Recognition system, gagamitin para sa pinakamalinis na mga barangay — DILG

ni Eli San Miguel - Trainee @News | January 7, 2024

Sinabi ng Department of Interior and Local Government ngayong Linggo na itatatag nila ang isang recognition system na magmamasid, pipili, at magbibigay ng parangal sa pinakamalinis na mga barangay sa bansa.

Ayon sa DILG, ang inisyatibang ito ay katuwang sa direktiba ni Pangulong Ferdinand 'Bongbong' Marcos Jr. sa anyo ng 'Kalinga at Inisyatiba Para sa Malinis na Bayan' o ang KALINISAN Program.

Noong Sabado, pinangunahan ni Interior Secretary Benhur Abalos ang pambansang paglulunsad ng KALINISAN Program sa Baseco Compound sa Maynila.

Kaakibat nito, nanawagan si Abalos sa lahat ng local government units (LGUs) sa buong bansa na maglaan ng pondo para sa wastong solid waste management at ekolohikal na mga gawain, pati na rin ang pagsusulong sa mga lokal na otoridad na magpasa ng mga ordinansa na magtatakda ng parusa na community service para sa mga mahuhuling nagtatapon ng basura sa pampublikong lugar.

'Kalinisan' cleanup drive, inilunsad ng gobyerno

ni Eli San Miguel - Trainee @News | January 6, 2024

Naglunsad ang pamahalaan ng isang pambansang kampanya sa paglilinis ngayong Sabado na tinatawag na "Kalinga at Inisyatiba Para sa Malinis na Bayan" o Kalinisan program, na nakatutok sa pagpapabuti ng "bayanihan spirit" ng mga Pilipino sa pagkontrol ng solid waste.

Pinangunahan nina Interior Secretary Benhur Abalos at Metropolitan Manila Development Authority (MMDA) chairman Romando Artes ang kampanyang paglilinis sa Baseco Compound, Manila.

Ayon sa Department of the Interior and Local Government (DILG), layunin ng programang ito ang pag-isahin ang mga programa ng ahensya sa pamamagitan ng pagkontrol ng solid waste, community gardening, at kampanya sa paglilinis.

Magkakaroon ng parangal para sa mga barangay, bayan, at probinsya na may pinakamalinis na paligid batay sa isang kriterya na ilalabas ng DILG.

Daan-daan naman ang mga boluntaryo mula sa Bureau of Fire Protection, Bureau of Jail Management and Penology, Pantawid Pamilyang Pilipino Program, at mga barangay ng Baseco Compound ang dumalo sa kaganapan.

DILG, maglulunsad ng enviromental drive sa Enero 6

ni Eli San Miguel - Trainee @News | January 4, 2024

Maglulunsad ang Department of the Interior and Local Government (DILG) ng 'Kalinisan Program' sa Sabado, Enero 6, na naglalayon ng mga pagsisikap upang tiyakin ang malusog at ligtas na kapaligiran.

Obhektibo ng inisyatibang ito na palakasin ang mga LGU at itaguyod ang partisipasyon ng komunidad sa pamamagitan ng tradisyunal na 'bayanihan' scheme.

Kilala rin bilang 'Kalinga at Inisyatiba para sa Malinis na Bayan' program, tinukoy ng DILG Memorandum Circular (MC) 2024-001 na layunin ng hakbang ang pagtaas ng kamalayan at pakikilahok ng publiko sa mga responsibilidad sa kalikasan sa pamamagitan ng tamang palilinis ng basura.

Binigyang-diin ng DILG na kaugnay ang programa sa kampanyang Bagong Pilipinas, na nagtataguyod ng dedikasyon ng estado tungo sa malalim at mahahalagang pagbabago sa lahat ng sektor ng lipunan.