Pagle-level-up sa kasanayan ng mga titser, isinusulong ni Gatchalian

ni Mary Gutierrez Almirañez | February 18, 2021

Isinusulong ni Senator Sherwin Gatchalian ang Teacher Education Council Act sa ilalim ng Senate Bill No. 1887.

Nakasaad sa kanyang Twitter account noong ika-16 ng Pebrero, ito ay repormang magpapatibay sa Teacher Education Council at National Educators Academy of the Philippines (NEAP) upang maitaas ang kalidad ng kasanayan ng mga guro sa bansa.

Aniya, “Ang ating pagpapatibay sa National Educators Academy of the Philippines ay isa sa ating mga panukalang hakbang upang matiyak na tuluy-tuloy ang ating pagbibigay ng de-kalidad na pagsasanay sa ating mga guro at school leaders upang maiangat ang kanilang mga kakayahan nang sa gayon ay maiangat din natin ang kakayahan ng ating mga mag-aaral.”

Layunin nito ang mga sumusunod:

• Mapataas ang bilang ng mga miyembro ng Teacher Education Council

• Maitatag ang National Educators Academy of the Philippines (NEAP) bilang bahagi ng Department of Education (DepEd)

• Matiyak ang patuloy na ugnayan sa pagitan ng pre-service at in-service na edukasyon

• Magarantiyang inilapat nang patas ang propesyonal na pamantayan para sa mga guro at pinuno ng paaralan

• Magsagawa nang malawak na pagsasaliksik na nakadirekta sa kalidad ng guro at pinuno ng paaralan

“Kailangan nating ituring na nasa ilalim ng isang malawakang krisis ang ating sistema ng edukasyon. Hindi na natin kailangang patagalin pa ang pagsulong sa mga reporma dahil kung hindi, patuloy na mahuhuli at mapag-iiwanan ang ating mga mag-aaral,” dagdag pa niya.

Mga iskul gagawing COVID-19 vaccination centers, pinalagan ng DepEd

ni Lolet Abania | January 27, 2021

Hindi lahat ng mga clinic at classroom sa mga pampublikong paaralan ay maaaring gamitin bilang vaccination centers ng COVID-19.

Ito ang naging tugon ni Department of Education (DepEd) Secretary Leonor Briones, kung saan nakipag-usap na ang ahensiya sa Department of Health (DOH) sa suhestiyon nito na paggamit ng mga school facilities at gawing vaccination centers.

“Kailangang iplano 'yan nang maayos kasi mayroon tayong schools na malaki ang clinic, mayroon namang schools na maliit lang. So, depende 'yan sa sitwasyon ng eskuwelahan,” sabi ni Briones sa Laging Handa public briefing ngayong Martes.

“Hindi tayo makasabi generally lahat ng clinics magagamit, dahil baka mag-create pa ng problema kasi maliit masyado, kulang ang personnel o malayo sa isang health station,” dagdag pa ng kalihim.

Aniya, kinakailangan na pinag-iisipan nang mabuti ng mga opisyal sakaling balak nilang gamitin bilang quarantine at vaccination centers ang mga paaralan dahil maraming dapat na ikonsidera rito.

“Dapat hindi sila magkalapit. Kung may quarantine center, we think twice about using them also as vaccination center, especially kung iyong campus iisa lamang,” ani Briones.

Binigyang-diin pa ni Briones na hindi dapat kabilang ang mga public school teachers sa mga tutulong sa pagtuturok ng vaccine kontra sa COVID-19. “Idine-deny namin iyong perception na ang mga teacher ay sila mismo ang mag-vaccinate,” saad ni Briones.

Davao, Cotabato at NCR, out sa dry run ng face-to-face classes

ni Thea Janica Teh | December 16, 2020

Hindi sasali sa pilot implementation ng face-to-face classes sa Enero ang Davao City at Cotabato, ayon sa Department of Education (DepEd) ngayong Miyerkules.

Ayon sa Coordinating Council of Private Educational Associations (COCOPEA), hindi pa handa ang mga eskuwelahan sa bansa na magsagawa ng face-to-face class ngayong school year.

Nauna na ring nagsabi ang Metro Manila council na hindi sasali ang National Capital Region sa dry run ng face-to-face classes sa January.

Ibinahagi ni COCOPEA Managing Director Joseph Noel Estrada na hindi pa umano kumokonsulta sa kanila ang DepEd patungkol sa pagbabalik ng face-to-face classes sa ibang lugar.

Dagdag pa ni Estrada, huli na para pag-usapan ang face-to-face classes dahil dapat ay isinagawa ito bago pa magsimula ang school year.

Hindi na umano nakapagplano at nakapaghanda ng budget ang mga paaralan para rito.

Samantala, tinatayang nasa 1,000 paaralan sa buong Pilipinas ang hinirang ng DepEd sa pagsali sa implementasyon ng face-to-face classes sa susunod na taon.

Ang dry run ay gagawin sa mga lugar na may mababang kaso ng COVID-19.

Noong Mayo, matatandaang hindi pinayagan ng pamahalaan ang pagsasagawa ng face-to-face classes hangga’t wala pang COVID-19 vaccine.