Bago pa mag-face-to-face classes... 29 paaralan, nag-back out – DepEd

ni Lolet Abania | October 19, 2021

Binawi na ng tinatayang 29 eskuwelahan ang kanilang pagsali sa nakatakdang pagsisimula ng face-to-face classes sa Nobyembre 15 ng Department of Education (DepEd) dahilan sa ang kanilang local government units (LGUs) at ilang mga magulang ay tumanggi nang makiisa sa naturang programa.

Sa isang press conference ngayong Martes, sinabi ni DepEd Director Malcolm Garma na nasa 30 paaralan na lamang mula sa 59 eskuwelahan ang magpa-participate para sa pilot face-to-face classes.

“Doon sa 59 na naunang listahan, 30 rito ang magsisimula ng pilot face-to-face sa November 15,” paliwanag ni Garma.

Bukod sa hindi pagsang-ayon ng mga naturang LGUs at mga magulang, ayon kay Garma, ilang paaralan ang nag-back out dahil sa pagtaas ng kaso ng COVID-19 sa kanilang lugar.

Magugunitang ang DepEd regional offices ay pumili ng kabuuang 638 eskuwelahan para sa pilot run ng face-to-face classes.

Sinuri naman ng Epidemiology Bureau ng Department of Health (DOH) ang daan-daang paaralan at inaprubahan lamang nito ang 59 eskuwelahan para sa pagsisimula ng face-to-face classes dahil ito sa naitalang minimal o low risk sa COVID-19 ang kanilang lugar.

Matatagpuan ang mga paaralan sa Bicol, Western Visayas, Central Visayas, Zamboanga Peninsula, Northern Mindanao, at Soccsksargen Regions.

Gayunman, base sa latest at unofficial information, ayon kay Garma umabot ito sa 70 eskuwelahan na nakatakda sanang magsimula ng face-to-face classes sa Nobyembre 15.

Subalit paliwanag ng opisyal na ang naturang bilang ay maaari pang magbago depende sa LGUs, mga magulang at ang trend ng COVID-19 cases sa mga nabanggit na lugar.

Ayon pa kay Garma, kung pagbabatayan ang kanilang memorandum, layon ng DepEd na magkaroon ng 100 pampublikong paaralan at 20 pribadong eskuwelahan na makikiisa sa pilot run ng face-to-face classes.

DepEd Sec. Briones, ginawaran ng Lifetime Contributor Award sa 12th Asia CEO Awards

ni Jasmin Joy Evangelista | October 15, 2021

Ginawaran si Education Sec. Leonor Briones ng Lifetime Contributor Award for the public sector sa ginanap na 12th Asia CEO Awards nitong Martes (Okt. 12).

Ito ay para sa kanyang natatanging kontribusyon sa papapaunlad ng bansa at pagtugon sa mga hamon sa pangunahing edukasyon.

“On behalf of the executives of the public sector who spend their lives serving, giving service to our people, and sacrificing, I humbly accept this award,” ani Briones.

“I would like to thank the Asia CEO Awards for this honor, for recognizing the complementarity between and among the public sector and private sector executive leadership,” dagdag niya.

Ang Lifetime Contributor Award ang pinakamataas na karangalan sa ASIA CEO Awards, na kumikilala sa mga pinuno at tagapagtaguyod sa bansa para sa kanilang mga natatanging tagumpay at kontribusyon sa bansa.

Ayon sa Puno ng Edukasyon, ikinagagalak niya na ang pribado at pampublikong sektor ay nagkaisa sa isang adhikain sa pagsisilbi sa bansa.

“We used to think of each other separately because we thought we had different goals, but we now see a congruence, a convergence in the meeting of our common goals, especially at this time of the pandemic. There is a recognition that executive leadership, wherever it is in the public sector or private sector, serves the country, serves the Filipino, and in the case of education, serves the learners and the children,” aniya.

Ang Asia CEO Awards ay naglalayong itaguyod ang kahusayan sa pamumuno at pagtutulungan sa loob ng mga organisasyon at pagpapakita ng nakamit ng mga Pilipino sa larangan ng negosyo sa business leaders ng mundo.

120 eskuwelahan Face-to-face classes, start na sa Nob. 15 — DepEd

ni Lolet Abania | October 6, 2021

Sisimulan na sa Nobyembre 15, ang pilot implementation ng limitadong face-to-face classes sa gitna ng COVID-19 pandemic, ayon sa isang opisyal ng Department of Education (DepEd) sa Senate hearing ngayong Miyerkules.

“We start on November 15, the face-to-face classes and tinaon po natin doon sa pilot schools, tinaon po ‘yan natin sa umpisa ng academic quarter two ng ating school calendar,” ani DOH Usec. Nepomuceno A. Malaluan sa pagdinig ng Senate Committee on Basic Education, Arts and Culture. Base sa timeline ng DepEd, ang initial run ay tatagal hanggang Disyembre 22.

Matapos nito, magkakaroon ng assessment ang ahenisya hinggil sa pagsasagawa ng in-person classes. Ang naturang pilot study ay magtatapos naman ng Enero 31, 2022.

Kasunod nito, susuriin ng DepEd at ia-identify ang iba pang eskuwelahan para sa pagpapalawig ng pilot run, magsasagawa rin ng site inspection, dry-run at ipiprisinta ang expansion proposal kay Pangulong Rodrigo Duterte sa Pebrero 2022.

Kapag naaprubahan naman ito, plano ng DepEd na simulan ang expanded pilot run ng face-to-face classes sa Marso 7, 2022.

Matatandaang inaprubahan ni Pangulong Duterte nitong huling linggo ng Setyembre ang limited face-to-face classes sa mga lugar na may minimal risk ng impeksyon ng COVID-19.

Una nang pinayagan ang limitadong face-to-face classes sa 100 pampublikong paaralan at 20 pribadong eskuwelahan, kung saan para sa mga Kindergarten hanggang Grade 3 students.