Mga edad 12-15, ‘di pa puwedeng bakunahan — DOH

ni Ronalyn Seminiano Reonico | May 27, 2021

Hindi pa kasama sa COVID-19 vaccination program ng pamahalaan ang mga edad 12 hanggang 15 dahil sa limitadong suplay ng bakuna, ayon sa Department of Health (DOH).

Ayon kay Health Secretary Francisco Duque III, habang pinag-aaralan pa ang pagbabakuna sa mga kabataan, nananatiling ang mga health workers, senior citizens at persons with comorbidities ang prayoridad ng pamahalaan.

Saad pa ni Duque, “We cannot include them yet [in the vaccination drive] because our supply of vaccines is limited and they are not included in the high-risk group.

“We need to follow our prioritization formula. We cannot deviate because if you expand the coverage to more individuals, we cannot achieve the protection needed by the most vulnerable groups.”

Samantala, pinag-aaralan na ng Food and Drug Administration (FDA) ang pagbibigay ng emergency use authorization sa pagturok ng Pfizer-BioNTech COVID-19 vaccine sa mga edad 12 hanggang 15.

Pinoy na nagpositibo sa Indian COVID variant, pumanaw na

ni Ronalyn Seminiano Reonico | May 24, 2021

Pumanaw na ang Filipino seafarer na nagpositibo sa Indian COVID-19 variant noong nakaraang linggo, ayon sa Department of Health (DOH) ngayong Lunes.

Ayon kay Health Undersecretary Maria Rosario Vergeire, ang naturang seafarer ay residente ng Parañaque City at namatay sa ospital sa Manila.

Sa siyam na MV Athens crew members na nagpositibo sa B.1.617 variant, 4 ang na-confine sa ospital habang nakarekober naman ang iba pa.

Ayon kay Vergeire, “‘Yung sa apat na na-confine, isa ay namatay last week. I think that was Friday. Tatlo ay naka-recover at maayos na ang kanilang estado.”

Samantala, bukod sa mga crew ng MV Athens, 3 pang overseas Filipino workers ang nagpositibo sa Indian variant na naka-recover, ayon kay Vergeire.

Publiko naalarma… Brand ng COVID-19 vaccines, ipapaalam pa rin bago iturok — DOH

ni Lolet Abania | May 20, 2021

Dahil sa pangamba ng publiko sa unang lumabas na pahayag na hindi na ipapaalam sa mga vaccination sites ang brand ng COVID-19 na ibabakuna upang maiwasan ang pagiging mapili ng mga tatanggap nito, nilinaw ng Department of Health na ipapaalam pa rin naman kung anong brand ng COVID-19 vaccine ang ituturok bago mismo ang pagbabakuna.

“'Pag sinabi naman na hindi natin ia-announce ‘yung brand, we are not going to announce the brand as of [that] day,” ani DOH Undersecretary Maria Rosario Vergeire sa isang interview ngayong Huwebes.

“Siyempre, bago ‘yan ibakuna sa inyo, sasabihin ano ‘yung ibibigay,” sabi naman ni Dr. Gloria Balboa, ang DOH regional director sa Metro Manila sa isa ring interview ngayong araw.

Ayon sa mga opisyal, ang bagong strategy na ito ay bahagi ng kanilang solusyon para maiwasan ang pagdagsa ng mga tao sa vaccination sites. Anila, ito ang naging desisyon ng DOH makaraang dumugin ang mga vaccination sites sa Parañaque at Manila nito lamang linggo dahil nabatid ng mga tatanggap ng bakuna na Pfizer vaccines ang ituturok sa kanila.

Matapos ang naturang insidente, sinabi ng ahensiya na ang available na brand ng vaccines ay hindi na iaanunsiyo sa publiko bago pa ang pagbabakuna.

Paliwanag ng DOH, sakali naman na tumanggi sa vaccination dahil sa mas gusto nila ang ibang brand na iturok sa kanila, babalik sila sa dulo ng linya o pipila ulit sila sa hulihan ng pagbabakuna.

“All of these vaccines that are in the country are going to protect them,” diin ni Vergeire.

“Wala naman pong isang mas magaling o magiging mas epektibo para sa kanila.”

Sinabi pa ni Vergerie na nagsasagawa na rin ang DOH ng masidhing information campaign para mabigyang pansin ang isyu tungkol sa COVID-19 vaccines.

Matatandaang hinimok ni Senator Risa Hontiveros ang DOH na irekonsidera ang kanilang polisiya na non-disclosure ng brand ng bakuna bago ang pagbibigay nito dahil lalong magdudulot ito ng pagdududa sa publiko sa vaccination program ng gobyerno.

Subalit sa isang statement, ayon sa DOH, “Not announcing what brand will be available in inoculation sites will not take away the right of individuals to be informed of the vaccine they are taking.”

“The vaccination process entails on-site vaccine education, proper recording using vaccination cards, and monitoring for Adverse Events Following Immunization,” dagdag pang pahayag ng ahensiya.