NBI sa DFA: Passport ni Teves, kanselahin

ni Mylene Alfonso | May 11, 2023

Plano ng National Bureau of Investigation (NBI) na ipakansela sa Department of Foreign Affairs (DFA) ang pasaporte ng suspendidong si Negros Oriental Representative Arnolfo “Arnie” Teves, Jr., na patuloy na nagtatago.

Sinabi ni Justice Secretary Jesus Crispin Remulla na maghahain ang NBI ng kanselasyon ng passport sa DFA, ang NBI sa sandaling maisampa na ang kasong murder kay Teves bilang mastermind sa pagkamatay ni Negros Oriental Governor Roel Degamo at siyam na iba pa.

“When the other charges are filed, we will file for the cancellation of his passport,” sabi ni Remulla.

Nabatid na si Teves ay may pasaporte na iba ang nationalities.

Posibleng sa Lunes ay maisampa na ang kaso laban kay Teves.

“We can cancel the passport. Pero may hawak na ibang passport 'yan. May hawak pa 'yan na ibang passport… may hawak pa, ibang nationality, may hawak 'yan,” dagdag pa ni Remulla.

Matatandaang noong Martes, inihayag ni Remulla na pumasok si Teves sa Timor-Leste upang humingi ng political asylum.

Nabatid na palipat-lipat umano si Teves ng lugar at posibleng pumasok din sa South Korea.

Mga Pinoy sa Sudan, ililikas na

ni Gina Pleñago | April 22, 2023

Sisimulan na ng Department of Foreign Affairs (DFA) ang land evacuation ng mga Filipino na naiipit sa kaguluhan sa Sudan sa susunod na linggo.

Ipinaliwanag ni DFA Undersecretary for Migrant Workers Affairs Eduardo de Vega, na hindi madali ang paglilikas sa mga Pinoy sa Sudan dahil hindi magagamit ang airport bunga ng bakbakan ng Sudanese Armed Forces at Paramilitary Rapid Support Forces.

Maaari umanong makipag-ugnayan sa kanila ang mga Pinoy sa Sudan sa Philippine Embassy officials via +20 122 743 6472 at via PHinEgypt Facebook messenger account.

Ang pinakamalapit na Philippine Embassy sa Sudan ay nasa Egypt pero mayroong honorary consulate ang Pilipinas sa Sudan na handang magbigay ng tulong sa mga Pinoy doon tulad ng groceries at iba pa nilang kailangan.

Una rito, kinumpirma ng DFA na isang Pinoy ang nasugatan dahil sa kaguluhan doon.

Maayos na ang kalagayan ng naturang Pinoy.

Tinatayang 350 katao na ang nasawi sa kaguluhan sa Sudan, habang nanawagan ang United Nations sa dalawang naglalabang grupo na magpatupad ng three-day ceasefire kaugnay na rin ng paggunita sa pagtatapos ng Ramadan o pagtatapos ng pag-aayuno ng mga Muslim, at para mailikas ang mga sibilyan.

Nagsimula ang kaguluhan sa Sudan nitong Sabado, sa pagitan ng dalawang military generals na nagsagawa ng kudeta at umagaw ng liderato ng bansa noong 2021.

Ang isang grupo ay pinamumunuan ni Army chief Abdel Fattah al-Burhan, habang ang kabilang grupo ay hawak ng kanyang dating deputy na si Mohamed Hamdan Daglo.

Career diplomat Enrique Manalo, itinalagang DFA chief

ni Lolet Abania | July 1, 2022

Itinalaga ni Pangulong Ferdinand “Bongbong” Marcos Jr. si career diplomat Enrique Manalo bilang kalihim ng Department of Foreign Affairs (DFA) kapalit ni Teodoro Locsin Jr. Nanumpa si Manalo kay Pangulong Marcos sa Malacañang ngayong Biyernes.

Si Manalo ang unang career diplomat na na-appoint bilang DFA chief ng halos dalawang dekada na matapos ni Delia Domingo Albert, ang kauna-unahang babaeng lider ng departamento.

Ang 69-anyos na si Manalo ay naging acting DFA secretary mula Marso 9 hanggang Mayo 17, 2017, matapos na si Perfecto Yasay ay nabigong makakuha ng confirmation ng bicameral Commission on Appointments (CA) bilang DFA secretary.

Si Manalo, na nagretiro mula sa Foreign Service noong 2018, ay nagsilbi bilang Philippine Permanent Representative to the United Nations sa New York sa ilalim ni dating Pangulong Rodrigo Duterte mula 2020 hanggang Hunyo 30, 2022.

Bago ang kanyang posisyon sa New York, si Manalo ay Undersecretary for Policy ng DFA. Isang experienced diplomat, si Manalo ay nagawa nang humarap sa mga diplomatic crises, kabilang na ang South China Sea disputes, na may impresibong kahinahunan.

Ang mabigat na trabahong ito ay muling iniatang kay Manalo kasabay ng mga hamon sa bagong administrasyon habang kayanin nitong makipagdayalogo sa patuloy na territorial disputes sa China kaugnay sa South China Sea.