Limited face-to-face classes, aprubado na ng Malacañang

ni Jasmin Joy Evangelista | September 20, 2021

Inaprubahan na ni Pangulong Rodrigo Duterte ang pilot implementation ng face-to-face classes ayon kay Presidential Spokesperson Harry Roque.

Sinabi ito ni Roque sa ginanap na Palace briefing ngayong araw.

Ayon sa mga opisyal ng Department of Education (DepEd), 120 paaralan ang isasalang sa pilot testing kung saan 100 dito ay public schools habang 20 naman ang private.

Ang mga napiling paaralan ay kabilang sa mga lugar na may mababang kaso ng COVID-19 at iyong mga nakapasa sa readiness standards ng DepEd at DOH.

Matatandaang ang DepEd dry run ay isasagawa sana sa mga unang buwan ng taon ngunit kinansela ito ni Pangulong Duterte dahil sa patuloy na pagtaas ng kaso ng COVID-19 sa bansa.

120 eskuwelahan ready na sa face-to-face classes — DepEd

ni Lolet Abania | September 17, 2021

Handa na ang Department of Education (DepEd) para ipagpatuloy ang face-to-face classes sa tinatayang 120 eskuwelahan.

“We have spent a lot of time studying the implementation of pilot face-to-face classes amid the COVID-19 pandemic, and we are ready for it,” ani DepEd Secretary Leonor Briones sa Laging Handa briefing ngayong Biyernes.

“We initially identified 1,900 schools, then it was reduced to 600 plus schools... now we are ready to implement face-to-face classes in 100 public schools and 20 private schools. We are just waiting for the go signal from the President,” dagdag niya.

Ayon kay Briones, base sa payo ng mga medical experts, ang mga tinatawag na younger learners ang dapat na iprayoridad sa pagbabalik ng face-to-face classes dahil sa kinakailangan nila na ma-develop ang kanilang socialization skills o pakikipagtalastasan, study habits, at good manners and right conduct o magandang-asal.

Batay sa records ng DepEd, tinatayang nasa 27.5 milyon estudyante sa ilalim ng formal education ang nakapag-enroll para sa ikalawang sunod na school year sa gitna ng COVID-19 pandemic, kung saan isinagawa ang online classes at paggamit ng modules o printed learning materials.

Bahagyang mas mataas ang enrollment ngayong taon, kumpara nang nakaraang taon na 26.2 milyon enrollees.

Sa mga learners na nasa ilalim ng non-formal education ay umabot naman sa 202,000 ngayong taon.

“We can gradually shift in doing away with printed materials and further digitization of our learning materials, but health and safety remain the most important,” sabi ni Briones.

Gayunman, hindi pa nagdedesisyon si Pangulong Rodrigo Duterte kung papayagan niya na ipagpatuloy ang face-to-face classes dahil ayon sa Pangulo ayaw niya ipagsapalaran ang kalusugan ng mga kabataan.

Gayundin, hindi pa inaawtorisa ng gobyerno ang COVID-19 vaccination sa mga edad 17 at pababa dahil na rin sa kakulangan ng mga bakuna.

Kakulangan sa module at data allowance, problema pa rin ng mga guro ngayong pasukan

ni Jasmin Joy Evangelista | September 13, 2021

Sa muling pagbubukas ng klase, problema pa rin daw ng mga guro ang kakulangan ng modules at ng data allowance.

Ayon kay Benjo Basas, chairperson ng Teachers' Dignity Coalition, may mga gurong kailangan pang mag-print ng modules para sa klase.

"Parang halos walang pinagbago kasi nung October 2020, nakita naman natin ang problema sa modules na up to now problema pa rin," ani Basas sa isang panayam.

"Marami sa'ming nagre-report na wala pa rin silang modules to think na pasukan na ngayong araw. ‘Yung mga teacher pa rin natin ang gumagawa. Tuloy-tuloy ang printing sa respective houses ng ating mga guro”, dagdag niya.

Sabi pa ni Basas, kailangan daw mag-provide ng gobyerno ng data allowance at laptops para sa mga guro.

Matatandaang nagpamigay ang DepEd ng data allowance sa pamamagitan ng sim cards noong nakaraang taon, pero karamihan daw sa mga guro ay nag-avail na ng sariling prepaid at postpaid plans.

Nagpamahagi rin ng 40,000 laptops ang DepEd ngunit malayo pa ito sa bilang ng mga teaching personnel sa bansa na halos 1 milyon, aniya.

"Yung laptop dapat hindi ito binibili mula sa sariling bulsa ng mga guro at lalong dapat ‘di ito pinapautang kasi the GSIS suffered din for laptop loans," sabi ni Basas.

Kabilang ang Pilipinas sa mga bansa na nananatiling distance learning ang paraan ng edukasyon dahil sa pandemya.