P20K-P30K multa at kulong — DILG... Paggamit ng ilegal na paputok, bawal

ni Lolet Abania | December 28, 2021

Naglabas ng direktiba ang Department of the Interior and Local Government (DILG) ngayong Martes sa lahat ng local government units (LGUs) at mga ahensiya ng gobyerno na gumawa ng aksiyon laban sa paggamit ng ilegal na mga firecrackers o paputok at indiscriminate firing para sa nalalapit na selebrasyon ng Bagong Taon.

Sa isang statement, sinabi ni DILG Secretary Eduardo Año na dapat tiyakin ng Philippine National Police (PNP), Bureau of Fire Protection (BFP), at LGUs na ang publiko ay sumusunod hinggil sa panuntunan na ipinatutupad sa mga paputok.

“Inaatasan ko ang PNP na doblehin ang pagmomonitor at pag-iinspeksyon para siguruhing hindi kakalat sa merkado at walang gagamit o madidisgrasya sa ilegal na paputok,” giit ni Año.

Ayon kay Año, ang PNP at LGUs, ang may responsibilidad na magpatupad ng mga national at local policies tungkol sa mga paputok upang maiwasan ang anumang disgrasya at mga insidente ng sunog.

Inatasan na rin ng kalihim ang PNP na arestuhin ang sinumang lalabag sa regulasyon sa mga firecrackers. May multang P20,000 hanggang P30,000, anim na buwan hanggang isang taon na pagkakulong, kanselasyon ng lisensiya at business permit, at pagkumpiska sa mga inventory stocks ang kanilang ipapatupad laban sa mga violators.

Nagbabala rin si Año laban sa paggamit ng mga firearms o baril para salubungin ang Bagong Taon.

“The DILG will not tolerate the use of firearms in welcoming the New Year. We will apply the full force of the law against those that will fire their firearms during the New Year.

Let’s welcome the New Year with clean hands and clean hearts,” sabi ni Año.

Tiniyak naman ng opisyal sa publiko na papanagutin at papatawan ng kaukulang parusa ng mga awtoridad ang sinumang mahuhuling nagsagawa ng indiscriminate shooting o walang habas na pagpapaputok ng baril.

Samantala, sa isang interview kay BFP spokesperson Fire Superintendent Annalee Carbajal-Atienza, sinabi nitong nagsasagawa sila ng kampanya laban sa paggamit ng ilegal na paputok.

“Ang ating pong mga firetrucks, ating kabomberuhan ay nag-iikot sa mga barangay and doing rekorida, pag-aanunsiyo at pagpapaalala,” ani Carbajal-Atienza.

Pinayuhan naman ng opisyal ang publiko na manood na lamang ng mga fireworks display sa mga inilaang lugar na inorganisa ng kanilang LGUs.

Sa ngayon, ayon kay Carbajal-Atienza wala pang iniulat na insidente ng sunog sanhi ng mga paputok.

23 siyudad, nakamit na ang herd immunity kontra-COVID-19 — DILG

ni Lolet Abania | December 7, 2021

Nakapagtala ang Department of the Interior and Local Government (DILG) ng 23 highly urbanized cities, karamihan dito ay mula sa Metro Manila na nakamit na ang target na herd immunity kontra-COVID-19.

“Umaabot po na 23 siyudad ang umabot na po ng 70% and up na fully vaccinated. So ibig sabihin po … ay nakamit na ang herd immunity sa target population,” pahayag ni DILG Secretary Eduardo Año sa kanyang report kay Pangulong Rodrigo Duterte sa Talk to the People na ipinalabas ngayong Martes.

Kabilang sa listahan na mula sa National Capital Region na na-achieve na ang herd immunity ang mga sumusunod:

• San Juan City

• Mandaluyong City

• Pateros

• Marikina City

• Taguig City

• Pasay City

• Las Piñas City

• Parañaque City

• Manila City

• Muntinlupa City

• Makati City

• Valenzuela City

• Quezon City

• Navotas City

• Pasig City

• Malabon City

• Caloocan City

Sa labas naman ng NCR ay sa Baguio City, Angeles City, Iloilo City, Lapu-Lapu City, Mandaue City at Davao City.

Samantala, naunang sinabi ni Department of Health (DOH) Secretary Francisco Duque III na plano ng gobyerno na magbigay ng second dose sa pitong milyong Pilipino sa second leg ng isasagawang mass vaccination drive mula Disyembre 15 hanggang 17.

Hanggang nitong Disyembre 6, tinatayang nasa 38.7 milyon indibidwal ang fully vaccinated na laban sa COVID-19, batay sa datos ng gobyerno.

Sa lugar na nasa Alert Level 2... Christmas party, puwede na – DILG

ni Lolet Abania | December 3, 2021

Ipinahayag ng Department of the Interior and Local Government (DILG) ngayong Biyernes na ang in-person Christmas parties ay papayagan na sa mga lugar na nasa ilalim ng Alert Level 2 , subalit dapat pa ring sumunod sa mga health protocols at limitado ito sa 50% venue capacity.

“In Alert Level 2 areas, it is allowed at 50% venue capacity, and additional 10% if the venue has a safety seal, minimum public health standards such as wearing of face mask, social distancing, should be strictly observed, too,” ani DILG Undersecretary Jonathan Malaya sa Laging Handa briefing.

“If these Christmas parties violate these, then the safety seal will be revoked and the business permit of the establishment will be suspended,” dagdag ni Malaya.

Ang Metro Manila ay nananatili pa rin sa Alert Level 2 hanggang Disyembre 15.

Sa ilalim ng Alert Level 2, ikalawa sa pinakamababa sa bagong ipinatutupad na COVID-19 alert level system, papayagan ang mga establisimyento at mga aktibidad nito sa 50% indoor capacity para sa fully vaccinated na nasa edad na o adults (at minors, kahit hindi pa bakunado) at 70% capacity para naman sa outdoor events.