Para sa edad 5-11, Peb. 14... National COVID-19 vax drive sa Peb. 10-11 – DOH

ni Lolet Abania | February 4, 2022

Muling magsasagawa ang bansa ng national COVID-19 vaccination drive sa ikatlong pagkakataon sa Pebrero 10 at 11, habang ang nationwide roll-out ng bakunahan para sa kabataang edad 5 hanggang 11 ay sa Pebrero 14, ayon sa isang opisyal ng Department of Health (DOH) ngayong Biyernes.

Sinabi ni DOH Undersecretary Myrna Cabotaje, head ng National Vaccination Operations Center, layon ng “Bayanihan Bakunahan” program na mas madagdagan ang pagbabakuna ng mga matatanda o senior citizens at mga indibidwal na may comorbidities, kung saan sa ngayon, nasa 60 hanggang 70 porsiyento ng mga edad 60 at pataas ang nabakunahan na kontra-COVID-19.

“Nationwide, although ipa-prioritize sa areas na kailangang-kailangan ng additional boost ang kanilang vaccine coverage sa senior citizens,” ani Cabotaje.

“Vaccination works. Ito po ay pinakita sa Omicron surge sa NCR (National Capital Region). Mabilis bumaba (ang mga kaso) dahil marami ang nagpabakuna,” sabi pa ng opisyal.

Samantala, ang nationwide roll-out ng COVID-19 vaccines para sa mga edad 5 hanggang 11 ay isasagawa sa Pebrero 14. Ang pagbabakuna sa naturang age group ay magpapatuloy pa rin sa Metro Manila at iba pang bahagi ng Central Luzon at Calabarzon sa Lunes, Pebrero 7, bago ang gagawing nationwide rollout, na unang inanunsiyo ng DOH.

Ayon kay Cabotaje, ilang 780,000 Pfizer vaccines na para sa mga kabataang edad 5 hanggang 11 ay nakatakdang dumating ng gabi ng Biyernes matapos na aniya, ang third party logistics partner ng ahensiya ay mabigong i-load ang mga ito sa eroplano nitong Huwebes.

“They tried all their best to have alternate routes at saka saan puwede dalhin pero hindi nakaabot. We’re sure it’s going to be delivered this afternoon kasi nakasakay na yan kahapon,” paliwanag ni Cabotaje sa isangt televised public briefing.

“It has already left Brussels. It was in Hong Kong, it’s going to arrive tonight. Meron na rin kaming allocation per area depende kung ano ang na-submit nilang immediate registration,” dagdag ng kalihim.

Sinabi rin ni Cabotaje, na isa pang batch ng ilang 780,000 doses ng Pfizer vaccines ang nakatakda namang i-deliver sa Pebrero 9.

Aniya, nasa tinatayang 160,000 mga bata, kabilang ang 100,000 minors sa Metro Manila, ang nakapagrehistro na sa vaccination.

Ayon naman kay DOH Undersecretary Maria Rosario Vergeire, ang mga nakaiskedyul ng pagbabakunang menor-de-edad ay kanilang isinaayos habang iniurong ang mga petsa nito.

• Pebrero 4 , gagawing Lunes, Pebrero 7

• Pebrero 5, gagawing Martes, Pebrero 8

• Pebrero 7 at Pebrero 8, gagawing Miyerkules, Pebrero 9

Batay sa DOH data, sa ngayon ay nasa 59.4 milyong indibidwal na ang fully vaccinated habang 60.5 milyon Pinoy naman ang nakatanggap ng initial dose.

May tinatayang 7.7 milyong katao ang na-administer ng booster shots hanggang nitong Miyerkules.

Pagbabakuna sa edad 5-11 kontra-COVID, iniurong sa Pebrero 7 – DOH

ni Lolet Abania | February 3, 2022

Ipinagpaliban ng gobyerno ang pagbabakuna kontra-COVID-19 sa mga kabataang edad 5 hanggang 11 at gagawin na lamang sa Lunes, Pebrero 7 dahil sa tinatawag na logistical challenges.

Sa isang statement, ayon sa Department of Health (DOH), ang reformulated Pfizer vaccines ay darating ng gabi sa Pebrero 4, ang araw na nakaiskedyul ang initial rollout.

Unang sinabi ng ahensiya na tinatayang nasa 780,000 doses ng COVID-19 vaccines ang darating ngayong Huwebes.

“To ensure adequate preparation and distribution of the Pfizer vaccines allocated for children aged 5-11 years old, the COVID-19 vaccination of 5-11 years old will begin on 7 February,” pahayag ng DOH.

Binanggit din ng Malacañang na ang inisyal na pagbabakuna ay isasagawa sa anim na vaccination sites sa National Capital Region sa Biyernes.

Kabilang sa vaccination sites ang Philippine Heart Center, Philippine Children’s Medical Center, National Children’s Hospital, Manila Zoo, SM North Edsa (Skydome), at ang Fil Oil Gym sa San Juan City.

Bilang ng kaso ng COVID-19 sa bansa, bumababa na — DOH

ni Jasmin Joy Evangelista | February 3, 2022

Bumababa na ang bilang ng mga bagong kaso ng COVID-19 na naitatala kada araw, ayon sa Department of Health (DOH).

"Magandang balita po ang bungad sa 'tin ng Pebrero sapagkat nagsisimula nang bumaba ang kaso ng COVID-19 sa ating bansa," ani Health Spokesperson Maria Rosario Vergeire.

Matatandaang sumipa ang mga kaso ng COVID-19 sa bansa noong Disyembre dahil sa mas nakahahawang omicron variant.

Ayon sa DOH, pababa na ang bilang ng kaso sa Luzon habang nagpa-plateau o bumabagal na ang pagtaas ng bilang ng mga nagkakasakit sa Visayas ngunit sa Mindanao ay mayroon pa ring mga rehiyon na nananatiling mataas ang bilang ng kaso partikular ang health care utilization, ayon sa DOH.

Ayon naman kay Vergeire, hindi pa dapat alisin ang alert level system.

"Kailangan natin maintidihan what the alert level system is, it is a warning system for LGU (local government unit). It serves as a guide for our LGU kung ano ang dapat gawin at this level of the number of cases or utilization of hospitals," ani Vergeire.

"These are things that for now will be around for a while para hindi na mag-surge ang virus kahit na-control na natin sila," pahayag naman ni Dr. Edsel Salvana ng DOH technical advisory group.

Ayon din sa World Health Organization (WHO), dapat maging maingat ang mga bansa sa pagtanggal ng health protocols.

"They open up on the basis that the country next door opened up. The problem is they don’t have the same situation, they don't have the same vaccine coverage, they don't have a strong health system," sabi ni WHO Health Emergency Program Executive Director Dr. Michael Ryan.