MRT-3, palpak ang disinfection, mga empleyado, kakastiguhin

ni Mary Gutierrez Almirañez | March 14, 2021

Isinailalim sa ‘disciplinary actions’ ang ilang empleyado ng Metro Rail Transit Line 3 (MRT-3) matapos lumabas sa internet ang video kung saan makikitang minamadali at hindi inaayos ng mga ito ang pagdi-disinfect ng tren, ayon sa pahayag ng Department of Transportation (DOTr) ngayong araw, Marso 14.

Anila, "We are assuring the riding public that matters have been taken to prevent a repeat of that unfortunate incident and that the personnel involved are now facing disciplinary action."

Nauna nang iniulat na nagpositibo sa UK variant ng COVID-19 ang ina ng isang empleyado sa MRT-3 na nagdulot ng pagkabahala sa mga biyahero at buong administrasyon ng MRT-3.

Sa ngayon ay sinisigurado ng Department of Transportation ang malinis at maayos na pagdi-disinfect sa lahat ng tren at iba pang pasilidad sa bawat istasyon upang maiwasan ang pagkalat ng virus.

Pila para sa 24/7 RFID sticker, usad-pagong

ni Lolet Abania | November 27, 2020

Umabot ang bumper-to-bumper na mga sasakyan magmula sa itaas sa tollgate ng NAIAX hanggang sa gasolinahan bago makaakyat ng Skyway. Ilang gabi na itong nararanasan ng mga motorista dahil kakaunti ang mga tollgate na maaaring magkabit ng RFID sticker.

Usad-pagong din ang mga sasakyan dahil sa 10-20 kada minuto matapos ang susunod na andar nito bago makarating sa tollgate. Gayunman, nabawasan na ang pila ng mga sasakyan ngayong araw para sa pagkuha ng RFID sticker, hindi tulad kahapon na umabot ito sa Magallanes nang halos alas-3 ng madaling-araw.

Matatandaang sinabi ng (DOTr) na hanggang January 11 na lang ang huling pagpapakabit ng mga motorista ng RFID sticker. Subali’t kahit matapos ang deadline ng paglalagay nito, walang huhulihing motorista sakaling walang RFID sticker dahil hindi lahat ng lanes sa tollgate ay iko-convert bilang stickering lane, ayon sa DOTr.

Sa December 1 o susunod na linggo, uumpisahan nang maging cashless ang pagbabayad sa lahat ng tollgate sa Metro Manila kaya inaasahan na ang mahahaba pang pila ng sasakyan sa mga 24/7 installation sites ng RFID. Ayon naman sa mga concessionaire ng expressways, maaari pa ring magpakabit ng RFID sticker ngayong December.

Traze app sa mga airports, start na sa Nov. 28

ni Lolet Abania | October 30, 2020

Naglunsad ang Department of Transportation (DOTr) ng isang application kung saan makukuha ng awtoridad ang mga impormasyon ng mga pasahero na hindi magsasagawa ng direct contact dito upang maiwasan ang pagkalat ng COVID-19.

Maaaring magamit ang Traze app ng mga Android at iOS users para ma-scan ang QR code na nakapaskil sa mga airports at makapag-register sa tracing server. Para sa mga walang mobile devices, maaari silang humingi ng tulong sa Malasakit Help Desk na nasa mga airports.

Sa pamamagitan ng nasabing app, madaling maipapaalam sa mga users kung ang isang pasahero na kasama nilang bumiyahe mula sa terminals at airplanes ay nagpositibo sa COVID-19. Gayunman, ang pagkakaroon ng Traze app ay hindi mandatory.

Magagamit lamang ito sa Ninoy Aquino International Airport, Davao International Airport, Clark Airport at Mactan-Cebu International Airport.

Samantala, sa November 28, ipapagamit na ang Traze app sa lahat ng airports sa bansa. “We will make sure that all CAAP-operated airports will strictly implement the use of Traze,” sabi ni CAAP Director General Jim Sydiongco.

Pinag-aaralan na rin ng awtoridad ang paggamit ng nasabing application sa iba pang uri ng transportasyon gaya ng railway.

“By making certain tweaks in the application and improving the application further, we can actually make the application applicable and usable in other modes of transportation,” sabi ni Philippine Ports Authority (PPA) General Manager Jay Daniel Santiago.