DOH, nag-ulat ng 4 bagong disgrasya kaugnay ng paputok

ni Eli San Miguel - Trainee @News | December 24, 2023

Iniulat ng Department of Health (DOH) ang apat na bagong disgrasya kaugnay ng paputok ngayong Linggo, na nagdadala ng kabuuang bilang sa 12 nitong holiday season.

Ayon sa Fireworks-Related Injury Surveillance (FWRI), dalawang batang lalaki na may edad na 11 at 17 ang nagkaroon ng pinsala mula sa paggamit ng ipinagbabawal na paputok na tinatawag na "piccolo at boga."

Naitala rin ang dalawa pang kaso, isang 23-anyos na lalaki at isang 49-anyos na babae na gumamit ng "kwitis."

Kaya’t patuloy na hinihimok ng DOH ang publiko na ipagdiwang ang mga holiday gamit ang mga pampublikong fireworks display na inoorganisa ng lokal na mga lider at negosyo sa halip na gamitin ang mga ito nang personal.

Bilang ng disgrasya dahil sa paputok, tumaas sa 8

ni Eli San Miguel - Trainee @News | December 23, 2023

Inirerekomenda ng Department of Health (DOH) sa mga magulang na pigilan ang kanilang mga anak sa paggamit ng paputok matapos tumaas ang bilang ng bagong kaso ng disgrasya kaugnay ng paputok ilang araw bago ang pagdiriwang ng Pasko at Bagong Taon.

Ayon sa ulat ng DOH, apat na karagdagang kaso ang naitala mula Disyembre 22 hanggang 23. Nagdulot ito ng kabuuang bilang ng nasaktan na umabot sa walong indibidwal.

"The new cases are all boys aged 8 to 12 years, who were victims of both illegal (3) and legal (1) fireworks," ayon sa ahensya ngayong Sabado ng umaga.

"Of the total number of cases, the fireworks involved are Boga (3), Piccolo (2), 5-star (1), Baby Dynamite (1), and Goodbye Philippines (1)," dagdag pa nito.

DOH Sec. Ted, bigo sa CA

ni Mylene Alfonso @News | September 27, 2023

Bigong makumpirma ng Commission on Appointments (CA) ang ad interim appointment ni Department of Health Secretary Teodoro Javier 'Ted' Herbosa dahil sa kawalan ng oras.

Ito ang kinumpirma ni Senate President Juan Miguel Zubiri, chairman ng CA, subalit maaari namang talakayin ang appointment ni Herbosa kapag nagpatuloy ang sesyon ng Kongreso sa Nobyembre.

Sinabi rin ni Sen. Christopher 'Bong' Go, nanguna sa pagdinig ng CA committee, na kulang na sila sa oras para talakayin ang ad interim appointment ni Herbosa.

Dahil dito, kailangang muling italaga ni Pangulong Ferdinand Marcos, Jr., si Herbosa dahil magtatapos ang sesyon ng Kongreso sa September 30.

Sa panayam, tumanggi si Go na sabihing na-bypass o na-defer ang appointment ni Herbosa at sinabi lamang na sinuspinde ang pagdinig dahil maraming miyembro ang gustong magtanong kay Herbosa.

Samantala, nanawagan ang Alliance of Health Workers (AHW) sa CA na ibasura ang appointment ni Herbosa bilang pinuno ng DOH.

“With Herbosa in DOH for three months now as DOH appointed Secretary, we see no change. Health workers are still overworked and underpaid, the much needed and long delayed health emergency allowance is not yet provided. Health workers’ miserable situation remains,” ani Robert Mendoza, AHW national president.

Ayon sa AHW, bigo si Herbosa na idepensa ang P13.9 bilyong ibinawas sa panukalang 2024 budget sa DOH.

Binanggit ng grupo ang P10 bilyong budget cut sa 69 ospital na pinamamahalaan ng DOH, ang P1.7 bilyong bawas-pondo sa specialty hospitals at ang P2 bilyong budget cut sa Philippine General Hospital (PGH).

Kinuwestiyon din ng grupo ang P8 milyong bawas sa Philippine National Aids Council, at P148 milyon naman sa National Nutrition Council.