P350 M pondo para sa mga kalsada sa 13 lalawigan

ni Lolet Abania | June 3, 2021

Nakatakdang ibigay ang nakalaang P350 milyong pondo sa 13 lalawigan para sa pagsasaayos ng mga tulay at provincial roads ngayong taon, ayon sa Department of the Interior and Local Government (DILG) ngayong Huwebes.

Sa isang statement, sinabi ng DILG na ang pondo ay nasa ilalim ng Conditional Matching Grant to Provinces (CMGP), isang programa ng gobyerno na layong makadebelop ng tinatawag na ‘state of core provincial roads.’

Ayon sa DILG spokesperson na si Undersecretary Jonathan Malaya, ang CMGP funds ay direktang mapupunta sa mga sumusunod na probinsiya:

• Ilocos Norte

• La Union

• Apayao

• Benguet

• Mountain Province

• Nueva Ecija

• Pampanga

• Tarlac

• Laguna

• Western Samar

• Davao Occidental

• Dinagat Islands

• Agusan del Sur

Hinimok naman ni Malaya ang mga provincial governors na agarang isumite ang mga requirements upang matanggap na ang nakalaang pondo sa kanilang lalawigan.

Sa ilalim ng pareho ring programa, tinatayang 915 provincial road projects na may kabuuang P39.192 bilyon at aabot sa 2,866.91 kilometro ang natapos na, ayon sa ahensiya.

Sa mga nakumpletong proyekto, 91 ay mula sa Region III na nagkakahalaga ng P3.217 bilyon; 85 sa CALABARZON na may halagang P1.888 bilyon; 76 sa Region II na may halagang P2.5 bilyon; 75 sa MIMAROPA na may halagang P3.357 bilyon; 74 sa Region VIII na may halagang P2.5 bilyon; at 74 sa Region X na may halagang P3.151 bilyon.

Dagdag pa ng DILG, 65 proyekto ang natapos din sa Region VI na may halagang P3.116 bilyon; 63 sa Region XII na may halagang P2.907 bilyon; 57 sa Cordillera Administrative Region na may halagang P2.532 bilyon; 54 sa CARAGA na may halagang P2.652 bilyon; at 51 sa Region 1 na may halagang P1.92 billion.

Gayundin, sa Region V, 47 proyekto ang natapos na nasa halagang P2.366 bilyon; 44 sa Region XI na may halagang P2.777 bilyon; 27 sa Region VII na may halagang P2.244 billion; 18 sa Autonomous Region of Muslim Mindanao na may halagang P522.172 milyon; at 14 sa Region IX na may halagang P1.283 bilyon.

Ipinunto naman ni DILG Secretary Eduardo Año ang kahalagahan ng mga naturang proyekto sa komersiyo.

“With better provincial road networks, these infrastructure development will lead to faster economic recovery amidst the COVID-19 pandemic and more peaceful communities in far-flung areas,” ani Año.

DILG, nagbabala… Pekeng Pfizer COVID vaccine, kalat na

ni Ronalyn Seminiano Reonico | May 1, 2021

Nagbabala ang Department of the Interior and Local Government (DILG) sa publiko at sa mga local government units (LGUs) sa mga pekeng Pfizer COVID-19 vaccine.

Pinaalalahanan ni DILG Secretary Eduardo Año ang lahat ng LGU officials na maging mapanuri matapos maglabas ng babala ang World Health Organization (WHO) na posibleng kalat na sa merkado ang pekeng Pfizer COVID-19 vaccine.

Ayon kay Año, dapat alamin ng mga local executives ang pinagmulan o pinanggalingan ng suplay ng bibilhing bakuna laban sa COVID-19. Dapat din umano na ang lahat ng medical products lalo na ang mga COVID-19 vaccines ay bilhin lamang sa mga awtorisado at lisensiyadong suppliers.

Saad pa ni Año, “While there is no information yet on the presence of the fake vaccines in the country, LGUs should exercise increased diligence as these fake vaccines may be dangerous to the health of those who get inoculated.”

Kamakailan ay naglabas ng global medical alert ang WHO na ang pekeng COVID-19 vaccine ay may product name na “BNT162b2” na nagkukunwaring gawa ng Pfizer BioNTech.

Ayon din sa WHO, unang napag-alaman ang naturang pekeng bakuna sa Mexico.

Community pantries, hihigpitan bago mamigay ng pagkain

ni Mary Gutierrez Almirañez | April 24, 2021

Nagpatupad na ng guidelines ang lokal na pamahalaan ng Quezon City hinggil sa mga dinarayong community pantries sa iba’t ibang lugar sa lungsod. Ito'y upang maiwasan ang hawahan ng COVID-19.

Ayon sa inilabas na memorandum ng lungsod, kailangang makipag-coordinate muna ang organizer sa barangay para mabigyan sila ng written notice. Nakasaad sa notice ang pangalan ng responsable sa pantry at ang magiging lokasyon nito.

Kailangan ding sumunod sa health protocols ang mga staff ng pantry, partikular na ang ‘no face mask, no service’ policy.' Mahigpit ding oobserbahan ang one-meter distance o social distancing.

Lilimitahan din mula alas-5 nang madaling-araw hanggang alas-8 nang gabi ang operasyon ng pantry. Higit sa lahat, dapat ay sariwa at malayo pa sa expiration date ang mga ihahandang pagkain.

Ang mga nabanggit na guidelines ay mula sa napagmitingan ng bawat departamento sa Kyusi kasama si Maginhawa Community Pantry Organizer Anna Patricia Non.

Paliwanag pa ni Mayor Joy Belmonte, "While reiterating the city’s full support for such endeavors that promote the spirit of 'bayanihan' to overcome difficulties due to the COVID-19 pandemic... Law enforcement shall refrain from intervening except in cases of manifest breach of health or safety protocols."

Sumang-ayon naman si Department of the Interior and Local Government (DILG) Undersecretary Martin Diño sa pagpapatupad ng koordinasyon sa pagitan ng organizer at barangay upang maiwasan ang mahabang pila, katulad ng nangyari sa inorganisang community pantry ng aktres na si Angel Locsin, kung saan isang senior citizen ang namatay.

“Dahil talagang maraming nangangailangan lalung-lalo na ‘pag nai-announce mo 'yan, meron mang stub o wala, talagang magpupuntahan at magbabaka-sakali. Kung nand'yan ang ating mga barangay tanod, tapos meron tayo sa Quezon City na Task Force Disiplina, papauwiin na natin 'yung hindi talaga mabibigyan,” giit pa ni Diño.