Kontrata, binawi na.. AD agency na gumawa ng sablay na tourism video, 'di pa bayad — DOT

ni Madel Moratillo | July 4, 2023

Binawi na ng Department of Tourism ang kontrata nito sa DDB Philippines bilang kontraktor para sa kanilang bagong tourism campaign na "Love the Philippines".

Kasunod ito ng kontrobersiya sa nabuking na mga video clips sa audio visual presentation na hindi naman kinunan sa Pilipinas.

Sa isang pahayag, sinabi ng DOT na may karapatan silang baguhin, suspendihin o itigil pansamantala o permanente ang kontrata kung makitang hindi “capable” ang agency sa proyekto.

Nakikiusap umano ang DOT sa mga Pinoy sa labis na pagkadismaya sa paggamit ng non-original/stock footage na hindi pa galing sa Pilipinas at ginamit sa AVP para sa "Love the Philippines" campaign.

“As DDB Philippines has publicly apologized, taken full responsibility, and admitted in no uncertain terms, that non-original materials were used in their AVP, reflecting an abject failure to comply with their obligation/s under the contract and a direct contravention with the DOT’s objectives for the enhanced tourism branding, the DOT hereby exercises its right to proceed with termination proceedings against its contract with DDB.” bahagi pa ng pahayag ng DOT.

Tiniyak ng DOT na wala pang naibabayad sa DDB kaugnay ng tourism branding campaign contract.

Trabahong tamad, budol — Kongreso.. Slogan ng Love the Phils. campaign, kopya lang din

ni Mylene Alfonso | July 4, 2023

Pinuna ni ACT Teachers Partylist Rep. France Castro ang kampanya ng Department of Tourism (DOT) na "Love the Philippines" dahil sa pangongopya mula sa ginagamit na tourism slogan ng bansang Cyprus.

Tinawag din ni Castro na budol ang tourism campaign ng DOT na mababang uri na trabaho na nagpapababa sa kredibilidad at integridad sa industriya ng turismo.

"This type of shoddy work undermines the credibility and integrity of our tourism industry," ani Castro sa isang pahayag.

"It is unacceptable for the Marcos government to resort to plagiarizing campaign slogans from other countries. We should be showcasing the unique culture, heritage, and natural wonders that make the Philippines truly remarkable," ani Castro.

Tinukoy ng House deputy minority leader ang kampanyang "Love Cyprus" na inilunsad ng Cyprus Deputy Ministry of Tourism noong 2021.

Sinabi rin ni Castro na ang usapin ay nagdulot ng malaking kahihiyan para sa Pilipinas sa international community dahil sa paggamit ng mga stock footages.

Samantala, inihayag naman ni Albay 2nd District Rep. Joey Salceda na una nang nanita dahil sa hindi pagkakasama ng Bulkang Mayon sa bagong video na sintomas talaga ang una niyang puna na “trabahong tamad”.

"Clearly, the exclusion of Mayon and other tourist attractions intrinsic to the Philippine brand was just a symptom of "trabahong tamad' that is now evident to everyone," banggit ni Salceda.

Ad agency, buking.. Videos sa "Love the Phils.", kuha sa ibang bansa

ni Madel Moratillo | July 3, 2023

Humingi ng paumahin ang DDB Philippines, ang agency na kinuha ng Department of Tourism (DOT) para sa kanilang bagong tourism campaign na "Love the Philippines".

Sa isang pahayag, sinabi ng DDB na inaako nila ang responsibilidad sa pangyayari.

Una rito, kumalat ang ilang online posts na ang ilang video clips na ginamit umano sa Audio Visual Presentation ay mula sa subscription-based stock footage website na hindi kinuha sa Pilipinas.

“The use of foreign stock footage in a campaign promoting the Philippines is highly inappropriate and contradictory to the DOT’s objectives," pahayag ng DDB.

Aminado silang dapat ay nagkaroon umano ng tamang screening at approval process sa mga ginamit na video.

Una rito ipinag-utos ng DOT ang imbestigasyon sa claim ng blogger na si Sass Sasot kung saan sinabi na 5 scenes ang kuha sa ibang bansa gaya ng rice terraces sa Bali, Indonesia; magsasakang naghahagis ng net sa Thailand; pasahero sa eroplano sa Zurich, Switzerland; tumatalon na dolphins; at nagda-drive ng sasakyan sa sand dunes sa Dubai, United Arab Emirates.

Ayon sa DOT, bago ang launching ng bagong slogan, paulit-ulit nilang kinumpirma sa DDB ang originality at ownership ng mga materyales na ginamit.