Patung-patong na kaso, isinampa — DOJ.. Arrest warrant kay Teves, next

ni Mai Ancheta @News | August 27, 2023

Patung-patong na kaso ang isinampa ng Department of Justice kay dating Negros Oriental Congressman Arnolfo Teves, Jr. kaugnay sa pagkamatay ni dating Governor Roel Degamo at siyam na iba pa noong March 4, 2023.

Inanunsyo ni DOJ Spokesman Mico Clavano nitong Sabado na naisampa na sa Manila Regional Trial Court noong August 18, 2023 ang mga kasong murder, frustrated murder at attempted murder laban kay Teves.

Sinabi ni Clavano na ngayong naisampa na ang kaso sa korte, hihintayin na lamang nila ang paglabas ng warrant of arrest laban kay Teves.

“'Yung Degamo case ay nai-file na natin sa Manila, 'yun ay nasa korte na at hinihintay na lang natin ang warrant of arrest. Alam naman ho natin 'yung facts nu'ng kaso na 'yun dahil napaka-publicized nu'ng kaso na 'yun."

Itinanggi naman ni Teves na sangkot siya sa asasinasyon ni Degamo dahil nasa ibang bansa umano siya nang maganap ang pagpatay sa dating gobernador.

Nauna nang idineklara ng Anti-Terrorism Council si Teves, kasama ang kanyang kapatid na si Pryde Henry Teves at 11 iba pa bilang mga terorista at binansagang Teves terror group.

Nauna nang sinampahan ng kasong murder si Teves sa Bayawan, Negros Oriental dahil sa mga nangyaring krimen noong 2019 at plano ng DOJ na ipalipat ang kaso sa Maynila upang lahat ng pagdinig ay sa Maynila na gagawin.

Si Teves ay kasalukuyang nasa labas ng Pilipinas.

Sa paglabas-masok sa kulungan.. Jad Dera, 6 NBI personnel, tutuluyan — DOJ

ni Mylene Alfonso @News | July 12, 2023

Inanunsyo ng Department of Justice (DOJ) prosecutors, ang pagsasampa ng kaso laban sa kontrobersiyal na inmate na si Jad Dera, security officer at limang Job Order (JO) employee ng National Bureau of Investigation (NBI) kaugnay sa mga hindi awtorisadong paglabas sa detention facility.

Ayon sa DOJ, kabilang sa kakasuhan bukod kay Dera, sina JO personnel Arnel Ganzon, Diana Rose Novelozo, Lee Eric Loreto, King Jeroh Martin, at Pepe Piedad, Jr., dahil sa paglabag sa Article 156 ng Revised Penal Code, may kaugnayan sa pagpapalabas ng mga bilanggo sa kulungan.

Nabatid na kinasuhan din si Randy Godoy, NBI Security Officer II, ng paglabag sa Article 223 ng Revised Penal Code.

Nabatid sa DOJ na ang kasong kriminal ay isasampa sa Metropolitan Trial Court ng Manila City.

Base sa isinagawang ebalwasyon ng mga ebidensiya, napatunayan ng prosecutors na may sapat na basehan para kasuhan ang mga respondents.

Naestablisa ng DOJ na inasistehan nina Godoy, Ganzon, Novelozo, Loreto, Martin, at Piedad si Dera sa paglabas-masok sa kulungan.

Matatandaang inaresto si Dera habang kasama nito ang anim na NBI security personnel sa labas ng detention cell habang pabalik na sa NBI detention cell.

'NBI live show', pinalagan.. Sumasayaw nang sexy sa noontime shows, ipagbawal din — Remulla

ni Madel Moratillo @News | July 11, 2023

Umaasa si Justice Secretary Jesus Crispin 'Boying' Remulla na mabago na ang kultura ng mga Pinoy na kahit mga bata ay ginagawang bikini contestant at pinagsasayaw kahit sa mga noontime show.

Giit ni Remulla, may problema sa bansa at ang ganitong kultura ay dapat maalis na.

Ang pahayag ng kalihim ay kasunod ng labis na pagkadismaya sa kontrobersiyang kinasangkutan ng National Bureau of Investigation na may sexy performers sa isang event.

“Marahil dapat tingnan natin 'yung kulturang 'yan ng mga Pilipino. Sana mga noontime shows, wala nang sumasayaw-sayaw na mga bata. Pati minsan mga batang musmos pinapasayaw-sayaw nila, ginagawang bikini contestant, pinagsusuot ng mga 'di dapat suotin. 'Yung ating kultura bilang Pilipino, dapat ibahin natin. Hindi lang po ito sa NBI kundi sa ating lahat mismo. May problema po bansa natin,” pahayag ni Remulla.

Samantala, tukoy na ng Department of Justice ang opisyal ng NBI na nag-imbita ng sexy dancers sa command conference ng ahensya.

Una rito, nagviral sa social media ang video kung saan may makikitang mga babae na nagsasayaw sa isang event ng NBI.

Tumanggi naman muna si Remulla na pangalanan ang nasabing opisyal. Bagama't kinumpirma niyang nagtangkang lumapit sa kanya ang nasabing opisyal pero inatasan niya itong magpaliwanag “in paper”.

Ayon sa kalihim, tatlong performers umano ang kinuha para sa nasabing event. Giit ng DOJ secretary, walang pera ng gobyerno na ginamit para ibayad sa nasabing dancers.

Ang pera ay galing sa aniya'y “old men” na akala ay mga “adolescent” pa sila.

Ayon sa kalihim, nakakahiya ang pangyayari at hindi niya ito nagustuhan. Dapat ay magsilbing aral aniya ito sa lahat.