29 bagong kaso ng Omicron variant

ni Lolet Abania | January 6, 2022

Nakapagtala ang Department of Health (DOH) ngayong Huwebes ng 29 dagdag na kaso ng mas nakahahawang Omicron variant ng COVID-19, kaya umabot na sa kabuuang 43 ang kumpirmadong kaso nito sa bansa.

Kabilang sa bagong Omicron case, ayon sa DOH, 10 ay mga returning overseas Filipinos (ROFs) habang 19 ang local cases na ang kanilang mga address ay nasa National Capital Region (NCR). Samantala, 14 sa local cases ay nananatiling active, tatlo ang nakarekober na, habang dalawa ay bineberipika pa.

“The DOH is verifying the test results and health status of all passengers of these flights to determine if there are other confirmed cases or passengers who became symptomatic after arrival,” batay sa statement ng DOH.

Ayon sa DOH, mayroong 48 samples na kanilang nakuha para sa latest run sequenced nitong Enero 2, 2022. Paniwala ng mga DOH officials na ang Omicron ang dahilan ng biglaang pagtaas ng COVID-19 cases sa bansa.

Kaugnay nito, nakapagtala ang DOH ng 18 dagdag na kaso ng Delta variant, kaya umabot sa kabuuang 8,497.

Walo rito ay mga ROFs habang 10 ay local cases na ang mga address ay nasa NCR. Dahil dito, muling nanawagan ang DOH sa mga eligible individuals, partikular ang mga senior citizens, may mga comorbidities, at mga kabataang edad 12 hanggang 17 na magpabakuna kontra-COVID-19.

“Vaccines are still our best defense and proven to be safe, effective, and free. Let’s not be agents of transmission and prevent further spread of the virus as more transmission means more mutations,” pahayag ng DOH.

“At the earliest signs of symptoms, remember to isolate immediately and do the right test at the right time… Let’s keep our guards on for Omicron,” dagdag ng ahensiya.

Temporary shortage ng paracetamol, nararanasan sa ilang lugar – PHAP

ni Lolet Abania | January 4, 2022

Nagpahayag ang Pharmaceutical and Healthcare Association of the Philippines (PHAP) na nakararanas sa ngayon ng temporary shortage ng partikular na brands ng paracetamol sa ilang mga lugar sa bansa.

Ito ang naging tugon ng pharmaceutical group matapos ang statement ng Department of Health (DOH) na mayrooong sapat na supply ng anti-flu pills sa bansa.

“With the heightened vigilance against the Omicron variant, and a number of people getting sick due to various reasons, we are experiencing a temporary shortage of certain brands of paracetamol in some areas,” ani PHAP sa isang statement.

Ayon sa grupo, ang temporary shortage para sa partikular na brands ay kanilang na-monitor sa Metro Manila.

Gayunman, ang mga pasyente ay maaaring humingi sa kanilang mga doktor at pharmacists ng mga alternatibo para rito anila, “several alternatives if these brands are unavailable.”

Ipinaliwanag naman ng PHAP na ang paracetamol ay available sa iba’t ibang dosage forms, bisa at lakas nito, kombinasyon ng produkto, at nasa ilalim ng ilang daang brands.

“Alternative analgesics are also available,” sabi pa ng grupo. “At the moment, we have enough supply of analgesics available in our inventory.”

Umapela naman ang DOH sa publiko na huwag i-hoard o mag-imbak ng naturang medisina at hindi dapat na mag- panic-buying dahil patuloy ang ahensiya na nakikipag-ugnayan sa ibang ahensiya, gaya ng Department of Trade and Industry (DTI) at Food and Drug Administration (FDA) para tiyakin ang kinakailangang health products na bahagi ng COVID-19 response ng gobyerno.

“We also call on them to buy only the needed number, and not overstock, because medicines have a limited shelf life or expiration date, and to consider other patients who may need them more,” giit ng PHAP.

Una nang sinabi ni DTI Secretary Mon Lopez na walang kakulangan ng paracetamol sa bansa.

“Since the pandemic began, PHAP members have been working tirelessly to make both COVID and non-COVID medicines available to Filipinos during these challenging times,” ayon sa grupo.

“We are also closely coordinating with the government on pharmaceutical security, and providing recommendations to ensure the uninterrupted supply of medicines in the country,” dagdag pa nila.

Mister ng ikaapat na kaso ng Omicron, nagpositibo sa COVID-19

ni Lolet Abania | December 28, 2021

Nagpositibo rin sa test sa COVID-19 ang mister ng iniulat na ikaapat na kaso ng Omicron variant habang nakatakdang isailalim ito sa genome sequencing, ayon sa Department of Health (DOH).

Sinabi ni DOH Undersecretary Maria Rosario Vergeire na na-traced na nila ang mga naging close contacts ng 38-anyos na babae na nanggaling sa United States at dumating sa Ninoy Aquino International Airport noong Disyembre 10.

“Her husband turned positive also. He’s currently in the isolation facility,” ani Vergeire sa isang interview ngayong Martes.

Ayon kay Vergeire, nakakolekta sila ng samples mula sa asawang lalaki at isinailalim ito sa genome sequencing, kung saan maaaring lumabas ang resulta matapos ang 24 hanggang 48 oras.

“What we are challenged with right now would be the submissions of laboratories in our epidemiology and surveillance units to submit immediately these samples to the Philippine Genome Center so we could immediately process and release the results at once,” paliwanag ni Vergeire.

Batay sa DOH, noong Disyembre 25, lumabas ang positibong resulta para sa Omicron variant ng naturang traveler at nakaiskedyul namang muli siyang i-test ng Martes.

Nakumpleto na rin ng traveler ang dalawang doses ng Moderna COVID-19 vaccine. Lumabas na rin mula sa isolation facility noong Biyernes at sa ngayon ay naka-home quarantine na habang patuloy siyang mino-monitor.

Sinabi pa ni Vergeire na ang pamilya ng traveler at mga naging close contacts sa bahay ay sumailalim na rin sa isolation.

Samantala, sinusubukan pa rin ng DOH na idetermina pa ang mga nakasalamuhang mga pasahero ng nasabing traveler sa Philippine Airlines flight PR 127.

“We are going to apply the epidemiological definition of close contact in terms of riding a plane—that would be four seats in front, four seats beside, and four seats at the back,” sabi ni Vergeire.

Sa hiwalay naman na interview, ayon kay Vergeire ang lahat ng apat na Omicron cases sa bansa ay “mild” symptoms lamang.

“’Yung isa nagkaroon ng cough pero after 2 or 3 days, was resolved. Itong latest natin na detection nagkaroon ng scratchy throat and parang colds, then after about 2 or 3 days also has resolved,” ani opisyal.

Gayunman, nilinaw ni Vergeire na hindi pa ito maituturing na conclusive dahil apat pa lamang na pasyente na tinamaan ng Omicron variant sa bansa ang kanilang inoobserbahan at wala pa silang nakikitang ibang katangian na mayroon sa Omicron variant.