Dagdag na bus routes para sa Libreng Sakay, pinag-aaralan ng DOTr

ni Lolet Abania | July 4, 2022

Nire-review ngayon ng Department of Transportation (DOTr) ang posibilidad ng pagkakaroon ng free bus rides sa mas maraming ruta sa ilalim ng kanilang Libreng Sakay program.

Sa isang interview kay DOTr Undersecretary Cesar Chavez ngayong Lunes, ipinunto nito na ang budget ng DOTr ay magiging sapat lang para sa umiiral nang mga ruta ng libreng sakay.

“Nire-review ‘yan ngayon sapagkat ‘yung budget na nakalaan, of course through congressional approval at nu’ng nakaraang administrasyon, ay sasapat lang at hindi kasama ‘yung ibang ruta na hinihiling nila ngayon,” paliwanag ni Chavez.

Ayon kay Chavez, makikipagpulong na si DOTr Secretary Jaime Bautista sa mga head ng mga kaugnay na ahensiya upang talakayin ang naturang usapin.

Noong Biyernes, inaprubahan ni Pangulong Ferdinand “Bongbong” Marcos Jr. ang extension ng free EDSA Carousel bus rides hanggang Disyembre 2022, kung saan magtatapos sana sa Hulyo 30, 2022.

Aprubado rin kay Pangulong Marcos, ang libre sakay para sa mga estudyante na gagamit naman ng MRT3, LRT2, at Philippine National Railways (PNR) kapag nag-resume na ang in-person classes sa Agosto.

Binanggit din ni Chavez sa interview na hindi naman kakayanin ang free rides para sa lahat sa mga tren dahil aniya, ang MRT3 ay nagkaroon lamang ng P82 million revenue collection nitong Enero subalit umabot ang kanilang gastos sa P722 milyon para sa libreng sakay.

Gayundin, ayon kay Chavez, hindi rin sila makapagbigay ng free rides sa LRT1 sa dahilang ito ay nasa ilalim ng isang concession agreement sa Light Rail Manila Corporation at ang gobyerno ay walang control sa kanilang operation at revenue.

Mahaba pa sa pang-Olympics na pool...Mga tren galing Korea para sa MRT-7, darating na

ni Lolet Abania | September 2, 2021

Nakatakdang dumating sa bansa ang unang batch ng mga bagong tren para sa Metro Rail Transit Line 7 project mula sa South Korea sa susunod na linggo.

Sa isang statement, inianunsiyo ng San Miguel Corp. (SMC) na ang mga tren na binubuo ng anim na cars o dalawang trainsets na kinuha mula sa Hyundai ROTEM ng South Korea ay cleared na sa mga inspections at factory acceptance testing, kabilang dito ang national rail manufacturer ng bansa, ang Korea Railroad Corporation (KORAIL), kung saan nagsisilbi bilang adviser ng SMC.

Bawat trainset ay may 65.45 meters ang haba o higit pa sa haba ng isang Olympic-size na swimming pool na 50 metro.

“The timely arrival of these brand new, high-quality trains from South Korea - known as one of the world’s best train and rail systems builders -- is such a welcome development, and I believe holds a lot of significance,” ani SMC president Ramon Ang.

“At a time when many are feeling uncertain about our country’s future because of the pandemic, this shows that the job of nation-building, continues; that the work of improving our infrastructure, boosting our economic growth prospects, and investing in our country’s brighter future, also doesn’t stop —especially for us in San Miguel,” dagdag ni Ang.

Ayon pa kay Ang, marami pang mga tren ang nakatakda namang dumating sa bansa sa mga susunod na buwan at sunod na taon, hanggang sa lahat ng 108 cars o 36 trainsets na kinukuha ng kumpanya ay kanilang mai-deliver.

500 KM bike lanes sa Metro Manila, Cebu at Davao, matatapos na

ni Lolet Abania | June 1, 2021

Target na matapos ngayong buwan ang mahigit sa 500 kilometro ng bike lanes na isinasagawa sa Metro Manila, Metro Cebu at Metro Davao, ayon sa isang opisyal ng Department of Transportation (DOTr).

Ito ang kinumpirma ni Assistant Secretary Steve Pastor sa ginanap na motu proprio investigation ng House Committee on Transportation hinggil sa pagkaantala umano ng konstruksiyon ng proyektong bicycle lanes ngayong Martes.

Ayon kay Pastor, may kabuuang P1.3 bilyong pondo ang inilaan ng gobyerno para sa pagsasaayos ng pedestrian at pagpapatayo ng bicycle lanes sa ilalim ng Bayanihan 2.

Paliwanag ni Pastor, sa nasabing pondo, P1.1 bilyon ang ilalaan para sa bike lanes habang ang natitirang P200 milyon ay ilalaan naman para sa tinatawag na bike sharing stations.

Kinuwestiyon naman ni Samar Representative Edgar Mary Sarmiento, ang panel chairperson, si Pastor kung kailan ang target na petsa ng DOTr para makumpleto ang mga bicycle lanes.

“Magkakaiba po. Para po sa Cebu, matatapos na po ito by June 15. Para po sa Davao, ganoon din po, sa June 15... Para po sa National Capital Region, June 30 po,” ani Pastor.

Sinabi ni Pastor na ang planong haba at layo ng bike lane network sa nabanggit na mga lugar ay ang mga sumusunod:

• Metro Manila - 338.53 kilometers

• Metro Cebu - 129.65 kilometers

• Metro Davao - 54.51 kilometers

Tinanong ni House Minority Leader Joseph Stepen Paduano ang Department of Public Works and Highways (DPWH) kung kayang matapos sa target date ng DOTr ang isinasagawang bike lanes, lalo na sa Metro Manila.

Positibo naman ang naging tugon ni DPWH-NCR Director Eric Ayapana na ito ay matatapos sa oras.

Samantala, magsasagawa ang mga miyembro ng nasabing komite ng actual site inspection sa mga bike lanes sa Metro Manila.