Pagbubukas ng klase sa AY2022-2023, posibleng mapaaga – DepEd

ni Lolet Abania | March 6, 2022

May posibilidad na magiging maaga ang pagbubukas ng klase para sa Academic Year (AY) 2022-2023, kung magpapatuloy na bumuti ang sitwasyon ng COVID-19 pandemic sa bansa, ayon sa Department of Education (DepEd) ngayong Linggo.

Sa isang interview kay DepEd Undersecretary Nepomuceno Malaluan, sinabi nitong ang susunod na administrasyon ang magsasagawa ng kinakailangang adjustments kung kailan dapat simulan ang susunod na school year.

“As you know, there will also be an impending transition already of leadership of the DepEd. We will be making our recommendations and the plans based on our decisions. But I suppose that the next administration might still make adjustments to that,” paliwanag ni Malaluan.

“But, posibleng mas mapaaga lalo na kung tuluy-tuloy itong positive development natin sa COVID outlook,” dagdag niya.

Ayon kay Malaluan, ang nakatakdang calendar para sa AY 2022-2023 ay maaaring ilabas sa Mayo o Hunyo, na subject aniya para sa posibleng adjustments o pagsasaayos ng papasok na administrasyon.

Matatandaang sinimulan ang Academic Year 2021-2022 noong Setyembre 13, 2021 na halos huling quarter na ng taon dahil pa rin sa COVID-19 pandemic.

Nasa tinatayang 25 milyong estudyante ang nag-enrolled para sa naturang school year, ayon sa DepEd.

Iginiit naman ni Malaluan na ang in-person graduation ceremonies para sa AY 2021-2022 ay maaaring payagan kung magpapatuloy din ang pagluluwag ng COVID-19 restrictions.

“That’s a possibility. Medyo hindi pa naman ngayon ‘yan, sa Hunyo pa ‘yan,” sabi pa ni Malaluan.

P977.47 milyon para sa expansion ng F2F classes — DepEd

ni Lolet Abania | March 3, 2022

Naglaan ang Department of Education (DepEd) ng P977.47 milyon para makatulong sa pangangailangan ng mga paaralan na nagsasagawa ng limited in-person classes sa ilalim ng expansion phase.

Ayon kay DepEd Undersecretary Annalyn Sevilla, ang naturang halaga ay gagamitin para pondohan ang Maintenance and Other Operating Expenses (MOOE) ng mga paaralan.

“Marami po sa mga pondo na atin pong pinaghahandaan ay ‘yun pong physical arrangements ng eskuwelahan, ‘yun pong protection and safety ng mga learners at mga guro, at siyempre po ‘yung mga learning resources na kailangan natin,” ani Sevilla sa Laging Handa public briefing nitong Miyerkules.

Batay sa report, ang mga elementary schools, na humahawak ng Kindergarten hanggang Grade 6 students ay makakatanggap ng pinakamalaking share na P531.36 milyon.

Gayundin, ang mga Junior High Schools, na sakop ang Grade 7 hanggang 10 ay makakatanggap ng P303.62 milyon habang ang mga Senior High Schools na mula Grade 11 hanggang 12 ay mabibigyan naman ng P142.49 milyon.

“These amounts are to be downloaded [or] released to the Regional Offices. The Regional Directors are authorized to allocate the said amounts among schools considering the implementation status of face-to-face classes in their respective regions,” pahayag ng DepEd sa kanilang report.

Sa mga regional offices, ang Central Luzon ang makakatanggap ng pinakamalaking alokasyon na mahigit sa P80 milyon. Sinabi pa ng DepEd na ire-retain naman ang P41.47 milyon o 4.24 percent ng kabuuang pondo na anang ahensiya, “as a contingency fund.”

4K paaralan, nagbalik na sa F2F classes — DepEd

ni Lolet Abania | March 2, 2022

Umabot sa kabuuang 4,315 paaralan sa buong bansa ang nakiisa sa tinatawag na “progressive expansion” phase ng face-to-face classes sa gitna ng COVID-19 pandemic, ayon sa Department of Education (DepEd).

Sa Laging Handa briefing ngayong Miyerkules, ini-report ni DepEd Secretary Leonor Briones na may 6,213 eskuwelahan sa buong bansa ang handa nang sumali sa limitadong in-person classes, kung saan napapailalim ang mga ito sa pamantayang itinakda ng DepEd.

Sa 4,315 paaralan na umabot sa kanilang pamantayan, mayroong 4,239 public and 76 private schools ang nakiisa sa pilot in-person classes hanggang nitong Marso 1, matapos na ang National Capital Region (NCR) at 38 pang mga lugar ay isinailalim na sa Alert Level 1.

Gayunman, kahit na nagbukas na uli ang mga paaralan sa F2F classes, sinabi ni Briones na mananatiling ipatutupad ang blended learning para magawang maka-adapt ng mga bata sa mga teknolohiyang umiiral.

“Hindi na kagaya nu’ng unang panahon na mostly face-to-face. Ito ngayon, ‘di natin bibitiwan ang digital technology, ang science, ang mathematics, and so on, but meron talagang face-to-face component dahil mahalaga ‘yan sa pag-socialize at pagturo ng bata. Pareho silang importante para tayo makahabol and will be on par with the other countries,” paliwanag ni Briones.

“If you mean full face-to-face na anim, walong oras na ang teacher at mga bata nagkakaharap, hindi ‘yan posibleng mangyayari. Lahat na bansa na binabantayan namin, lalo na na ‘yung mga bansa na bilib na bilib talaga tayo, wala na ‘yung nation na full face-to-face. May blended component talaga,” sabi pa ng opisyal.

Binigyan-diin naman ng kalihim, na umaasa sila ng pagkakaroon ng 100% attendance ng mga estudyante anumang uri ng pagtuturo mapa-blended, online o physical classes.

Para sa face-to-face classes, ayon kay Briones, iminumungkahi nila na gawin na lamang itong half day o kalahating araw para maiwasan ng mga bata ang pagkain-kain at magdagdag ng panganib ng COVID-19 infections.

Matatandaan nitong Pebrero, inawtorisa ng DepEd ang lahat ng regional directors na simulan ang “progressive expansion” phase ng F2F classes para sa public at private schools, kasunod ng pag-apruba ni Pangulong Rodrigo Duterte sa rekomendasyon ng DepEd na palawigin ang in-person classes sa mga lugar na nasa ilalim ng Alert Level 2 at pababa.