ikatlong quarter ng 2021 mula 5.75 million mpn kada 100 mL noong 2019.

Ayon kay Sampulna, ang DENR ay “malapit” na sa target dahil aniya, sa patuloy na rehabilitation efforts na isinasagawa kabilang na ang inspeksyon sa kalapit na mga establisimyento para alamin kung sumusunod ang mga ito sa water waste management compliance.

“Ang ating mpn from billions ay malapit-lapit na tayo sa target na pamantayan. Itong 100 (mpn),” ani Sampulna.

Aniya pa, target mh DENR na tapusin ang expansion ng man-made beach sa Abril.

Dolomite beach project, tuloy pa rin — bagong DENR chief

ni Lolet Abania | February 26, 2022

Ipagpapatuloy pa rin ng bagong kalihim ng Department of Environment and Natural Resources (DENR) na si Secretary Jim Sampulna ang nasimulang Manila Bay dolomite beach project sa ilalim ng kanyang termino.

Sa isang statement na inilabas ngayong Sabado, sinabi ni Sampulna na ito ay isang commitment ng ahensiya kay Pangulong Rodrigo Duterte.

“We can now see the beauty of Manila Bay. Maybe only around 500-600 meters of the Manila Bay is yet to be laid down with dolomite sand. I intend to continue that project because that is our commitment to our dear President,” ani Sampulna.

Matatandaang ipinahayag ni Pangulong Duterte sa kanyang huling State of the Nation Address (SONA) na ipagpapatuloy pa rin ng gobyerno ang pagsasaayos ng dolomite beach, sa kabila ng mga isyu sa environment at concerns ng mga health experts hinggil sa kaligtasan ng mga mamamayan.

Una nang nagbabala ang Department of Health (DOH) na ang crushed o dinurog na dolomite ay maaaring maging dahilan ng mga respiratory problems, lalo na kapag ito ay nasinghot. Binuksan ang nasabing beach simula noong Disyembre, kung saan ipinatutupad ang mga protocols sa lugar dahil na rin sa COVID-19 pandemic.

Si Sampulna ang pumalit kay dating DENR Secretary Roy Cimatu na nag-resign noong nakaraang linggo dahil sa health reasons.

Ayon pa kay Sampulna, magpapatuloy din ang rehabilitation projects sa Boracay beach habang tuloy ang suporta niya sa pagbabawal sa mga single-use plastics.

“We need some legislation for that (ban on single-use plastic). Although there is no legislation on that yet, we are already advocating for it,” sabi ni Sampulna.

Ipinagtanggol din ni Sampulna ang desisyon na i-lift ang 4-year ban na itinakda ng administrasyon hinggil sa open-pit mining na aniya pa, may ipinatutupad na measures na naaayon sa batas para ito ay i-regulate.

Hinimok naman ng opisyal ang publiko na huwag iboto ang mga kandidato na aniya, “destroy the environment.” “They should be environment-friendly,” saad ni Sampulna.