Checkpoint, nagdulot ng traffic at pahirapang makasakay

ni Mary Gutierrez Almirañez | March 29, 2021

Nagdulot ng mabigat na daloy ng trapiko ang unang araw ng enhanced community quarantine (ECQ) sa NCR Plus Bubble ngayong umaga, Marso 29, alinsunod sa ipinatupad na bagong quarantine restrictions ng Inter-Agency Task Force (IATF) dahil sa patuloy na paglobo ng COVID-19.

Batay sa ulat, bawat checkpoints ay iniisa-isa ng mga pulis ang pagtse-check sa mga company I.D., certificate of employment, business permit at iba pang dokumento bilang patunay na puwedeng lumabas ng bahay ang ini-inspect na biyahero o kabilang sila sa authorized person outside residence (APOR).

Kaugnay nito, pahirapan ding makasakay sa mga pampublikong transportasyon dulot ng limitadong kapasidad.

Nauna nang inihayag ng Department of Transportation (DOTr) na hanggang 50% capacity lamang ang puwede sa mga jeep, bus, taxi, UV Express, TNVS, service shuttle at tricycle.

Pinapayagan din ang operasyon ng provincial bus ngunit kailangang point-to-point lang ang biyahe at kailangang mga authorized person outside residence (APOR) lamang ang sakay. Pinahihintulutan din ang private motorcycles at pag-backride para sa mga importanteng lakad.

Samantala, ang kapasidad naman ng mga tren ay 20% hanggang 30% lamang. Simula sa Martes ay wala nang biyahe ang MRT-3. Sa Miyerkules ay hindi na rin bibiyahe ang LRT-1 at LRT-2. Sa Huwebes ay wala na ring biyahe ang PNR.

Wala namang magbabago sa guidelines ng aviation na mababa na ang bilang ng mga flights, gayundin sa maritime sector.

Paalala pa ng DOTr, sumunod sa health protocols upang maiwasan ang mabilis na pagkalat ng COVID-19.

Sa ngayon ay tinatayang 9,356 na mga pulis ang nagbabantay sa mahigit 1,000 quarantine control points na inilatag ng Philippine National Police (PNP) sa Metro Manila, Bulacan, Cavite, Laguna, Rizal at ilan pang lugar na isinasailalim sa ECQ.

Kahit may plastic pa, bawal… Pasahero sa dyip, dapat may isang pagitan

ni Lolet Abania | March 28, 2021

Papayagang mag-operate ang mga public utility vehicles (PUVs) ng 50% kapasidad lamang habang nasa ilalim ng enhanced community quarantine (ECQ) ang Metro Manila at karatig lalawigan na magsisimula bukas, Lunes.

Ito ang inanunsiyo ni Department of Transportation (DOTr) Assistant Secretary for Road Transport and Infrastructure Steve Pastor para sa mga PUVs, kabilang dito ang mga public utility bus, UV Express Service, public utility jeepneys, shuttle service, tricycle, taxis at transport network vehicle services (TNVS).

Ayon pa kay Pastor, ang mga PUVs ay dapat na sumunod sa one-seat apart na ipatutupad sa mga pasahero. "Hindi puwedeng lumagpas sa capacity ng sasakyan kahit may plastic barriers," ani Pastor. Babala naman ni Pastor, sakaling ang mga PUV drivers ay hindi sumunod sa one-seat apart na panuntunan o lalagpas sa itinakdang kapasidad, may kaukulang parusa para sa overloading.

Sinabi rin ni Pastor na papayagan din ang mga private motorcycles na makabiyahe subalit iyon lamang nasa listahan ng authorized personnel ang maaaring lumabas ng kanilang bahay.

"We will still allow back rides for private motorcycles [as long as the riders are] APORs," ani Pastor. Gayunman, ayon kay Pastor, kailangang ihanda ng mga PUV drivers ang kanilang quick response codes upang maipakita sa mga enforcers na meron silang special permit para mag-operate.

Binanggit din ni Pastor na magbibigay sila ng free rides para sa mga medical workers, kung saan mayroong 20 routes na ipatutupad habang nasa ilalim ng ECQ. Matatandaang ang libreng shuttle service na nagsimula noong March, 2020 ay nagserbisyo sa mahigit na 2 milyong healthcare frontliners.

Gayunman, ayon sa DOTr official, ang mga habal-habal drivers ay huhulihin kapag nag-operate sila ngayong ECQ.

Public transport, tuloy kahit balik-GCQ

ni Mary Gutierrez Almirañez | March 21, 2021

Inaprubahan ni Pangulong Duterte ang mga bagong rekomendasyon ng Inter-Agency Task Force (IATF) upang mapigilan ang paglobo ng kaso ng COVID-19 sa Metro Manila at mga kalapit na probinsiya, batay sa inilabas nilang Resolution No. 104, series of 2021 nitong Sabado, Marso 20.

Nakasaad dito na simula bukas, Marso 22, hanggang sa ika-4 ng Abril ay maipapatupad ang mga sumusunod sa ilalim ng bagong guidelines:

• Mananatili sa General Community Quarantine (GCQ) ang NCR, Bulacan, Cavite, Laguna at Rizal

• Suspendihin ang non-essential travel, mass gathering at face-to-face meeting

• Limitahan sa 10 indibidwal ang mga bisita sa kasal, binyag at libing

• Ibalik ang work-from-home arrangement o limitahan sa 30% hanggang 50% capacity ang mga papapasuking empleyado

• Limitahan sa 50% ang nagda-dine-in sa restaurant, coffee shop at ibang establisimyento. Dapat ay mayroong acrylic o division ang bawat lamesa at upuan

• Isarado ang sinehan, driving school, video-interactive game arcades, libraries, archives, museums, cultural centers at ilang tourist spots maliban kung open area

• Ipagbawal ang pagsasabong ng manok

• Gawing unified ang curfew simula alas-10 nang gabi hanggang alas-5 nang madaling-araw

• Bawal lumabas ang 18-anyos pababa at ang 65-anyos pataas kabilang na ang mga may sakit o vulnerable, persons with disability (PWD) at mga buntis.

Bagama’t ang mga nabanggit ay kasalukuyan nang ipinapatupad ay may ilan pa ring establisimyento at indibidwal ang hindi sumusunod, lalo na sa curfew hours at pagsusuot ng face mask.

Patuloy ang hawahan sa magkakamag-anak at ang pagdami ng mga bagong variant ng COVID-19.

Kaugnay nito, makikipagkoordinasyon ang Department of the Interior and Local Government (DILG) sa bawat local government unit (LGU) upang masiguradong naipapatupad ang health protocols sa mga lungsod at quarantine/isolation facilities.

Katuwang ang Barangay Health Emergency Response ay mamamahagi sila ng libreng face mask at face shield sa mga high risk na lugar.

Samantala, mananatili pa rin ang mga pampublikong transportasyon sa ilalim ng guidelines na ipinatupad ng Department of Transportation (DOTR).

Magtutulungan din ang Department of Trade Industry (DTI) at Department of Labor and Employment (DOLE) upang bantayan ang galaw ng industriya at kung naipapatupad ang health protocols sa trabaho.

Ang bawat nakasaad sa resolusyon ay pirmado nina DOH Secretary Francisco Duque III, IATF Co-Chairperson Karlo Nograles at OIC-Head of the Secretariat Atty. Charade Mercado-Grande.

Sa ilalim ng bagong guidelines ay inaasahang bababa ang bilang ng mga nagpopositibo sa COVID-19 at masosolusyunan ang lumalaganap na pandemya sa bansa.