35 fully vaxx na, tinamaan ng Delta variant

ni Lolet Abania | August 9, 2021

Umabot na sa 13 rehiyon mula sa 17 rehiyon sa buong bansa ang tinamaan ng mas nakahahawang Delta variant ng COVID-19, ayon sa Department of Health (DOH).

“Local Delta cases have been detected in 13 out of our 17 regions in the country,” ani DOH Undersecretary Maria Rosario Vergeire sa briefing ngayong Lunes.

Dagdag niya, nasa 355 mula sa 450 Delta variant cases ay local, 69 ay returning overseas Filipinos (ROFs), at 26 ay bineberipika pa.

Ang mga local cases na nai-record sa mga lugar ay Metro Manila - 146 cases; Cordillera region - 1 case; Region 1 - 5 cases; Region 2 - 1 case; Region 3 - 39 cases; Region 4A - 47 cases; Region 5 - 1 case; Region 6 - 36 cases; Region 7 - 37 cases; Region 8 - 11 cases; Region 9 - 3 cases; Region 10 - 22 cases; Region 11 - 6 cases.

Inihayag din ni Vergeire na 35 Delta variant cases ay nakumpirmang fully vaccinated na kontra-COVID-19; 17 ang nakatanggap ng unang dose; 83 ay hindi bakunado at 315 ay bineberipika pa.

Umabot naman sa 55 porsiyento o 248 na kaso ay mga lalaki, habang aniya, ang edad ng Delta variant cases ay nasa pagitan ng less than 1-year-old hanggang 84-anyos.

Nakapagtala rin ang DOH ng isang dagdag na nasawi sa Delta variant, subalit hindi na nagbigay pa ng detalye ang ahensiya.

“Among the 450 Delta variant cases in our country, 426 have recovered, 10 have died, while 13 remain to be active after validation and repeat RT-PCR… The outcome of one case is still being verified,” sabi ni Vergeire.

Gayundin, ang Pilipinas ay muling na-classify bilang isang high-risk area sa COVID-19 sa gitna ng patuloy na pagtaas ng mga kaso ng virus.

8 lungsod sa NCR at 20 pang probinsiya, nasa Alert Level 4 dahil sa COVID — DOH

ni Lolet Abania | August 6, 2021

Walong lungsod sa Metro Manila at halos 20 iba pa sa maraming rehiyon sa bansa ang isinailalim na sa Alert Level 4 ng Department of Health (DOH) dahil sa mataas na bilang ng COVID-19 cases at hospital occupancy rate.

Ayon kay DOH Undersecretary Maria Rosario Vergeire, ang Alert Level 4 ay nangangahulugan na ang isang lugar ay na-classify bilang moderate-to critical-risk at ang naitalang health care utilization rate (HCUR) ay mas mataas pa sa 70%.

Sinabi ni Vergeire na ang mga lugar sa Metro Manila na nasa Alert Level 4 ay Las Piñas, Muntinlupa, Pateros, Quezon City, Taguig, Malabon, Makati, at San Juan.

Isinailalim din sa parehong alert level ang maraming lugar sa Cordillera region at Regions 1, 2, 3, 4A, 6, 7, 8, 10, 11, at 12, gaya ng Cordillera - Apayao, Baguio City, Benguet; Region 1- Ilocos Norte; Region 2 - Cagayan, Nueva Vizcaya, Quirino; Region 3 - Angeles City, Bataan, Olongapo City, Pampanga, Tarlac; Region 4A - Batangas, Cavite, Laguna, Quezon, Lucena City; Region 6 - Iloilo, Iloilo City; Region 7 - Cebu, Cebu City, Lapu-Lapu City, Mandaue City; Region 8 - Tacloban City; Region 10 - Bukidnon, Cagayan de Oro City, Camiguin; Region 11 - Davao City; Region 12 - General Santos City.

Ginawa ni Vergeire ang anunsiyo sa unang araw ng muling 2-linggong pagpapatupad ng enhanced community quarantine (ECQ), ang pinakamahigpit na quarantine level sa Metro Manila.

Gayundin, ayon sa DOH, ang mas nakahahawang Delta COVID-19 variant ay na-detect na sa lahat ng lungsod sa National Capital Region (NCR).

“All National Capital Region areas now have a local Delta case,” ani DOH Undersecretary Maria Rosario Vergeire sa briefing ngayong Biyernes.

Ipinaliwanag naman ni Vergeire na ang mga alert levels ay base sa COVID-19 transmission at ang HCUR ng isang lugar, at ang pagkakaroon ng Delta variant cases dito.

“These alert levels will give us triggers kung ano ‘yung kailangan na nating gawin at saka kung ano ‘yung mga flagged areas natin,” sabi ni Vergeire.

Ang Alert Level 1 ay nangangahulugan na ang transmission ay mababa at bumababa, ang HCUR ay mababa, at walang kaso ng Delta variant sa lugar. Ito ang mga lugar na nasa minimal hanggang low risk, nasa negative two-week case growth rate (TWGR) at ang HCUR ay mas mababa pa sa 50%.

