DTI Sec. Lopez, nagpositibo sa COVID-19

ni Lolet Abania | December 9, 2020

Sumailalim na sa full isolation si Department of Trade and Industry (DTI) Sec. Ramon Lopez matapos na magpositibo sa COVID-19 test.

Sa isang statement ngayong Miyerkules, sinabi ni Lopez na sumailalim siya sa test noong weekend matapos na ma-expose sa isang indibidwal na nagpositibo sa COVID-19 noong December 2.

"Am asymptomatic naman but am on full isolation already," sabi ni Lopez subali't hindi na siya nagbigay pa ng detalye.

Si Lopez ang ika-apat na Cabinet official na tinamaan ng COVID-19. Ang mga nagpositibo sa test sa COVID-19 ay sina Department of Interior and Local Government (DILG) Sec. Eduardo Año, Department of Education (DepEd) Sec. Leonor Briones at Department of Public Works and Highways (DPWH) Sec. Mark Villar, gayunman, lahat sila ay nakarekober na.

Govt. offc'ls. na lumabag sa social distancing, lagot — DILG

ni Ronalyn Seminiano Reonico | December 3, 2020

Iimbestigahan at pananagutin ang sinumang magpupunta sa event na lalabag sa health protocol ngayong pandemic, kahit ang mga opisyal pa ng gobyerno, ayon sa Department of the Interior and Local Government (DILG).

Pahayag ni DILG Undersecretary Jonathan Malaya, “The Secretary Eduardo Año has already directed the Philippine National Police to investigate certain individuals who allegedly were found to have been in an event found violating health protocols.

” Aniya pa, “Government officials must take the lead, lead by example. If the government official is invited to an event but he or she cannot ensure that minimum health standards will be implemented during the event, it will be best if this government official will just decline to attend.”

Hindi man nagbanggit ng pangalan si Malaya, matatandaang kamakailan ay kumalat sa social media ang larawan ni Presidential Spokesperson Harry Roque na kuha sa isang event sa Bantayan Island, Cebu kung saan makikita ang napakaraming tao na hindi sumusunod sa social distancing protocol.

Saad pa ni Malaya, “Government officials are under a microscope. Our people expect the public officials to comply with minimum health standards. If government officials fail to comply, how can we expect the public to comply? That is why it is very important for us to lead by example.”

Aprub na face-to-face classes kay Duque, sinopla ni Año

ni Lolet Abania | December 1, 2020

Pinag-iisipang ibalik ang face-to-face classes sa mga lugar na may mababang panganib ng COVID-19 kasabay ng pagpapatupad pa rin ng minimum health standards, ayon sa pahayag ni Department of Health (DOH) Sec. Francisco Duque III.

“Kung ang lugar naman ay COVID-free for two weeks or four weeks, I am not sure, but zero case, walang COVID, walang risk halos, mababa ang risk, baka doon puwedeng pagbigyan,” sabi ni Duque sa isang interview ngayong Martes.

Ito ang tugon ng kalihim sa magiging rekomendasyon niya kay Pangulong Rodrigo Duterte patungkol sa pagbabalik ng face-to-face classes.

“Basta very low risk or minimal risk, I think that should be considered in the decision whether face-to-face classes would be allowed,” sabi ni Duque.

Samantala, noong Linggo, nagpahayag ng pagtutol si Department of Interior and Local Government (DILG) Sec. Eduardo Año para sa panawagan ng pagbabalik ng face-to-face classes.

"Ang sinasabi natin, huwag na lang natin munang i-rush. Kasi ang tanong diyan, ikaw gusto mong gawin 'yan pero sino ba ang responsable diyan? Ikaw ba? Ang galing mong magrekomenda pero wala ka naman palang responsibilidad diyan," sabi ni Año.

"Kung magkasakit at magkaroon ng spike, ikaw ba ang gagamot diyan, ikaw ba magsasagot ng gastos diyan? Pangalawa, sino'ng magiging accountable?" mariing sabi pa ni Año.