Dagdag-incentives para dumami ang nagpapabakuna kontra-COVID-19

ni Lolet Abania | June 7, 2021

Pinag-iisipan ng gobyerno na magbigay ng mas maraming insentibo sa mga indibidwal na nabakunahan na laban sa COVID-19, ayon sa isang opisyal.

Sinabi ni Department of Trade and Industry Secretary Ramon Lopez, kinokonsidera ng Inter-Agency Task Force for the Management of Emerging Infectious Diseases (IATF-EID) na magkaroon ng mga incentives para mahikayat ang mas maraming indibidwal na magpabakuna.

“'Yung doon sa mga nabakunahan, probably they might have certain incentives also that the IATF will be discussing,” ani Lopez sa briefing kasama si Presidential Spokesperson Harry Roque, Jr. ngayong Lunes.

Ilan sa posibleng ibigay nilang incentives ay payagan ang mga nabakunahan na lumabas na ng kanilang tirahan at mabigyan naman ng mas maikling quarantine period para sa mga travelers.

Matatandaang nito lamang buwan, ipinatupad na ng pamahalaan ang mas maikling quarantine period para sa fully vaccinated na inbound travelers sa bansa, na 7 araw na lamang mula sa dating 14 na araw.

“Similar moves will be undertaken, will be studied, para naman may benepisyo du’n sa mga nagpabakuna and which is we have been assuring also the public,” saad ni Lopez.

“Ang talagang benepisyo ru’n sa mga nagpabakuna ay siguradong hindi kayo mamamatay (sa COVID-19), ‘yun ang pinaka-safe at pinakamagaling na benepisyo sa inyo,” dagdag ng kalihim.

DA at DTI, sanib-puwersa para sa presyo ng baboy

ni Lolet Abania | May 8, 2021

Inaasahang ilalabas ang suggested retail price (SRP) ng mga imported na baboy sa susunod na linggo, ayon sa Department of Agriculture (DA).

Sinabi ni DA Chief William Dar, kabilang ang mga senador, susuriin at susumahin nila ang presyo nito ayon sa napagkasunduang taripa.

Aniya, nakikipag-ugnayan na rin ang ahensiya sa Department of Trade and Industry (DTI) hinggil dito. “Well, ang presyo po base dito sa pinal na ibinaba na taripa, we are now making the calculations and we are doing this in tandem, in partnership with the DTI so, baka next week i-announce namin ang suggested retail price,” ani Dar.

Matatandaang nag-isyu si Pangulong Rodrigo Duterte ng executive order hinggil sa taripa ng mga imported na baboy. Subalit, ilang kongresista ang pormal na nagpasa ng resolusyon upang ipabawi ito kay Pangulong Duterte.

Gayunman, nagkasundo na ang DA at mga mambabatas sa ipinatupad na taripa sa dahilang maaaring makaapekto ito sa local hog industry.

Sinimulan ng pamahalaan ang pag-angkat ng imported na baboy sa kasagsagan ng pagdami ng kaso ng African swine fever (ASF) na labis na nakaapekto sa suplay nito sa bansa ng mga lokal na magbababoy.

Samantala, ayon kay Dar, posibleng bumuhos naman ang suplay sa bansa ng mga imported na isda, gulay at bigas habang sa ngayon ay sapat pa ang mga ito.

DTI Sec. Ramon Lopez, nagka-Covid ulit

ni Mary Gutierrez Almirañez | March 18, 2021

Nagpositibo muli sa COVID-19 si Department of Trade and Industry (DTI) Secretary Ramon Lopez, ayon sa ipinarating niyang text message ngayong umaga, Marso 18.

Aniya, “I regret to inform you I tested positive again. Got the result just this morning. I am asymptomatic. I will have another test later to confirm. Hoping false positive.”

Kilala si Lopez sa mga adbokasiya niya pagdating sa ekonomiya at isa rin siya sa mga namamahala hinggil sa muling pagbubukas ng ekonomiya sa kabila ng patuloy na paglaganap ng COVID-19 sa bansa.

“Been wearing a mask and shield and distancing outside home but still got hit,” dagdag pa niya. Nauna nang iniulat na nagpositibo rin sa naturang virus sina Interior Secretary Eduardo Año, Education Secretary Leonor Briones at Public Works Secretary Mark Villar, na pare-parehong magaling na.

Sa ngayon ay isinasailalim na si Lopez sa isolation. Matatandaang Disyembre noong nakaraang taon nang una siyang magpositibo sa virus.