3.4 M taga-Metro Manila, nakuha na ang ayuda — DILG

ni Ronalyn Seminiano Reonico | April 16, 2021

Tinatayang aabot sa 3.4 milyong benepisyaryo sa Metro Manila ang nakatanggap na ng cash aid o ayuda.

Ayon kay Department of the Interior and Local Government (DILG) Spokesperson Jonathan Malaya ngayong Biyernes, naipamahagi na ang P3.4 billion sa mga benepisyaryong lubos na naapektuhan ng ipinatupad na dalawang linggong enhanced community quarantine (ECQ) dahil sa paglobo ng kaso ng COVID-19 sa National Capital Region (NCR) Plus bubble.

Saad pa ni Malaya, “Gumanda na po, bumilis na po ‘yung ating pamimigay ng ayuda. Sa NCR po, 3.4 million beneficiaries na po ang ating nabigyan ng ayuda which is equivalent to P3.4 billion.”

Aabot sa 22.9 milyong benepisyaryo ang target ng pamahalaan na mabigyan ng ayuda sa NCR Plus na binubuo ng Metro Manila, Bulacan, Cavite, Laguna at Rizal.

Ang naturang ayuda ay nagkakahalagang P1,000 kada tao ngunit hindi hihigit sa P4,000 sa kada pamilya na nawalan ng hanapbuhay nang ipatupad ang ECQ noong March 29 hanggang April 11.

Distribution ng SAP sa LGUs, bantay-sarado sa DILG

ni Mary Gutierrez Almirañez | March 30, 2021

Tututukang maigi ng Department of the Interior and Local Government (DILG) ang pamamahagi ng Social Amelioration Program (SAP) sa NCR Plus, partikular na sa bawat local government units (LGUs) na nagkaroon ng delay at mahabang pila nu’ng nakaraang tranche, batay sa panayam kay DILG Undersecretary Jonathan Malaya ngayong umaga, Marso 30.

Aniya, “Ang gagawin namin sa DILG is babantayan namin ang mga LGU na ito. Kumbaga, gagawin namin itong mga areas of special concern — 'yung mga mahahaba ang pila, 'yung mga na-late. Kasi mayroon kaming listahan ng mga LGUs na 'yan, na actually 'yung iba niyan, pinadalhan namin ng show cause order, bakit na-delay 'yung pamimigay nila ng Social Amelioration Program. 'Yun ang babantayan natin para sigurado tayo na hindi na maulit ang delay sa pagbibigay ng SAP sa kanilang mga constituents."

Paliwanag pa niya, "Pangkalahatan naman last year sa first tranche ng SAP, naiparating naman ang tulong sa ating mga kababayan. But there were, I would admit, some LGUs na nagkaroon tayo ng problema."

Sa ngayon ay aprubado na ni Pangulong Rodrigo Duterte ang P22.9 bilyong pondo ng SAP, kung saan inaasahang makakatanggap ng P1,000 ang mahigit 22.9 milyong low-income individuals at hindi naman hihigit sa P4,000 para sa bawat low-income family sa unang linggo ng Abril.

"Kung sa pagpupulong ng mga lokal na pamahalaan, eh, mas madali sa kanila 'yung cash, maaaring gawin nilang cash. Kung hindi naman, bibili sila ng in kind," giit pa ni Budget Secretary Wendel Avisado. "Kapag in kind ang ibinigay sa LGUs, mahihirapan po tayong makapila sa DSWD para maka-deliver. Kung ida-download ang pera, meron po tayong direct purchase. Mas maganda po kung pera ang ibibigay sa LGU," suggestion naman ni Parañaque City Mayor Edwin Olivarez.

NCR Plus Bubble, malabong bumalik sa MECQ — DILG

ni Mary Gutierrez Almirañez | March 26, 2021

Kinontra ni Department of Interior and Local Government (DILG) Undersecretary Epimaco Densing III ang rekomendasyon ng OCTA Research Group na posibleng ibalik sa mas mahigpit na modified enhanced community quarantine (MECQ) ang mga lugar na kabilang sa NCR Plus Bubble, batay sa naging panayam sa kanya ngayong umaga, Marso 26.

Aniya, "Nag-meeting lang kahapon ang IATF. Hindi po 'yan pinag-usapan. Kung titignan natin ‘yung policy directive ng mga nakaraang IATF meeting, mukhang malabong bumalik tayo sa MECQ.

Importanteng nagbabalanse po tayo sa ating paghihigpit, at the same time kailangan tuluy-tuloy pa rin ang daloy ng ating ekonomiya.” Taliwas ito sa iginiit ni OCTA Research Group Fellow Professor Ranjit Rye na hindi babagsak ang ekonomiya kahit magpatupad ng MECQ sapagkat maihahalintulad lamang iyon sa hininging ‘time out’ ng mga health workers noong nakaraang taon.

Paliwanag pa ni Prof. Rye, “Mas grabe ang dinaranas natin ngayon at ang sinasabi natin, lahat ng pinaghirapan natin, may potential na maisantabi. All our gains will be washed away if this surge is left uncontrolled.”

Sa ngayon ay 8,773 na ang nadagdag sa mga nagpositibo sa COVID-19 at tinatayang umabot na sa 693,048 ang naitalang kaso sa bansa. Samantala, mahigit 500,000 mamamayan na ang nabakunahan ng unang dose ng COVID-19 vaccines, batay sa huling tala ng Department of Health (DOH).