Mga LGU namamahagi na ng COVID-19 home care kits

ni Jasmin Joy Evangelista | January 22, 2022

Namahagi na ang ilang local government unit (LGU) at Department of Health ng mga COVID-19 home care kits nitong Biyernes.

Laman ng mga kit ang ilang gamot gaya ng paracetamol, vitamins, sabon, mask, alcohol, at iba pang "basic symptomatic treatment."

Sa Bacoor, namamahagi na ang local government ng "Kalinga Kits" sa tulong ng Southern Tagalog Regional Hospital.

Sa Quezon City naman ay araw-araw lumalabas ang mga health official para magpadala ng health kits. Dapat lang ipaalam sa Barangay Health Emergency Response Team ang positibong resulta para makakuha ng ayudang pagkain at health kit.

Sa Malabon naman, puwedeng makakuha ng "Kalingang Malabonian Kit" kahit hindi nagpositibo basta't close contact na kailangang ma-quarantine.

Samantala, nagpaalala naman ang DOH hinggil sa paglalagay ng prescription medicine sa home care kit na ipamimigay.

"Di puwedeng lagyan ng antivirals dahil ito ay kailangan ng prescription ng doktor. Basic lang sya, di kailangan ng kung anu-ano, ang importante basic ang karga pero mas marami ang makatanggap. Kaakibat nito ang teleconsultation telemedicine," ani DOH Secretary Francisco Duque III.

COVID-19 home-care kits, ‘wag lagyan ng prescription meds – DOH

ni Lolet Abania | January 21, 2022

Nagbabala ang Department of Health (DOH) ngayong Biyernes hinggil sa paglalakip ng prescription medication sa mga COVID-19 home-care kits dahil maaaring magdulot ng mas maraming pinsala sa halip na magbigay benepisyo ito sa mga indibidwal na nasa ilalim ng home quarantine.

“Kapag nagbigay tayo ng homecare kits, ‘wag ho tayo maglalagay ng mga prescriptions, medications,” giit ni DOH Undersecretary Maria Rosario Vergeire sa Palace briefing.

“Baka ito ay mas magkaroon ng harm sa ating mga kababayan rather than giving them that benefit,” dagdag ng opisyal.

Ito ang naging tugon ni Vergeire matapos na tanungin hinggil sa pagkumpara sa “Kalinga” kits at sa ibang home care kits na ibinigay naman ng ibang mga organisasyon.

Sa mga post sa Twitter ay inihambing ng mga netizens, ang DOH kits sa mga care kits na ipinamahagi ng Office of the Vice President (OVP), kung saan mayroong isang thermometer, pulse oximeter, medical supplies, vitamins, face masks, disinfectant, at mga medisina.

Matatandaang noong Abril 2021, sinabi ni VP Leni Robredo na ang kanilang home care kits ay nabuo base sa rekomendasyon ng mga doktor na kanilang kinonsulta.

Ang DOH Kalinga kits naman ay naglalaman ng face masks, soap, alcogel, disinfection spray, at basic medicine.

Samantala, nagpasalamat naman ni Vergeire sa local government units (LGUs) na tumulong na mag-distribute habang nagdagdag ang mga ito ng marami pang items sa mga home-care kits.

“Kami rin po ay nagpapasalamat sa mga organisasyon at ibang mga local governments na talagang mas tinaasan pa nila ang antas ng mga components o mga laman ng kits na meron tayo,” sabi pa ni Vergeire.

DOH: 500K healthcare workers, nakatanggap na ng SRAs

ni Lolet Abania | January 18, 2022

Halos kalahating milyong healthcare workers ang nakatanggap na ng kanilang special risk allowances (SRA) sa gitna ng pandemya, ayon sa Department of Health (DOH) ngayong Martes.

“For SRA ho, for December 20 (2020) to June 30, 2021, we were able to provide 496,314 healthcare workers amounting to around P8 billion po,” ani DOH Assistant Secretary Maylene Beltran sa isang congressional hearing.

Ang data, ayon kay Beltran ay hanggang nitong Enero 14, 2022.

Sa kanyang presentasyon, sinabi ni Beltran na ang DOH ay may karagdagang hiling na mahigit sa P3 bilyon halaga para maibigay ang mga SRAs ng 184,799 pang healthcare workers.

Sa usapin naman ng actual hazard duty pay, binanggit ni Beltran na may kabuuang 390,662 healthcare workers ang nakatanggap nito. Ang halagang nailabas para sa Active Duty Hazard Pay (AHDP) ay may kabuuang P6,555,957,185 hanggang nitong Enero 17.

Matatandaang noong nakaraang linggo, ang DOH ay nakipagpulong sa Department of Finance (DoF) at Department Budget and Management (DBM) upang talakayin ang pondo para sa SRA ng mga healthcare workers para sa taong 2022.

Una nang sinabi ni DOH Secretary Francisco Duque III na para sa taong 2022, hinihingi ng ahensiya ang tinatayang P50 bilyon para pondohan ang SRAs ng mga healthcare workers.