Show cause order ng DILG vs. Mayor Isko, binawi

ni Ronalyn Seminiano Reonico | August 6, 2021

Umapela si Manila Mayor Isko Moreno sa inihaing show cause order ng Department of the Interior and Local Government (DILG) laban sa kanya dahil nabigo umano ang lokal na pamahalaan sa laban kontra droga batay sa kanilang pagsusuri sa 2018 Anti-Drug Abuse Council performance audit, gayung naging alkalde lang ng Manila si Mayor Isko noong taong 2019.

Kaagad na nag-post si Mayor Isko sa kanyang Facebook page ng screenshot ng isang pahayagan kaugnay ng naturang isyu at aniya, “Wow, galing, ha! Sunud-sunod na! #AlamNaThis.”

Binawi naman ni Secretary Eduardo Año ang naturang show cause order at ayon sa kanya, para ito sa dating alkalde ng Manila.

Saad pa ni Año, "That show cause order was intended for the past mayor since the performance audit was for year 2018 while Mayor Isko assumed only in June 2019.

"The show cause order has been recalled and Mayor Isko does not have to answer it.”

Kulang sa pondo — DILG… 50K contact tracers, 15K na lang

ni Lolet Abania | July 15, 2021

Binawasan na ang mga itinalagang contact tracers na mula sa dating 50,000 ay naging 15,000 na lamang.

Ayon sa isang opisyal ng Department of the Interior and Local Government (DILG), ito ay dahil sa kakulangan sa pondo.

Sinabi ni DILG Assistant Secretary Odilon Pasaraba, hiniling na rin ng ahensiya na mabigyan sila ng karagdagang pondo para makapag-hire ng maraming contact tracers.

“We used to have 50,000 at dahil sa budget, nag-reduce tayo ng 15,000 contract tracers na lamang,” ani Pasaraba sa Laging Handa briefing ngayong Huwebes.

Gayunman, ayon kay Pasaraba, ang Department of Budget and Management ay magbibigay ng karagdagang budget para sa contact tracing.

Matatandaang sinabi ni contact tracing czar at Baguio City Mayor Bejamin Magalong na ang ideyal na ratio ng para sa urban setting ay dapat 1:30 to 37 habang para sa rural areas naman ay 1:25 to 30.

Ayon kay Pasaraba, tinatarget na ng ahensiya ang makamit ang 1:10 contact tracing ratio na ini-require naman ng Department of Health.

37 M Pinoy, nakarehistro na sa national ID

ni Lolet Abania | July 9, 2021

Mahigit sa 37 milyong Pilipino ang nakarehistro na sa Philippine Identification System (PhilSys) o national ID.

Sa isang statement ng National Economic and Development Authority (NEDA) ngayong Biyernes, mula sa zero registration sa kasagsagan ng pandemya noong April 2020, nai-report ng Philippine Statistics Authority (PSA) na nitong July 2, 2021, tinatayang nasa 37.2 milyong indibidwal na ang nakapagrehistro para sa Step 1 o ang tinatawag na demographic data collection.

Mayroon namang 16.2 milyong mamamayan ang nakakumpleto na ng kanilang Step 2 registration o biometrics capture.

Gayundin, ayon sa NEDA, may 343,742 registrants naman ang nakatanggap ng kanilang PhilID cards.

Dahil dito anila, makakayang makamit ng gobyerno ang 50 hanggang 70 milyong target registrations bago matapos ang taon.

“The COVID-19 crisis underscores the need to provide unhampered access to banking and social services for all Filipinos, especially the poor. This is why the President gave the directive to accelerate the implementation of the Philippine Identification System or PhilSys to provide all Filipinos a unique and digitalized ID,” ani Socioeconomic Planning Secretary na si Karl Kendrick Chua.

Matatandaang nag-adopt ang PSA ng isang three-step registration process para masigurong magiging ligtas ang pagsasagawa ng PhilSys sa gitna ng pandemya ng COVID-19, kasabay ng pagsunod sa ipinatutupad na minimum health protocols.

Ang unang step ng pagkuha ng national ID ay demographic data collection na ginagawa sa pamamagitan ng pagbabahay-bahay ng mga kawani o via online registration. Ang ikalawang step ay pagkuha ng biometrics sa mga itinakdang registration centers. Ang ikatlong step ay ang issuance ng PhilSys Number o PSN at PhilID card.

Ayon sa NEDA, ka-partner ng PhilSys ang Landbank of the Philippines para payagan ang mga registrants na makapagbukas ng kanilang bank accounts sa mga registration centers. Sinabi rin ng NEDA na nitong July 2, 2021, umabot na sa 4.4 milyong registrants ang nakapag-apply para sa kanilang account sa Landbank.

Sa isang memorandum ng Bangko Sentral ng Pilipinas (BSP), nakasaad na “The PhilID should be accepted as official and sufficient proof of identity without the need to present any other identification documents.”

Kamakailan, naglabas naman ng direktiba ang Department of the Interior and Local Government (DILG) na ang lahat ng local government units (LGUs) na i-recognize ang PhilID sa mga pampubliko at pribadong transaksiyon.

“We aim to register 50 to 70 million Filipinos with the PhilSys and achieve 100% financial inclusion at the family level by the end of the year. This will help the government efficiently identify beneficiaries for social protection programs and spark the widespread use of electronic payments to accelerate the digital economy,” sabi pa ni Chua.