618 bagong kaso ng Omicron variant – DOH

ni Lolet Abania | January 27, 2022

Nakapagtala ang bansa ng 618 dagdag na kaso ng mas nakahahawang Omicron COVID-19 variant, kung saan 497 ay local cases at 121 mga returning overseas Filipinos (ROFs).

Dahil dito, ayon sa Department of Health (DOH), umabot na sa kabuuang 1,153 ang kumpirmadong kaso ng Omicron sa bansa.

Sa mga local cases, 238 dito ay naitala ang address sa National Capital Region, 71 sa Calabarzon, tig-30 sa Ilocos Region at Western Visayas, 28 sa Eastern Visayas, 27 sa Central Luzon, 20 sa Central Visayas, 19 sa Cagayan Valley.

May 13 naman sa Cordillera Administrative Region (CAR), 10 sa Davao Region, 6 sa SOCCSKSARGEN, tig-2 sa Bicol Region at Mimaropa, at 1 sa Northern Mindanao.

Ayon pa sa DOH, nasa 13 kaso ang nananatiling aktibo.

May kabuuang 5 indibidwal naman ang nasawi sa Omicron.

Sinabi ng ahensiya, mula ito sa latest run sequenced na 677 samples, kung saan 91.29% ay lumabas na Omicron variant.

3 pa nasawi sa Omicron variant — DOH

ni Lolet Abania | January 26, 2022

Nakapagtala ang Department of Health (DOH) ng tatlo pang nasawi mula sa mga Omicron variant cases sa bansa, kaya umabot na sa kabuuang lima ang namatay sa naturang sakit.

Sa isang mensahe sa mga reporters ngayong Miyerkules, sinabi ni DOH Undersecretary Maria Rosario Vergeire na lahat silang lima ay mga indibidwal na may comorbidities.

“Three are seniors and all have comorbidities. One partially vaccinated, one unvaccinated, and the remaining 3 are still for verification,” sabi ni Vergeire.

Una nang iginiit ng DOH na ang mga senior citizens, may mga comorbidities, at mga hindi bakunadong indibidwal ay nananatiling may panganib sa Omicron, ang mas nakahahawang variant ng COVID-19.

“While Omicron mostly presents with asymptomatic and mild disease, our data shows that those most at risk for fatalities are still the elderly and those with comorbidities and unvaccinated,” ayon sa unang pahayag ng DOH.

Ang naunang dalawang nasawi ay mula sa nakumpirmang Omicron cases, kung saan sila ay mga unvaccinated senior citizens na may pre-existing medical conditions.

Gayunman, ayon sa DOH, matapos ang kanilang beripikasyon, isa sa naunang dalawang nasawi ay partially vaccinated o nakatanggap ng unang dose ng COVID-19 vaccine.

Sa ngayon, nakapagtala na ang bansa ng kabuuang 535 Omicron cases.

DOH: 7 laboratoryo nationwide, itatayo sa mga piling ospital

ni Lolet Abania | January 25, 2022

Pitong subnational laboratories ang itatayo sa mga piling regional hospitals sa buong bansa bilang bahagi ng pagsisikap na mapahusay ang kapasidad ng bansa na maka-detect ng mga vaccine-preventable diseases, ayon kay Department of Health (DOH) Usec. Maria Rosario Vergeire.

Kabilang sa mga ospital na pagtatayuan ng mga laboratoryo ay ; Jose B. Lingad Memorial Regional Hospital; Western Visayas Medical Center; Vicente Sotto Memorial Medical Center; Zamboanga Medical Center; Southern Philippines Medical Center; at Cotabato Medical Center.

“So ito po mga regional hospitals natin ito and we found it fit and appropriate na mag-umpisa tayo dito kasi meron na talaga silang proseso, sistema, at istruktura,” ani Vergeire sa isang media briefing ngayong Martes.

Ayon kay Vergeire, magbibigay din ang ahensiya ng karagdagang equipment at supplies.

“Nakapag-commit po at tutulungan tayo ng World Health Organization (WHO) para sa necessary equipments and supplies nitong pitong subnational labs,” sabi pa ni Vergeire, kung saan aniya, ang WHO ay magpo-provide naman ng P36 milyong halaga.

Gayundin, sinabi ng kalihim na makatutulong ito sa healthcare system ng bansa.

“Bagamat may pandemya, mabuti rin mabigyan natin ng pansin ang mga sakit kagaya ng measles, rubella, at iba pa,” saad ni Vergeire.