Ang mga lugar na nasa ilalim ng Alert Level 1 ay Region 4B – Palawan; Region 5 - Camarines, Norte, Albay; Region 7 - Negros Oriental; Region 8 – Biliran; Region 9 - Zamboanga Sibugay; BARMM - Maguindanao, Tawi-Tawi, Basilan.

Ang Alert Level 2 ay nangangahulugan na ang transmission ay mababa at bumababa, ang HCUR ay mababa, subalit may kaso ng Delta variant. Sa klasipikasyon ding ito naiuugnay ang may mababa subalit tumataas na bilang ng kaso o mga lugar na mababa at bumababa ang transmission ngunit tumataas naman ang HCUR.

Ito rin ang mga lugar na nasa minimal hanggang low risk subalit nasa positive TWGR o mga lugar na nasa minimal hanggang low risk, nasa negative TWGR subalit ang HCUR ay mas mataas sa 50%.

Ang mga lugar na nasa Alert Level 2 ay Cordillera – Ifugao; Region 1 - La Union; Region 3 - Zambales, Aurora; Region 4B - Occidental Mindoro, Oriental Mindoro; Region 5 - Camarines Sur, Sorsogon; Region 6 - Guimaras, Negros Occidental; Region 7 - Bohol, Siquijor; Region 8 - Eastern Samar, Ormoc City, Samar (Western Samar); Region 9 - Zamboanga Del Norte, Zamboanga City; Region 10 - Misamis Occidental; Region 11 - Davao Del Norte, Davao De Oro, Davao Del Sur, Davao Oriental; Region 12 - South Cotabato, Sarangani; Caraga: Agusan Del Norte, Dinagat Islands, Surigao Del Norte, Agusan Del Sur, Butuan City; BARMM: Cotabato City, Lanao del Sur, Sulu.

Ang Alert Level 3 ay nangangahulugan na ang isang lugar ay nasa moderate hanggang critical risk subalit ang bed occupancy rate ay mas mababa sa 70%. Ito ang level, katulad din ng Alert Level 4, na hindi pa naitatala ang tinamaan ng Delta variant sa isang lugar.

Ang mga lugar na nasa Alert Level 3 ay Metro Manila - Caloocan, Mandaluyong, Manila, Marikina, Navotas, Parañaque, Pasig, Valenzuela, Pasay; Cordillera - Abra, Kalinga, Mountain Province; Region 1 - Ilocos Sur, Pangasinan, Dagupan City; Region 2 - Batanes, Santiago City, Isabela; Region 3 - Bulacan, Nueva Ecija; Region 4A – Rizal; Region 4B - Marinduque, Romblon, Puerto Princesa; Region 5 - Masbate, Naga City, Catanduanes; Region 6 - Aklan, Antique, Bacolod City, Capiz; Region 8 - Leyte, Northern Samar, Southern Leyte; Region 9 - Zamboanga del Sur; Region 10 - Iligan City, Lanao del Norte, Misamis Oriental; Region 11 - Davao Occidental; Region 12 - Cotabato (North Cotabato), Sultan Kudarat; Caraga - Surigao del Sur.

House-to-house bakuna, aprub sa DOH

ni Lolet Abania | July 31, 2021

Sa inaasahang pagsasailalim ng National Capital Region sa enhanced community quarantine (ECQ) sa Agosto 6 hanggang 20, inaprubahan ng Department of Health (DOH) ang mas ligtas na paraan ng pagbabakuna, ang house-to-house vaccinations.

Ayon kay DOH Undersecretary Maria Rosario Vergeire, mas higit na makatutulong sa mga kababayan ang bahay-bahay na pagbabakuna para matiyak na mababakunahan ang mga komunidad kontra-COVID-19 habang magiging mas ligtas din ang mga indibidwal dahil sa may mga mag-iikot na lamang na mga health workers sa halip na pumila sila sa mga vaccination sites.

“Sa tingin namin, maganda ‘yan na strategy, kasi una sa lahat, hindi magkukumpul-kumpol ang mga tao. Ang iikot po, ang [mga magbabakuna] at hindi na kailangang pumunta ng mga tao sa ibang lugar para magpabakuna,” ani Vergeire sa press briefing ngayong Sabado nang umaga.

Maliban dito, magkakaroon pa rin ng pagbabakuna sa mga vaccination sites subalit bubuo ang ahensiya ng mas ligtas na pamamaraan gaya ng pagkakaroon ng scheduling upang maiwasan ang pagdami ng mga tao habang isasagawa ito sa mas malalaking sites para masunod ang physical distancing.

“Gagawa tayo ng safe vaccination sites kung saan sisiguraduhin natin na hindi tayo magkukumpulan kapag tayo ay magpapabakuna na. There will be scheduling, we will be using bigger vaccination sites. Mas madali po ang mobilization ng [babakunahan] and [magbabakuna] para makapagpabakuna tayo ng mas marami,” sabi ni Vergeire.

Una nang sinabi na ipapatupad ang ECQ sa NCR simula sa Agosto 6 hanggang 20 sa gitna ng panganib ng mas nakahahawang Delta variant ng COVID-19.

Gayunman, ayon sa Malacañang, magpapatuloy ang pagbabakuna sa mga lugar kahit na isinailalim sa ECQ.