PNP, sinimulan na ang pagde-deploy sa mga police nurse na tutulong sa mga ospital sa bansa

ni Jasmin Joy Evangelista | October 11, 2021

Pinangunahan ni PNP Chief PGen. Guillermo Eleazar ang isinagawang send-off ceremony ng unang batch ng nurses mula sa PNP Health service sa Camp Crame, kahapon.

Sila ang nakatakdang tumulong sa mga ospital sa pagtugon sa COVID-19 pandemic na patuloy na kinahaharap ng bansa.

Kasabay nito, nilagdaan din kahapon ang kasunduan sa pagitan ng PNP at Department of Health para pagtibayin ang pagtutulungan ng dalawang ahensiya sa paglaban sa banta ng COVID-19.

Ayon kay DOH-NCR Director Gloria J Balboa, may kakulangan sa manpower ng mga ospital para tumugon sa mga pangangailangan ng mga Covid patients, kaya malaki ang kanilang pasasalamat sa PNP.

Sinabi naman ni Eleazar na laging handa ang PNP na tumulong sa mga programang pangkalusugan ng pamahalaan.

Ang unang batch ng mga nurse ay ide-deploy sa Cardinal Santos Medical Center.

Paglabas ng mga bata sa Pasko, posible — DOH

ni Jasmin Joy Evangelista | October 10, 2021

May posibilidad umanong payagan ng pamahalaan na makalabas ang mga bata sa panahon ng Kapaskuhan, ayon sa Department of Health.

Ito ay kung magtutuloy-tuloy ang pagbaba ng mga kaso ng COVID-19 sa bansa.

Kailangan daw na magpatuloy ang pagdating ng sapat na suplay ng COVID-19 vaccine at mabakunahan na rin ang mga menor de edad na may comorbidity, ayon kay Health Undersecretary Maria Rosario Vergeire.

Sisimulan na ngayong buwan ang pagbabakuna sa mga indibidwal na nasa edad 12 hanggang 17, pero priority ang mga may comorbidity o dati nang iniindang sakit.

Pero aniya, desisyon pa rin daw ito ng inter-agency task force (IATF) on COVID-19 at mga eksperto, sabi ng opisyal.

"But looking at the case data, tinitingnan natin, kung mauumipasahan na rin ang dose with comorbidity sa mga kabataan, kung atin pong magtuloy-tuloy at mag-stablize and ating supplies, mayroon naman pong posibilidad," ani Vergeire.

“Kung magtutuloy-tuloy po iyan at maipagpapatuloy po natin ang pagkontrol nitong transmission ng sakit na ito, sana po tayo po ay lahat ay nagho-hope that by Christmas time, magkakaroon po tayo ng mas maluwag na classification and restrictions sa ating mga kababayan,” dagdag niya.

One Hospital Command Center transactions bawas na dahil sa pagbaba ng COVID cases

ni Jasmin Joy Evangelista | October 7, 2021

Ramdam na umano ang pagbaba ng mga kaso sa Metro Manila base sa naitatalang transaksyon ng One Hospital Command Center, ayon kay Health Sec. Francisco Duque.

“Ang mga araw-araw na transaksyon na tinatanggap ng One Hospital Command ay talagang bumababa na at nagkaroon po ng average na mga 284 transactions kada araw," ani Duque.

"At ang pinakamataas po na amin pong naobserbahan na bilang ng transaksyon ay 4 — 547 noon pong Agosto, ika-31 ng Agosto. But of course, dito nakita na lang dito inumpisahan sa September, 367 at makikita po natin as of October 6 ay nasa 208 transactions ang natanggap ng One Hospital Command."

Mas mababa rin daw ng 25% ang recorded cases ngayong linggo kumpara noong nakaraang linggo, dagdag ni Duque.

"Positivity rate ng atin pong mga kaso ay bumaba na rin po to 18% of all cases or all tests ang positivity rate ay nasa 18%. Nanggaling po ito sa mataas umabot hanggang 27%. So again . . . ito po ay senyal na talagang nag-umpisa na po ang pagbaba ng atin pong mga kaso," mungkahi niya.

Matatandaang una nang inihayag ng DOH na posibleng "artificial" o hindi totoo na bumababa na ang mga kaso ng COVID-19 dahil sa ilang factor, tulad ng pagbaba ng kapasidad ng mga testing laboratory nitong mga nakaraang araw.