Bilang ng mga namatay sa leptospirosis, bumaba — DOH

ni Eli San Miguel @News | Nov. 30, 2024

Photo: Department of Health

Iniulat ng Department of Health (DOH) na mas mababa ang bilang ng mga namatay dahil sa leptospirosis mula huling bahagi ng Oktubre hanggang unang bahagi ng Nobyembre ngayong taon kumpara sa parehong panahon noong 2023.

Ayon sa DOH, may naitalang 594 na kaso sa buong bansa mula Oktubre 27 hanggang Nobyembre 9, 2024, na 2.5 beses na mas mataas kumpara sa 234 na kaso na naitala mula Oktubre 13 hanggang 26, 2023.

Iniuugnay ng DOH ang pagtaas ng mga kaso sa mga bagyong tumama sa bansa noong Oktubre, na nagdulot ng malawakang pagbaha sa maraming bahagi ng Pilipinas.

Gayunpaman, naitala ng DOH ang 9.12% case fatality rate (CFR) sa taong 2024, mas mababa kumpara sa 10.83% noong kaparehong panahon noong nakaraang taon.

Mga kaso ng pertussis, bumaba na ngayong Agosto — DOH

ni Angela Fernando @News | August 29, 2024

Photo: DOH

Patuloy na bumababa ang bilang ng mga kaso ng "whooping cough" o pertussis sa buong bansa, na mayroong 19 na pasyente lamang na naitala mula Agosto 4 hanggang 17, 2024, ayon sa Department of Health (DOH) nitong Huwebes.

Lumabas sa pinakabagong datos ng DOH na nananatiling mababa ang mga kaso ng pertussis, mula sa 131 kaso na naitala nu'ng Hulyo 7-20, bumaba ito sa 77 kaso nu'ng Hulyo 21-Agosto 3, at tuluyang bumaba sa 19 kaso nu'ng Agosto 4-17.

Gayunpaman, apat na rehiyon kasama ang National Capital Region, Cagayan Valley, Western Visayas, at Davao Region, ang naobserbahang nagkaroon ng pagtaas ng mga kaso sa nakalipas na anim na linggo mula Agosto 17.

Umabot na sa 3,827 ang kabuuang bilang ng mga kaso ng pertussis na naitala ngayong 2024, karamihan nu'ng Marso at Abril. Ito ay halos 13 beses na mas mataas kaysa sa 291 kaso na naitala sa parehong panahon nu'ng nakaraang taon.

Pagkalat ng MPOX, agapan

by Info @Editorial | August 28, 2024

Kinumpirma ng Department of Health (DOH) na may dalawang bagong kaso ng mpox sa bansa na kapwa taga-Metro Manila. 

Samantala, nasampulan naman ang isang club sa Quezon City matapos umano itong tumanggi na makipagtulungan sa mga contract tracer.

Kaugnay nito, target ilunsad ng DOH ang isang online consultation system para sa mga pasyenteng dinapuan ng mpox sa buong bansa.

Sa ilalim ng national action plan laban sa mpox, target ng DOH na humingi ng tulong mula sa Philippine Dermatological Society sa pag-set-up ng website kung saan maaaring kumonsulta ang suspect case o ang mga nakararanas ng mga sintomas ng sakit.

Tinitingnan din ng ahensya na hingin ang tulong ng mga eksperto mula sa PH Dermatological Society, PH Society for Microbiology and Infectious Diseases at Pediatric Infectious Diseases Society of the Philippines para gawing mas accessible ang screening, testing at referral ng mpox patients.

Patuloy naman ang paalala at babala laban sa pag-uulat ng mga hindi kumpirmadong kaso ng mpox. Marami umanong uri ng sakit sa balat na napagkakamalang mpox gaya ng chickenpox, shingles o buni. Hinihimok din ang mga lokal na pamahalaan na bago mag-isyu ng advisories kaugnay sa mpox cases, dapat na ito ay suportado ng sapat na scientific evidence para maiwasan na magdulot ito ng pangamba at kalituhan sa publiko.

Para naman sa lahat, huwag basta maniwala sa mga naririnig o nasasagap lalo na online. Tiyakin na legit ang source para ‘di mabiktima ng fake news lalo na ang magamit sa pagpapakalat nito.