DILG: 7 todas, 33 nasugatan sa 'insidente' sa May 9 elections

ni Lolet Abania | May 12, 2022

Umabot sa 27 'insidente' ang nai-report na nangyari noong Mayo 9, Election Day, na nagresulta sa pagkamatay ng pitong indibidwal, ayon sa Department of the Interior and Local Government (DILG).

“Sa mismong araw ng eleksyon, ito po ay nu’ng May 9, nakapagrehistro tayo ng 27 incidents,” pahayag ni DILG Secretary Eduardo Año kay Pangulong Rodrigo Duterte sa Talk to the People na ipinalabas ngayong Huwebes.

Ayon kay Año, bukod sa pitong nasawi, nasa 33 pa ang nasaktan sa mga naturang insidente.

Aniya, mayroong 11 shooting at mauling incidents na naganap sa Albay, Negros Oriental, Cotabato City, Maguindanao, Lanao del Sur, Basilan, at Zamboanga del Norte.

Sa Maguindanao at Cotabato, nai-report ang tatlong grenade explosions, habang dalawang strafing incidents o pagpapaulan ng bala ng baril sa Basilan.

Nakapagtala naman ng apat na insidente ng kaguluhan sa Maguindanao, Camarines Sur, Lanao, at Tawi-Tawi.

Sinabi rin ni Año na dalawang insidente ng ballot snatching ang naganap sa Lanao del Sur at Basilan, habang tatlong insidente ng sapilitang pagpasok ng mga ‘di awtorisadong indibidwal sa mga polling precincts ang naiulat sa Batangas, Maguindanao at Abra.

Gayundin, dalawang insidente ng pagwasak sa mga vote counting machines (VCMs) ang nai-report sa Lanao del Sur.

Ayon pa kay Año, anim lamang mula sa 27 nai-report na insidente sa mismong araw ng eleksyon ang hinihinala bilang election-related.

Turista sa bansa, pumalo ng 313K – DOT

ni Zel Fernandez | April 26, 2022

Umakyat sa mahigit 313,050 international tourist arrivals ang naitala sa bansa matapos muling magbukas ang mga borders ng ‘Pinas sa mga turistang bakunado, magmula noong Pebrero 10 hanggang Abril 25 ngayong taon.

Sa public briefing ng Laging Handa, idinetalye ni Tourism Secretary Bernadette Romulo-Puyat na karamihan sa mga dayuhan ay nanggaling sa US, Canada, at South Korea.

Bagaman, malayo pa umano ito sa dating 8 milyong turista na dumayo sa ‘Pinas bago ang pandemya noong 2019, indikasyon pa rin umano ito na unti-unti nang sumisigla ang turismo sa bansa.

“Sa pre-pandemic levels naman with regard to international tourist arrivals, medyo malayo pa kasi nu’ng 2019, we received about 8.26 million tourists. Pero masaya tayo kasi (but we are happy because) at least, we already received 313,050 international arrivals,” ani Romulo-Puyat.

Ayon sa kalihim ng Department of Tourism (DOT), katuwang ang Department of the Interior and Local Government (DILG) ay mahigpit nilang binabantayan ang pagtalima ng mga accommodation establishments sa mga health protocols kontra-COVID-19 bilang pagsiguro sa proteksiyon ng mga turista at lokal na mamamayan sa bansa.

“’Yun na nga syempre paalala pa rin, masaya tayo na we are slowly getting back to normal pero paalala rin that we still really have to follow minimum health and safety protocols,” aniya.

Pagtitiyak ng kawani, sa oras na makakita ang ahensiya ng anumang uri ng paglabag o kapabayaan sa pagpapanatili ng kalusugan at kaligtasan sa mga establisyimento, agad itong pinadadalhan ng show cause order mula sa gobyerno.

Samantala, kung sakali umanong maulit pa ang paglabag ay awtomatiko itong ipasasara.

Du30: Safety protocols, 'wag kalimutan sa community pantry

ni Ronalyn Seminiano Reonico | June 15, 2021

Saludo si Pangulong Rodrigo Duterte sa mga community pantry organizers sa bansa dahil sa kanilang magandang intensiyon, ngunit nilinaw niya na kailangang sundin ng mga ito ang ipinatutupad na COVID-19 health protocols ngayong panahon ng pandemya.

Matatandaang ilang community pantries na rin ang dinumog ng mga tao kung saan nalabag ang mga health protocols katulad ng social distancing.

Saad ni P-Duterte, "Wala namang question itong pantry scheme. As a matter of fact, I salute the people behind this and those who originated it. Nagkulang sila and maybe they are ignorant of the prohibition imposed by law not by me.

"Hindi siguro n’yo nabasa pero sa totohanan lang, if it is a matter of assessing whether or not you are doing good, you are doing super good. Saludo ako at maganda ang kunsensiya ninyo sa tao but please, read the restrictions first.”

Si Ana Patricia Non ang unang nagtayo ng Maginhawa Community Pantry na tinularan ng maraming Pinoy at ayon sa House Resolutioin, umabot na sa 6,000 ang community pantries sa iba’t ibang lugar sa bansa.

Samantala, una nang nagpaalala ang Department of the Interior and Local Government sa mga organizers ng community pantry na iwasan ang pagkakaroon ng mahabang pila ng mga tao lalo na ang mass gathering.