Panukalang P629.8-bilyong pondo ng DepEd para sa 2022, aprubado na ng Senado

ni Jasmin Joy Evangelista | November 26, 2021

Inaprubahan na ng Senado ang panukalang P629.8 bilyong budget ng Department of Education (DepEd) para sa taong 2022.

Nasa 6% ang pagtaas nito mula sa P595 bilyon na budget noong nakaraang taon.

Sa isang pahayag nitong Huwebes, pinasalamatan ni Education Secretary Leonor Briones ang Senado sa pagkilala sa pangangailangang ipagpatuloy ang pagpapalawak ng safe face-to-face classes program na nakatutok sa education recovery.

“On behalf of the DepEd family, we thank and welcome our senators inputs for effectively allocating these funds that will surely build upon our capacity to provide the needs of our learners and teachers especially that we are gradually reopening the schools,” ani Briones.

Ayon sa DepEd, ang budget para sa General Management and Supervision nito ay tumaas mula P7.61 bilyon at naging P8.09 bilyon na nilalayon para pondohan ang health at safety needs ng mga paaralan sa pagpapatupad ng face-to-face classes sa susunod na school year.

Naglaan din ito ng P358 milyon para sa bagong likha nitong programa na Priority School Health Facilities bilang tugon sa COVID-19.

Matatandaang sinimulan na ang pilot testing ng face-to-face classes sa mga bahagi ng bansa na low risk at walang naitatalang maraming kaso ng COVID-19.

Sa pagsisimula ng face-to-face-classes... Public schools, walang naiulat na COVID-19 cases — DepEd

ni Lolet Abania | November 23, 2021

Limampu’t anim mula sa kabuuang 100 pampublikong paaralan ay walang naiulat na anumang COVID-19 infection sa kanilang mga estudyante at mga guro sa unang linggo ng pilot implementation ng face-to-face classes, ayon sa Department of Education (DepEd) ngayong Martes.

“Sa unang linggo ng ating pagpapatupad ng pilot limited face-to-face [classes] ay wala po tayong naitalang kaso ng COVID sa mga lugar na ito,” ani DepEd Assistant Secretary Malcolm Garma sa isang press conference.

“As we have emphasized, we have so far gathered information from 56 out of the 100 for the 100 public schools,” sabi ni Garma.

May ilang pampublikong eskuwelahan naman ang nag-report ng mga hamon na naranasan ng mga estudyante na nakiisa sa pilot in-person instruction.

Ayon kay Garma, 18 paaralan ang nag-ulat na ilang estudyante ang hindi na nakasama sa programa dahil sa pagkakasakit ng mga ito gaya ng lagnat, ubo, sipon at iba pa. Pito naman ang nagsabing ang kanilang mga estudyante ay nag-a-absent dahil sa nahihirapang pumunta sa eskuwelahan at umuwi ng bahay. Labing-isa ang nag-report na ang kanilang mga estudyante ay maraming obligasyon at mga errands sa bahay.

Tatlo naman ang hindi makapasok dahil sa natural calamities o kalamidad, habang 11 eskuwelahan ang nag-ulat na ang kanilang mga estudyante ay hindi pa handa na pumasok sa klase.

Sinabi rin ni Garma na habang nagkaklase, ilang kindergarten learners ang nahihirapang magsuot ng kanilang face masks sa buong oras nila sa paaralan.

“Isa ito sa mga bagay na gusto nating talagang ma-integrate sa ating face-to-face learning, na masanay at maunawaan ng ating mga maliliit na mag-aaral kung bakit kailangan na palaging suot ‘yung kanilang face masks,” sabi ni Garma.

“First time po ng mga bata na bumalik at tumungtong sa school, first time nilang makasalamuha ‘yung kanilang mga kaklase, ngayon lang sila makaka-interact with their teachers. So hindi maiiwasan ang ating mga pupils ay hindi talaga mapapanatili sa upuan lamang, talagang tatayo sila, maglalakad, maglalaro,” paliwanag ni Garma, kung saan pinag-iisipan na rin ng DepEd kung paano mareresolbahan ang sitwasyon.

Panawagan ni Garma, ang mga matatanda ay dapat magsilbing ehemplo sa mga estudyante sa pagsusuot ng face masks dahil sa ilan sa mga indibidwal sa paligid ng mga paaralan ay nai-report na walang suot na face masks.

Giit naman ni DepEd Secretary Leonor Briones, “The temptation might be to emphasize what the challenges are na kung i-proportion mo ‘yan sa more than 100,000 teachers na nagbigay ng feedback, hindi naman ganu’n kalaki... Pero overall, it was expected na kitang-kita naman na lahat-lahat natutuwa.”

18 pribadong paaralan, sumabak na sa face-to-face classes — DepEd

ni Lolet Abania | November 22, 2021

Maraming pribadong paaralan ang nagbukas na ng kanilang mga classroom para sa mga estudyante na sasabak sa face-to-face classes, kung saan nakatakda ang pilot implementation na ito ng gobyerno ngayong Lunes, Nobyembre 22.

Sa pagsisimula ng limited in-person instruction, 18 private schools mula sa mga lugar na nasa “low risk” sa COVID-19 ang muling binuksan sa mga estudyante ng Kindergarten hanggang Grade 3 at senior high school (SHS) na nag-secure ng consent ng kanilang mga magulang para um-attend sa physical classes sa kabila ng pagkakaroon ng krisis sa pangkalusugan.

Ayon kay Jocelyn Andaya, director ng Department of Education (DepEd), 20 pribadong eskuwelahan ang pinayagan para sa pilot study subalit ang dalawang paaralan ay ipinagpaliban ang pagsasagawa ng in-person classes dahil sa kanilang academic calendars.

Katulad ng 100 pampublikong paaralan na nagbalik sa in-person learning noong nakaraang linggo, ang mga pribadong paaralan ay nag-retrofitted o isinaayos din ang kanilang mga pasilidad para sa mga estudyante at personnel upang masunod ang mga kailangang health protocols laban sa pagkalat ng COVID-19.

“May designated places kung saan lang puwedeng manatili ‘yung mga estudyante. Gumamit tayo ng open spaces or doon sa mga lugar na maayos ang ventilation. And, of course, dapat may access to cleaning materials and also for hygiene,” paliwanag ni Coordinating Council of Private Educational Associations of the Philippines (Cocopea) Managing Director Joseph Noel Estrada sa Laging Handa public briefing.

Ayon kay Estrada, hiniling na rin ng Cocopea sa DepEd kung ang grupo ay maaaring mag-monitor sa sitwasyon sa mga “pilot schools” upang aniya, makapagbigay rin sila ng rekomendasyon para sa “expansion phase,” ang second stage ng three-part plan ng gobyerno sa muling pagbubukas ng basic education schools.