DOH: Omicron subvariant BA.2.12.1, wala pang local transmission

ni Lolet Abania | May 16, 2022

Wala pang indikasyon na mayroon nang local transmission ng Omicron subvariant BA.2.12.1 sa bansa, bagama’t nananatiling “posible” na tamaan nito ang kahit sino, ayon sa infectious disease expert.

“Sa ngayon walang indication ‘yan kasi -- I mean it’s possible lalo na ang bilis manghawa ng Omicron,” sabi ni Dr. Edsel Salvana sa Laging Handa briefing ngayong Lunes.

“But usually para masabi namin na meron nang local transmission, lalo na ‘yung tinatawag na sustained local transmission, tinitingnan natin ‘yung transmission chains niyan at makikita natin kung matre-trace ba natin,” ani pa niya.

Ayon kay Salvana, na miyembro ng Department of Health-Technical Advisory Group, ang 12 kaso ng BA.2.12.1 sa Palawan ay malinaw na single cluster habang ang dalawang kaso sa Metro Manila ay iniimbestigahan pa rin.

“Sa ngayon pinag-aaralan pa po ‘yan, but it’s always safer to assume na nandiyan na ‘yan kaya kinakailangan po patuloy ‘yung pag-iingat natin,” giit ni Salvana. Sinabi rin ng opisyal na ang mga bagong kaso ng Omicron subvariant ay nakaranas ng mild symptoms habang ang mga iba ay asymptomatic.

“Truthfully, itong mga bagong cases ng BA.2.12.1 ay puro mild cases. In most cases nga asymtomatic. Kaya alam natin bagama’t kinakailangan talaga we remain vigilant, ‘yung vaccines continue to protect us,” saad ni Salvana.

77 M indibidwal, target na maturukan laban sa COVID-19 hanggang Hunyo — DOH

ni Lolet Abania | May 14, 2022

Target na ngayon ng gobyerno para sa kanilang COVID-19 vaccination program na makapagbakuna ng nasa 77 milyong indibidwal o 85% ng eligible population sa pagtatapos ng Hunyo, ayon sa Department of Health (DOH).

“Our target would be 77 million individuals by the end of June. This is 85% of our targeted eligible population which is 90 million,” ani DOH Undersecretary at spokesperson Maria Rosario Vergeire sa Laging Handa briefing ngayong Sabado.

“Currently that is our working target. We already were able to vaccinate 68.5 million Filipinos. We expect only a little number, we hope to reach them by the end of June,” dagdag ng opisyal.

Ini-report naman ni Vergeire na may 7,407 indibidwal ang nakatanggap ng COVID-19 vaccine sa mga vaccination sites malapit sa mga polling precincts noong Mayo 9, Election Day.

“This is something small kung ikukumpara natin sa pang-araw-araw nating accomplishment pero maganda na rin po kasi nakita natin na 'yung ating mga kababayan interesado at willing magpabakuna kahit na pagkatapos pa ng eleksyon na ubod ng init ng araw,” pahayag ni Vergeire.

Kaugnay nito, ang Bangsamoro Autonomous Region in Muslim Mindanao (BARMM) ay kasalukuyang nagsasagawa ng special vaccination days dahil ito sa kanilang mababang vaccination turnout. Gayundin, ang DOH ay nag-a-assist sa Quezon sa Region 4-A, at Regions 4-B, 5, 7, at 12 upang madagdagan ang antas ng pagbabakuna kontra-COVID-19 sa mga naturang lugar.

May COVID-19 symptoms... 31 botante, pinauwi nang makaboto — DOH

ni Lolet Abania | May 10, 2022

Nasa 31 botante ang pinauwi para sumailalim sa isolation matapos na makaboto nang makitaan ang mga ito ng sintomas ng COVID-19 nitong Lunes, Election Day, ayon sa Department of Health (DOH).

Sinabi ni DOH Undersecretary Maria Rosario Vergeire, kabilang ang mga indibidwal sa 644 cases na inalagaan at ginamot ng mga health workers sa mga polling precincts. Habang nasa 57 pasyente ang dinala naman sa mga ospital.

“Wala naman po tayong nakitang may severe for example na sintomas na nagpunta talaga doon. ‘Yung iba based on detection, so assessment ng mga doktor na kasama natin du’n po nakita na maaaring COVID related,” saad ni Vergeire sa mga reporters ngayong Martes.

“These were just 31 among all of those who were managed and treated. Marami po sa tini-treat ay may pagtaas ng presyon, maaaring dulot ng init... the rest minor lang,” paliwanag ni Vergeire.

Gayunman, ayon kay Vergeire, naobserbahan ng ahensiya na may ilang mga lugar ang nabigong magpatupad ng physical distancing sa botohan.

“We are closely monitoring the situation. We have seen violations specifically on physically distancing," aniya.

“But as we have said, sa ‘Apat Dapat,’ tatlo ay sapat na. As long as people are wearing their masks properly, there is adequate ventilation in the classrooms, and also siyempre dapat bakunado — sana ang mga bumoto kahapon ay bakunado.”

Ayon kay Vergeire, ang mga kaso ng COVID-19 sa bansa ay posibleng tumaas sa katapusan ng buwan, kung ang publiko ay patuloy na babawasan ng 30 hanggang 50 porsyento ang pagsunod sa minimum health standards.

“We know the incubation period is 14 days, because of the new variants it may be less than 14 days,” sabi pa ni Vergeire.