No Vaccine, no entry sa mga establisimyento, 'di aprub sa DTI

ni Mary Gutierrez Almirañez | May 16, 2021

Hindi sang-ayon ang Department of Trade and Industry (DTI) na gawing mandatory requirement ang COVID-19 ‘vaccine pass’ bago makapasok sa isang establisimyento ang mga konsumer, ayon sa pahayag ni DTI Secretary Ramon Lopez ngayong araw, May 16.

Paliwanag niya, "Kami ho, hindi ho kami sang-ayon sa vaccine pass na gagawing mandatory... Hindi po siguro talaga puwede ‘yun. May issue sa discrimination, pangalawa napakababa pa ng ating percentage na na-vaccinate na population."

Dagdag pa niya, "Siguro, 2% pa lang kasi over 2 million pa lang tayo ng nabakunahan... Kailangan pag-aralan ‘yan ‘pag medyo mataas na ang porsiyento."

Matatandaan namang inihirit kamakailan ni Presidential Adviser for Entrepreneurship Joey Concepcion ang pagkakaroon ng standard vaccine pass na maaaring i-require ng mga establisimyento para maengganyo ang publiko na magpabakuna.

Kumbaga, tatanggapin lamang ng mga restaurants ang customer na may vaccine pass o ‘yung mga nabakunahan na kontra COVID-19.

Sa ngayon ay tinatayang 2,623,093 indibidwal pa lamang ang mga nabakunahan laban sa virus, kabilang ang 565,816 na mga nakakumpleto sa dalawang dose ng bakuna, habang 2,057,277 naman sa unang dose.

1 M manggagawa, tambay sa MECQ

ni Lolet Abania | April 29, 2021

Tinatayang nasa isang milyong manggagawa ang nananatiling ‘displaced’ o walang trabaho sa NCR Plus areas dahil sa pagpapatupad ng modified enhanced community quarantine (MECQ), ayon kay Department of Trade and Industry (DTI) Undersecretary Ruth Castelo.

Sa Laging Handa briefing ngayong Huwebes, sinabi ni Castelo na nabawasan na ito kumpara noong una na umabot sa 1.5 milyong displaced employees ang nai-record makaraang ang NCR Plus -- Metro Manila, Bulacan, Cavite, Rizal at Laguna – ay nasa ilalim pa ng enhanced community quarantine (ECQ).

“1.5 million employees in NCR Plus were displaced during ECQ but 500,000 of them were able to return to their jobs under MECQ,” ani Castelo.

Matatandaang isinailalim sa ECQ ang NCR Plus noong Marso 29 hanggang Abril 4 dahil sa pagsirit ng mga kaso ng COVID-19 na labis na nagpahirap sa healthcare system ng bansa.

Sa ECQ, ipinagbawal ang mga non-essential travels, gayundin ang non-essential businesses at iba pang mga serbisyo.

Nang isailalim naman sa MECQ protocol, ipinagbawal ang mga non-essential trips, subali't bahagyang pinayagan ang mga non-essential businesses at services na mag-operate, kung saan naging epektibo ito sa NCR Plus mula Abril 5 hanggang Mayo 14.

Ang mga personal care services at indoor dining sa mga restaurants ay ipinagbabawal pa rin sa MECQ.

Gayunman, hiniling na ng DTI sa gobyerno partikular sa COVID-19 task force na kung maaari ay payagan na ang mga personal care services at indoor dining sa ilalim ng MECQ na magbukas ng kanilang negosyo upang masolusyunan ang problema sa unemployment.

Ipinaliwanag pa ni Castelo na sa personal care services lamang ay mayroong 400,000 displaced workers habang 100,000 empleyado sa mga restaurants na indoor dining ay walang mga trabaho sa MECQ.

“Iyong personal care services po, barbershops and salons lang po ito. Hindi kasama ang spa and massage [services]. Kaya nga po iyon ang rekomendasyon ng DTI [na magbukas ng ibang industriya] para unti-unti, dahan-dahan na pong makabalik sa trabaho iyong one million who were displaced,” sabi ni Castelo.

Sinabi rin ni Castelo na iminungkahi ng ahensiya na payagang mag-operate ang indoor dining ng 10% capacity, at para sa personal care services naman ay payagang magbukas ng hanggang 50% subalit, dapat outdoor ang lokasyon nito.

Flexible MECQ sa MM

ni Mary Gutierrez Almirañez | April 28, 2021

Nagkasundo ang Metro Manila mayors na ipatupad ang ‘flexible MECQ' simula sa Mayo dahil sa patuloy na banta ng COVID-19, ayon sa panayam kay Metropolitan Manila Development Authority (MMDA) Chairman Benhur Abalos ngayong araw, Abril 28.

Aniya, “Ang napagkasunduan ng mga alkalde ay parang flexible MECQ. Ang tawag lang nito, MECQ with additional business openings.”

Sa ilalim ng nabanggit na quarantine classifications, inirerekomenda nilang luwagan din ang ipinatutupad na unified curfew simula alas-10 nang gabi hanggang alas-4 nang madaling-araw.

Nilinaw naman niyang susundin pa rin nila ang ilalabas na guidelines ng Department of Trade and Industry (DTI), Department of Health (DOH) at National Economic and Development Authority (NEDA).