21M estudyante, nakapag-enrol para sa School Year 2021-2022

ni Lolet Abania | September 9, 2021

Nakapagtala ang Department of Education (DepEd) ng kabuuang 21,034,472 o nasa 80.2 porsiyento lamang ng mga estudyante na nai-record noong nakaraang taon na nakapag-enrol sa ngayon para sa School Year 2021-2022.

Base sa latest data ng DepEd, nasa 15,320,766 estudyante ang nag-register sa pampublikong paaralan; nasa 1,132,632 naman sa pribadong eskuwelahan; at 23,747 sa state universities at colleges kabilang na sa mga lokal na unibersidad at kolehiyo.

Nasa tinatayang 4,557,327 estudyante naman ang nag-sign up para sa early registration. Ang rehiyon na may pinakamaraming enrollees ay Calabarzon na nasa 2,905,646, kasunod ang Central Luzon na may 2,167,516 enrollees at ang National Capital Region na nasa 1,993,601.

Para sa Alternative Learning System, ayon sa DepEd nasa 184,382 o 30.76% ng estudyante noong nakaraang taon ang nakapag-enrol sa ngayon.

Nagbukas na ang klase nitong Lunes, Setyembre 13, habang ang ibang private schools naman ay nauna nang makapagsimula ng kanilang online classes.

Nitong Miyerkules, umapela si DepEd Undersecretary Nepomuceno Malaluan sa mga learners at mga magulang na huwag na sanang hintayin pa ang huling araw ng enrollment para makapag-register.

“Right now, the regular enrollment period is up to September 13, on first day of classes. No announcement yet as to late enrollment,” ani Malaluan sa isang mensahe sa mga reporters.

Magugunitang noong nakaraang taon, Oktubre 5 ay nagsimula ang klase o distance learning na ang kabuuang bilang ng mga enrollees ay naitala sa 24.7 milyong estudyante.

Ayon sa DepEd, ito ay nasa 89% lamang ng kabuuang enrollment sa panahon ng School Year 2019-2020.

Sinabi pa ng ahensiya na noong nakaraang taon, tinatayang 398,000 estudyante mula sa private schools ang nag-transfer na lamang sa public schools sa gitna ng COVID-19 pandemic.

Mapa-online o face-to-face… #WalangPasok: Mga lugar na may kanselasyon ng klase ngayong Setyembre 7

ni Jasmin Joy Evangelista | September 7, 2021

Kanselado ang klase ngayong Setyembre 7, 2021, sa ilang lugar sa bansa dahil sa bagyong Jolina.

Kabilang sa mga lugar na walang pasok ay ang mga sumusunod:

• Albay: online at face-to-face

• Eastern Samar: all levels, public and private

• Northern Samar: all levels, public and private

Ito ay dahil maaaring magdulot ng power interruptions at signal problems sa mga internet dahil sa nasabing bagyo.

Gayundin, ang mga guro at ilang school personnel ay patuloy na pumapasok sa paaralan upang doon isagawa ang online classes dahil sa problema sa internet at upang mag-report sa kani-kanilang school heads.

Matatandaang kamakailan ay nag-anunsiyo ang DepEd na maaaring ibalik ang face-to-face classes sa ilang lugar sa bansa na wala o may mababang kaso ng COVID-19.

Enrollment hanggang Sept. 13 — DepEd

ni Lolet Abania | September 3, 2021

Nakapagtala ang Department of Education (DepEd) ng kabuuang 16,038,442 o 61.2 porsiyento ng mga estudyanteng nakapag-enroll para sa School Year 2021-2022 hanggang ngayong Biyernes.

Base sa pinakabagong datos ng DepEd, may 10,794,716 estudyante ang nag-register sa pampublikong paaralan; 671,660 sa pribadong eskuwelahan; at 14,739 sa state universities at colleges, kabilang dito ang mga lokal na unibersidad at kolehiyo.

Nasa tinatayang 4,557,327 estudyante naman ang nakapag-sign-up para sa early registration ngayong school year. Ang rehiyon na may pinakamaraming enrollees ay nasa Calabarzon na umabot sa 2,481,554; kasunod ang Central Luzon na nasa 1,591,509; at National Capital Region na nasa 1,577,155.

Para naman sa Alternative Learning System (ALS), sinabi ng DepEd na may kabuuang 130,418 o 21.76% ng mga estudyante nu’ng nakaraang taon ang nakapag-enroll sa ngayon.

Sinabi naman ng DepEd na magpapatuloy pa rin ang regular enrollment ng hanggang Setyembre 13, 2021, habang inaasahang tataas pa ang bilang ng mga estudyante na sasabak muli sa online learning.

Ayon sa DepEd, nakatakda ang pagsisimula ng school year sa Setyembre 13, subalit, sinabi ng ahensiya na may mga private schools na sinimulan na nang maaga ang kanilang online classes.

Matatandaang noong nakaraang taon nang magbukas ang klase ng Oktubre 5, 2020, ang kabuuang bilang ng mga enrollees na nai-record ng DepEd ay nasa 24.7 milyon.

Batay pa sa DepEd, ito ay nasa 89% lamang ng kabuuang enrollment sa panahon ng School Year 2019-2020. Gayundin, ayon sa ahensiya, noong nakaraang taon ay tinatayang nasa 398,000 estudyante na mula sa private schools ang nag-transfer sa public schools sa gitna ng nararanasang pandemya.