Platform barrier sa mga istasyon ng tren

ni Madel Moratillo | April 14, 2023

Inirekomenda na ng Department of Transportation ang paglalagay ng platform barriers sa mga istasyon ng tren.

Kasunod ito ng pagkasawi ng isang 73-anyos na ginang matapos tumalon sa riles habang may paparating na tren.

Ayon kay Transportation Assistant Secretary at MRT-3 officer-in-charge Jorjette Aquino, noong nakaraang administrasyon ay nagkaroon na ng kaparehong proposal pero dahil sa kakulangan sa budget ay hindi ito natuloy.

Kaya ngayon, susubukan aniya nila itong muli.

Tiniyak ng DOTr na ang kanilang security personnel ay mahigpit na ipapatupad ang patakaran na ang mga pasahero ay hindi makatawid sa yellow line sa mga platforms ng train station hangga’t hindi tuluyang nakakahinto ang tren.

Pinaaalalahanan din sila na mahigpit na i-monitor ang mga pasahero kung may kakaibang kinikilos.

Babala ng opisyal, may katapat na penalty sa mga pasaherong sasadyaing pigilin o abalahin ang railway operations.

Sumama sa tigil-pasada, bawi-prangkisa — DOTR

ni BRT | March 7, 2023

Nagbabala ang Department of Transportation (DOTr) sa mga tsuper ng public utility vehicles (PUVs) na sasama sa weeklong transport strike simula kahapon na maaaring maharap ang mga ito sa administrative at criminal sanctions kabilang na ang revocation ng kanilang prangkisa.

Ayon kay Transportation Undersecretary for Legal Affairs Reinier Yebra, ang administrative penalties ay maaaring magresulta mula sa paglabag sa mga termino ng prangkisa na iginawad sa mga tsuper ng jeep at operators.

Aniya, ang isang franchise holder ay may obligasyon na magbigay ng serbisyo sa publiko at kapag nabigong gawin nito ang kanyang mandato at sa halip ay nagsagawa ng welga, nilabag nito ang kondisyon sa kanyang prangkisa na maaaring ma-revoke.

Paliwanag pa ni Yebra na ang mga sumali sa strike ay maaaring makasuhan ng kriminal kapag nakasakit ang mga ito ng tao o nakasira ng ari-arian.

Binigyang-diin pa ng DOTr official na ang pagkakaroon ng prangkisa ay hindi isang karapatan kundi pribilehiyo lamang na maaaring bawiin ng estado anumang oras kapag hindi nakasunod sa mga kondisyon.

Dagdag na bus routes para sa Libreng Sakay, pinag-aaralan ng DOTr

ni Lolet Abania | July 4, 2022

Nire-review ngayon ng Department of Transportation (DOTr) ang posibilidad ng pagkakaroon ng free bus rides sa mas maraming ruta sa ilalim ng kanilang Libreng Sakay program.

Sa isang interview kay DOTr Undersecretary Cesar Chavez ngayong Lunes, ipinunto nito na ang budget ng DOTr ay magiging sapat lang para sa umiiral nang mga ruta ng libreng sakay.

“Nire-review ‘yan ngayon sapagkat ‘yung budget na nakalaan, of course through congressional approval at nu’ng nakaraang administrasyon, ay sasapat lang at hindi kasama ‘yung ibang ruta na hinihiling nila ngayon,” paliwanag ni Chavez.

Ayon kay Chavez, makikipagpulong na si DOTr Secretary Jaime Bautista sa mga head ng mga kaugnay na ahensiya upang talakayin ang naturang usapin.

Noong Biyernes, inaprubahan ni Pangulong Ferdinand “Bongbong” Marcos Jr. ang extension ng free EDSA Carousel bus rides hanggang Disyembre 2022, kung saan magtatapos sana sa Hulyo 30, 2022.

Aprubado rin kay Pangulong Marcos, ang libre sakay para sa mga estudyante na gagamit naman ng MRT3, LRT2, at Philippine National Railways (PNR) kapag nag-resume na ang in-person classes sa Agosto.

Binanggit din ni Chavez sa interview na hindi naman kakayanin ang free rides para sa lahat sa mga tren dahil aniya, ang MRT3 ay nagkaroon lamang ng P82 million revenue collection nitong Enero subalit umabot ang kanilang gastos sa P722 milyon para sa libreng sakay.

Gayundin, ayon kay Chavez, hindi rin sila makapagbigay ng free rides sa LRT1 sa dahilang ito ay nasa ilalim ng isang concession agreement sa Light Rail Manila Corporation at ang gobyerno ay walang control sa kanilang operation at revenue.