DOH kinumpirma ang Omicron variant sa Ilocos Norte

ni Jasmin Joy Evangelista | January 17, 2022

Kinumpirma ng Department of Health (DOH) ang detection ng Omicron variant sa Ilocos Norte, ayon kay Governor Matthew Marcos Manotoc sa kanyang Facebook post nitong Linggo.

“The DOH just confirmed our longtime suspicions that the Omicron variant is present in Ilocos Norte,” ani Manotoc.

Sa nakalipas ng dalawang linggo, ang bilang ng kaso ng COVID-19 na naitala ng probinsiya ay umabot na sa 7,830 percent, mula sa 13 cases noong December 30, 2021, tumalon ito sa 1,031 cases nito lamang Sabado, January 15, batay sa datos ng provincial government.

Hindi na nagbigay pa ng ibang detalye ang gobernadora hinggil dito.

Sinabi rin ni Manotoc na walang dahilan upang mag-panic at overreact dahil karamihan sa mga residente ng Ilocos Norte ay bakunado na.

“Omicron is milder, and we now know much more about the virus, especially the safety measures that work,” pahayag ng gobernador.

Aniya pa, hindi siya magpapatupad ng “wide-scale, hard lockdown like before.”

Ang Ilocos Norte ay nasa ilalim ng COVID-19 Alert Level 3 hanggang January 31.

“We will dance with, and live with, the virus and we look forward to it becoming an endemic as many scientists say. Life shall go on,” dagdag pa ni Manotoc.

Community transmission ng Omicron variant, nararanasan na sa NCR — DOH

ni Lolet Abania | January 15, 2022

Ipinahayag ng Department of Health (DOH) na nakararanas na ngayon ang National Capital Region ng community transmission ng mas nakahahawang COVID-19 Omicron variant.

Sa isang televised public briefing ngayong Sabado, sinabi ni DOH Undersecretary Maria Rosario Vergeire na may local cases na ng variant of concern ang kanilang na-detect sa Metro Manila.

Ayon sa World Health Organization (WHO), “Community transmission happens when connections between local infections could no longer be established through the positive test results of routine sampling.”

Noong nakaraang linggo, isang eksperto ang nagsabi na ang Omicron’s community transmission ay nangyayari na sa bansa.

“Dito po sa National Capital Region, we are seeing the community transmission… Nitong Omicron variant. Bagama’t hindi po nakakahabol ang ating genome sequencing, we already have determined that there are local cases already,” paliwanag ni Vergeire.

“Sa nakikita nating trend ngayon, ito po ’yung characteristic talaga ng Omicron variant, na mabilis na pagkalat, ’yung very steep rise in the number of cases… And doubling time po na every 2 days,” ani pa ni Vergeire.

Ayon kay Vergeire, ang daily cases sa Metro Manila sa nakalipas na linggo ay nag-average ng tinatayang 17,124, habang aniya, higit sa doble ito ng 6,500 average na bilang ng kaso ng mas naunang nakaraang linggo.

Gayundin aniya, ang rehiyon ay may tinatayang 149,000 active COVID-19 infections, na halos kalahati ng kabuuang bilang ng aktibong kaso sa buong bansa.

Sinabi pa ng opisyal, nakikitaan na rin nila ng pagtaas ng mga bagong kaso sa ibang mga rehiyon, na maaaring dulot ng Omicron variant.

Bukod sa Metro Manila, ang Calabarzon, Central Luzon, Western Visayas, Eastern Visayas, Bicol Region ay kinakikitaan nila ng pagtaas in terms ng 2-week growth rate.

Ayon pa kay Vergeire, kapag nagpatuloy ang ganitong trend, posibleng dumating ang oras na palitan na ng Omicron strain ang Delta bilang isang dominant variant sa bansa.

DOH magpapamigay ng COVID-19 home care kit — Duque

ni Jasmin Joy Evangelista | January 15, 2022

Magpapamigay ng COVID-19 home care kit ang Department of Health para sa Covid patients, ayon sa ahensiya nitong Biyernes.

Ang “Kalinga Kit” ay maglalaman ng limang pirasong face masks, alcohol, thermometer, paracetamol, at lagundi, ayon kay DOH Secretary Francisco Duque III.

“We have already close to 35,000 put together so we’ll start distributing them. But we’re also asking well-meaning companies to help us, to co-brand DOH with them to provide home kits,” pahayag ni Duque sa isang interview.

Noong April 2021, sinabi ng ahensiya na sila ay nagde-develop ng home care package para sa COVID-19 patients, na magkakaroon ng financing mechanism.

Ang Philippine Health Insurance Corp. ay mayroong COVID-19 Home Isolation Benefit Package, na puwedeng i-avail ng asymptomatic at mild cases.

Mayroong coverage ang serbisyong ito na nagkakahalagang P5,917 per claim at may kasamang minimum 10 days consultations,

daily monitoring ng mga pasyente sa pamamagitan ng teleconsultation, at provision ng home isolation kit.

Kabilang din sa package ang patient education and referral sa higher-level faclity, kung kinakailangan.

Samantala, sinabi rin ni Duque na gumagawa na sila ng aksiyon upang mapababa ang presyo ng COVID-19 tests.

“We’ll review again because we need to scope the market. We will see more and more players, testing kit manufacturers in the market. I’m sure this is going to push the prices down,” aniya.