Para sa mas murang gamot Botika ng Bayan, dapat palakasin — DILG

ni Lolet Abania | February 22, 2022

Ipinag-utos ng Department of the Interior and Local Government (DILG) sa mga local government units (LGUs) na dapat nilang palakasin ang mga Botika ng Bayan at Botika ng Barangay programs sa gitna ng mga reports na ilang sari-sari stores ang nagbebenta ng mga medisina at at pekeng gamot na ipinagbabawal sa batas.

Una nang hinimok ni DILG Secretary Eduardo Año, ang mga LGUs na mag-isyu ng mga ordinansa hinggil sa pagbabawal nito, at sa Philippine National Police (PNP) na arestuhin ang mga violators na mababatid na sangkot sa hindi awtorisadong pagbebenta ng mga gamot.

“Mayroon din tayong pag-uutos na i-strengthen ng ating mga LGUs ‘yung mga ibang programa ng pamahalaan katulad ng Botika sa Barangay at saka Botika ng Bayan,” pahayag ni Año sa isang interview ngayong Martes.

Ayon kay Año, mayroong tinatayang 170 Botika ng Bayan outlets ang itinayo ng pamahalaan sa buong bansa.

Matatandaan na ang Botika ng Barangay program ay inilunsad sa ilalim ng administrasyon ni dating Pangulong Gloria Macapagal-Arroyo noong 2001. Ito naman ay ni-revived noong 2018 sa ilalim ng pangalang Botika ng Bayan.

“’Yung Botika ng Barangay dating programa simula pa sa panahon ni GMA na kung saan sa mga barangay tinutulungan din ng LGU na ang isang committee or organization or isang NGO puwede magtayo ng drug outlet basta mayroong isa lang nagsu-supervise na pharmacist at tinutulungan natin ‘yan na maaprubahan para ito magsisilbing bilihan na mga gamot na mas mura kesa doon sa tinatawag na drugstore,” paliwanag ni Año.

“’Yung Botika ng Bayan eto sinimulan ‘yan sa panahon ni Pangulong Duterte noong 2018, mga 4th and 5th class municipalities ‘yung malalayo libre naman to ‘yung mga gamot na ordinaryong sakit libre ‘yan sa mga 170 Botika ng Bayan mayroon tayo sa buong bansa, kaya maganda na i-strengthen natin ‘yan,” dagdag ng opisyal.

Ayon kay Año, naglaan ang Department of Health (DOH) ng budget sa naturang programa at aniya, nagdagdag pa ang ahensiya ng pondo para rito upang matiyak na magkakaroon ang mga malalayong munisipalidad ng Botika ng Bayan.

May-ari ng sari-sari stores na magbebenta ng gamot, arestuhin — DILG

ni Lolet Abania | February 17, 2022

Sisimulan na ng Department of the Interior and Local Government (DILG) ang paghahanap sa mga sari-sari stores na nagbebenta ng mga medisina at mga pekeng gamot na ipinagbabawal sa batas.

Ayon kay DILG Secretary Eduardo Año, inatasan na niya ang Philippine National Police (PNP) na arestuhin ang sinumang violators na magiging sangkot sa hindi awtorisadong pagbebenta ng mga gamot.

“Inatasan din natin ang PNP na siguraduhing hindi nagbebenta ng gamot ang mga sari-sari store at arestuhin ang sumusuway sa batas lalo na iyong mga naglalako ng pekeng gamot,” sabi ni Año.

Hinimok din ni Año ang mga local government units (LGUs) na mag-isyu ng mga ordinansa patungkol dito.

“LGUs should protect the health and general welfare of their constituents. We, therefore, urge LGUs to ensure that sari-sari stores within their jurisdictions are not selling any medicine because under the law, hindi sila awtorisado,” sabi ni Año sa isang statement.

Una nang ini-report ni Food and Drug Administration (FDA) officer in charge Director General Oscar Gutierrez Jr. na tinatayang nasa 185 sari-sari stores mula sa National Capital Region, Region IV-A at Region V, ang nabatid na nagbebenta ng mga medisina, kabilang na ang mga COVID-19 related drugs.

Katuwang ang FDA, ayon kay Año, magpapalabas siya ng isang Memorandum Circular (MC) sa mga LGUs para matigil na ang pagbebenta ng mga gamot sa mga sari-sari stores at ibang mga outlets na walang FDA authorization.

“Sisiguraduhin natin na aaksyunan ito ng ating mga LGUs at ng ating kapulisan dahil kalusugan at kapakanan ng ating mga kababayan ang nakataya rito,” sabi pa ni Año.

Ilang political party umapela sa Comelec na payagan ang selfie sa campaign rallies

ni Jasmin Joy Evangelista | February 10, 2022

Nagpasa ng petisyon ang ilang political parties sa Commission on Elections (Comelec) upang hilingin na payagan ang pakikipag-selfie ng mga kandidato sa campaign rallies, ayon kay Department of the Interior and Local Government spokesperson Jonathan Malaya nitong Huwebes.

Sa isang panayam, sinabi ni Malaya na ang kanilang departamento, na siyang nagmo-monitor ng implementation ng health protocols sa campaign rallies, ay naghihintay lamang ng desisyon mulasa Comelec hinggil sa usaping ito.

“Ang alam ko po may petition na ang ilang political parties sa Commission on Elections, so inaantay na lang po natin yung kanilang magiging decision,” aniya.

"Kami po ay deputized lamang ng Comelec at kami po ay hindi gumagawa ng polisiya," dagdag pa ni Malaya.

Sa ilalim ng Section 14 of Comelec Resolution 10372, kabilang sa mga ipinagbabawal na aktibidad sa in-person campaigns ay pagkuha ng selfie, photographs at mga kahalintulad na aktibidad na magkakaroon ng close proximity sa pagitan ng kandidato, mga kasama nito, at ng publiko.

Anumang election offense ay parurusahan sa ilalim ng Section 264 ng Omnibus Election Code, kung saan ang parusa sa violators ay pagkakakulong ng hindi bababa sa isang taon at hindi lalagpas ng anim na taon.

Sinumang mapapatunayang guilty ay madi-disqualified na magkaroon ng puwesto sa public office at deprivation of voting rights.

Ang mga political party naman na mapapatunayang lumabag ay pagmumultahin ng hindi bababa sa P10,000.