Face-to-face classes, puwede sa lugar na mababa ang covid cases — VP Leni

ni Jasmin Joy Evangelista | August 30, 2021

‘Missed opportunity’ umano para kay Vice- President Leni Robredo ang isa’t kalahating taon na hindi man lang nakapag-face-to-face classes sa mga lugar na may low risk COVID-19 dahil maraming mga estudyante ang hirap sa distance learning.

Nanghihinayang umano siya dahil hindi ito nagawa bago pa kumalat ang nakahahawang Delta variant.

"Sa akin, 'yung nakalipas na isa't kalahating taon, 'missed opportunity' iyon. Noong wala pang Delta variant, sobrang daming [local government units] all over the Philippines 'yung wala namang cases," sabi ni Robredo sa kanyang radio show ngayong Linggo.

Noong nakaraang taon ay nagtayo ang Office of the Vice- President ng mga community learning hub sa 58 lugar, kung saan maaaring matulungan ang mga estudyanteng walang gadgets at hirap sa pag-aaral gamit ang printed modules.

Magsasagawa sana ang Department of Education ng dry run ng limitadong face-to-face class sa ilang low-risk area nitong taon pero kinansela ito ni Pangulong Rodrigo Duterte dahil hindi raw siya papayag sa face-to-face classes hangga't hindi nakakamit ng bansa ang herd immunity.

"Dapat ipakita nila (DepEd) na not 'one size fits all.' Parang resigned na tayo. 'Di natin naiisip ang mga bata," dagdag ni Robredo.

Distance learning pa rin ang paraan ng pagkatuto sa muling pagsisimula ng school year sa mga pampublikong paaralan sa darating na Setyembre 13.

Private schools, puwede nang magsimula ng SY 2021-2022

ni Lolet Abania | June 25, 2021

Inianunsiyo ng Department of Education para sa mga pribadong eskuwelahan at non-DepEd public schools na maaari na nilang simulan ang pagbubukas ng klase para sa school year 2021-2022 sa kabila ng nakabinbing pag-apruba sa bagong general school opening at calendar.

Ayon sa DepEd, puwede na nilang buksan ang kanilang mga klase, subalit ang mga eskuwelahan ay kailangang magpatupad lamang ng distance learning modalities at wala dapat face-to-face interactions.

Ang advisory na nakasaad sa dokumento ay may petsang June 23, 2021 at pirmado ni DepEd Secretary Leonor Briones.

Ang mga pribado at non-DepEd schools, kung saan unang sisimulan ang klase bago ang general school opening, ay dapat magsumite ng mga pertinent documents sa regional director bilang mandato sa ilalim ng DepEd Order No. 13, s. 2020 at DepEd Order No. 17, s. 2020 para sa readiness assessment.

Gayunman, ang naturang ahensiya ay target na buksan ang klase sa ilalim ng blended learning scheme sa Agosto o Setyembre.

Ito ay matapos na hindi aprubahan ni Pangulong Rodrigo Duterte ang mungkahi nilang magsagawa ng limited face-to-face classes sa mga lugar na may mabababang transmission rate ng COVID-19.

Patuloy naman ang DepEd sa pagbibigay ng de-kalidad na edukasyon sa kabila ng panganib ng pandemya ng COVID-19.

Mga titser at taga-DepEd, next na sa bakuna

ni Lolet Abania | May 20, 2021

Maaari nang magparehistro para sa pagbabakuna kontra-COVID-19 ang lahat ng mga manggagawa sa larangan ng edukasyon, kahit na hindi sila nasa vaccination priority list gaya ng mga senior citizens o may comorbidities sa pamamagitan ng kanilang local government units (LGUs), ayon sa Department of Education (DepEd).

“'Yung teachers and education personnel, even if without comorbidities or not seniors, can already register sa LGUs, kasi kasunod na sila as A4 priority [group],” ani DepEd Undersecretary Annalyn Sevilla sa isang interview.

“Pero depende pa rin sa volume of vaccines sa LGUs,” dagdag ni Sevilla.

Hinimok naman ng mga opisyal ang mga education workers na magpabakuna na laban sa COVID-19, kung saan paniwala nilang ito ang daan para mas maging ligtas sa muling pagbubukas ng mga eskuwelahan.

Ilang mga grupo na rin ang nanawagan para sa muling pagbubukas ng mga paaralan dahil ang mga guro, magulang at estudyante ay patuloy na nahihirapan sa ipinatutupad na distance learning.

Nitong linggo lamang, maraming mga empleyado ng tatlong higher education institutions sa Metro Manila ang nakatanggap na ng kanilang unang dose ng COVID-19 vaccines na tinawag na “symbolic vaccinations” bilang bahagi na rin ng pagdiriwang ng 1st National Higher Education Day.

Ayon naman kay Chief Implementer at Vaccine Czar Secretary Carlito Galvez, Jr., sisimulan na ng pamahalaan ang pagbabakuna sa mga A4 group matapos ang Mayo o kapag tuluy-tuloy na ang supply ng mga vaccines.